ফগদাং পেইয়্যে 18 - Chakma Bible

বাবিল শঅরর্ ভস্ত অনা

¹ ইয়েন পরেদি মুই আর এক্কো স্বর্গদূতোরে স্বর্গত্তুন্ লামি এত্তে দেগিলুং। তার দাঙর্ খেমতা এলঅ আর পিত্‌থিমীগান তার্ মহিমালোই জ্বোল্‌জোল্ল্যে ওই গেলঅ।

² তে জোরে রঅ ছাড়িনে কলঅ, “ভস্ত ওইয়্যে, সেই নাঙ্-গোজ্জ্যে বাবিলান ভস্ত ওইয়্যে! সিয়েন ইক্কিনে ভান্ন্যেই আত্মাগুনোর থেবার্ জাগা ওইয়্যে আর পত্তি ভান্ন্যেই আত্মাগুনোর্ আড্ডাখানা আর অসিজি আর জঘন্য পেগ্‌খুনোর্ বাহ্ ওইয়্যে,

³ কিয়া তে তার্ বেভিচারর্ দর্‌গরেপারা মদ্‌তান বেক জাদ্‌তুনোরে হেবাত্যে দিয়্যে। পিত্‌থিমীর রাজাগুনে তা সমারে বেভিচের গোজ্জ্যন, আর পিত্‌থিমীর বেবসায়ীগুনে তার্ লাগাম-নেইয়্যে কামনালোই থাগোইয়্যে ওইয়োন।”

⁴ সিয়েন পরেদি মুই স্বর্গত্তুন্ আর একজনরে কধে শুনিলুং, “মঅ মানুচ্চুন, তুমি বাবিলোত্তুন্ নিগিলি এজঅ যেন তার্ পাপর ভাগীদার তুমি ন-অ, আর যেদক্কানি আঘাত্ তা উগুরে পড়িবো সিয়েনর্ কনগান যেন তমাত্তুন্ ভুগো ন-পড়ে।

⁵ তার পাপ্‌পানি আগাজ সং অজল ওইয়্যে আর তার্ ভান্ন্যেই কামর কধানি গোজেনে মনে গোজ্জ্যে।

⁶ তে অন্যগুনো সমারে যেবাবোত্যে বেবহার গোজ্জ্যে তা সমারেয়ো সেবাবোত্যে বেবহার গর্; তা কামানির্ পুরোপুরি ফল তারে দে। যে গলজ ভিদিরে তে অন্যগুনোত্যে ভান্ন্যেই মিজেদ, সিয়েনত্ তার পুরোপুরি সাজা মিজেইনে তারে হেবাত্যে দে।

⁷ তে নিজো পৌইদ্যেনে যেদক্ বেশ্ দেমাগ্ গোজ্জ্যে, যেদক্ বেশ্ উবোল্‌পাল্ গুরি বজত্তি গোজ্জ্যে, ঠিগ্ সেত্তমান যন্ত্রণা আর দুঘ্ তারে দে; কিয়া তা মনভিদিরে সেবাবোত্যেগুরি, ‘মুই দঅ রাণী ওইনে বৈ আঘং, মুই রানি মিলে নয়; কনঅ বাবদে মুই দুঘ্ ভুগি ন-পারিম।’

⁸ সেনত্যে এক দিনে বেক্‌ আঘাত্‌তানি তা উগুরে পড়িবো; সিয়েনি অলঅ মরণান্, দুঘ্ আর ভাদরাদ্। আগুন্দোই তারে পুড়ি ফেলা অবঅ, কিয়া যিবে তার্ বিচের্ গুরিবো সেই প্রভু গোজেনে খেমতাবলা।”

⁹ পিত্‌থিমীর্ যিদুক্কুন্ রাজা তা সমারে বেভিচের্ গোজ্জ্যন আর উবোল্‌পাল্ গুরি তা সমারে বজত্তি গোজ্জ্যন তারা তারে পুড়ি ফেলেবার্ সময়োত্ ধূমো দেগিনে কানিবাক্ আর তাত্যে দুঘ্ পেবাক্।

¹⁰ তারা তার্ যন্ত্রণা দেগিনে দরে দূরোত্ থিয়্যেই থেইনে কবাক্, “হায় বাবিল, হায়! সেই নাঙ্-গোজ্জ্যে শঅরান্, খেমতালোই ভরা সেই শঅরান্। এদক্ কম সময়ো ভিদিরে তর্ সাজা লুম্মেগি!”

¹¹ পিত্‌থিমীর বেবসায়ীগুনেয়ো তাত্যেই কানিবাক্ আর দুঘ্ পেবাক্, কিয়া তারার্ জিনিচ্চানি আর কেঅ ন-কিনিবাক্।

¹² তারার সেই জিনিচ্চানি ভিদিরে আঘে-সনা, রূবো, মংগা পাথর আর মুক্তা; কচি মসীনার্ কাবড়, বিগুনী রংয়র্ কাবড়, রেশমী আর রাঙা কাবড়; নানান্ বাবোত্যে তুম্‌বাচ্‌ গাজ আর এদো দাতর্ বানেয়্যে নানান্ বাবোত্যে জিনিচ্‌; ভারী মংগা গাজ্‌চোই বানেয়্যে আর পিদোল, লুয়ো আর মার্বেল পাথরলোই বানেয়্যে নানান্ জিনিচ্‌;

¹³ দারচিনি, এলাচ, আগর্‌বাট্টি, আতর আর তুম্বাজ্ রস; আংগুর-রস, জলপাইয়র্ তেল, মোয়দ্যে আর গম; গরু আর ভেড়া, ঘোড়া আর গাড়ী আর কিন্যে চাগর্।

¹⁴ সেই বেবসায়ীগুনে কবাক্, “যে ফল তুই লাভ গুরিবাত্যে চেইয়োচ্ সিয়েন তত্তুন্ দূরোত্ সুরি যেইয়্যে; তর বেক্‌ ধন আর সয়সাগোজ্জ্যেগানি ভস্ত ওই যেইয়্যে। মান্‌জ্যে আর কনদিনঅ সিয়েনি ন-পেবাক্।”

¹⁵ যিগুনে এ জিনিস্‌চানির বেবসা গুরিনে থাগোইয়্যে ওইয়োন সেই বেবসায়ীগুনে তার্ যন্ত্রণাগান দেগিনে দরে দূরোত্ থিয়্যেই থেবাক্।

¹⁶ তারা কানি কানি দুঘ্ পেইনে কবাক্, “হায়, হায়! নিগুজ্ মসীনা কাবড় আর বিগুনী আর রাঙা কাবড় পিন্ন্যে আর সনা, মংগা পাথর আর মুক্তোলোই সাজেইয়্যে সেই নাঙ-গোজ্জ্যে শঅরান্!

¹⁷ এদক্ কম সময়ো ভিদিরে তর্ এমন বেক ধন-সোম্বোত্তিগানি বর্‌বাদ্ ওই যেইয়্যে!” জাহাজর্ আজল্ ধর্মগুরুগুন, পানি পধেদি যেইয়্যেগুন, নাবিক্কুন আর সাগরত্ যিগুনে বেবসা-বানিজ্য গরন তারা বেক্কুনে দূরোত্ থিয়্যেই থেলাক্।

¹⁸ তারে পুড়িবার সময়োত্ ধূমো দেগিনে তারা রঅ ছাড়িনে কলাক্, “আর কন্ শঅরান এই নাঙ্-গোজ্জ্যে শঅরান ধোক্ক্যেন?”

¹⁹ তারা তারার্ মাঢাত্ ধূল্যে দিইনে রঅ ছাড়া ধুরিবাক্ আর কানি কানি দুঘ্ পেইনে কবাক্, “হায়, সেই নাঙ্-গোজ্জ্যে শঅরান্, হায়! সাগরত্ যিগুনোর জাহাজ আঘে তারা তার্ ধনানিলোই থাগোয়্যে ওইয়োন; আর চঅ, চোগো জিমিদোত্ তে ভস্ত ওই গেলঅ!”

²⁰ সেক্কে সেই স্বর্গদূত্‌‌তো কলঅ, “ও স্বর্গগান, সেই শঅরানর্ ভস্ত অনাত্যে হুজি অ। গোজেনর্ মানুচ্চুন, দ্বিপাদেয়্যেগুন আর ভাববাদীগুন, হুজী অ। তমা বিরুদ্ধে তে যাহ্ গোজ্জ্যে সিয়েনত্যে গোজেনে তা বিচেরান গোজ্জ্যে।”

²¹ যেরেদি এক্কো বোলী স্বর্গদূতে দাঙর্ এক্কো পাত্তর্ লোইনে সাগরত্ ফেলেই দিইনে কলঅ, “এবাবোত্যেগুরি সেই নাঙ্-গোজ্জ্যে বাবিল শঅরানরে ফেলেই দিয়্যে অবঅ। তারে আর কনদিনঅ পাহ্ ন-যেবঅ।

²² যিগুনে বীণা বাজান্, গীদ্ গান্ আর বাশী বা তূরী বাজান্ তারার্ রগুন আর কনদিনঅ তমা ইধু শুনো ন-যেবঅ। আর কনদিনঅ তমা ইধু কনঅ বাবদে কাবিল মিস্ত্রি পাহ্ ন-যেবঅ। কনঅ মিশিনো আবাজ্ আর কনদিনঅ তমা ইধু শুনো ন-যেবঅ।

²³ চেরাগ পহ্‌রান্ আর কনদিনঅ তমা ইধু ন-জ্বলিবো। নুয়ো বৌ-জামেয় মুয়োত্তুন্ আবাজ্অ আর তমা ভিদিরে কনদিনঅ শুনো ন-যেবঅ। তর্ বেবসায়ীগুনে পিত্‌থিমীত্ নাঙ্‌‌গিনেপারা এলাক্, আর বেক্‌ জাদ্‌‌তুনে তর্ যাদুর ছলনায় ভুলিদাক্।

²⁴ ভাববাদীগুনোর, গোজেন মানুচ্চুনোর আর যিদুক্কুন মান্‌‌জ্যরে এ পিত্‌থিমীত মারে ফেলা ওইয়্যে, সিগুনোর্ লো-নি এই বাবিলোত্ পাহ্ যেয়্যে।”