ফগদাং পেইয়্যে 17 - Chakma Bible

য়েমান্নো উগুরে বোস্যেদে মিলেবো

¹ যে সাতজন স্বর্গদূতো আঢত্ সাত্‌টো কদরা এলাক্ তারাত্তুন্ একজনে এইনে মরে কলঅ, “বজমান পানি উগুরে যে দাঙর্ বেশ্যেবো বৈ আঘে, আয়, মুই তার সাজা তরে দেগাং।

² পিত্‌থিমীর রাজাগুনে তা সমারে বেভিচের্ গোজ্জ্যন, আর যিগুনে এ পিত্‌থিমীর সিগুনে তার্ বেভিচারর্ আংগুর-রসে মাত্তল্ ওইয়োন।”

³ সে পরেদি সেই স্বর্গদূত্‌তো মরে ধূল্যেচর চাগালাত্ নেযেল। সেক্কে মুই পবিত্র আত্মার্ অধিনোত্ এলুং। সিয়েনত্ মুই এক্কো মিলেরে এক্কো রাঙা রংয়র্ য়েমান উগুরে বৈ থাদে দেগিলুং। গোজেনরে অগমান গুরিবাত্যে ভালক্কানি নাঙ্ সেই য়েমান্নো উগুরে লেগা এলঅ। তার্ সাত্‌টো মাঢা আর দোচ্‌শো শিং।

⁴ সেই মিলেবো বিগুনি আর রাঙা রংয়র্ পোজাক্ এলঅ আর তা কিয়্যেত্ সনা, মংগা মংগা পাত্তর্ আর মুক্তোর গয়না এলঅ। জঘণ্য জিনিচ্‌ আর তার্ বেভিচারর্ কজরালোই ভরা এক্কো সনার কদরা তা আঢত্ এলঅ।

⁵ তা কবালত্ এমন্‌ নাঙ্ লেগা এলঅ যিবে পৌইদ্যেনে এক্কান গুমুরো সত্য আঘে। সেই নাঙান্ অলঅ, “নাঙ্ গোজ্জ্যে বাবিল, বেশ্যেগুনোর আর পিত্‌থিমীর বেক্‌ জঘন্য জিনিজোর্ মা।”

⁶ মুই দেগিলুং, সেই মিলেবো গোজেন মানুচ্চুনোর্ লো আর যিগুনে যীশুর্ পৌইদ্যেনে সাক্ষ্য দুয়োন সিগুনোর্ লো হেইনে মাত্তল্ ওই আঘে।

⁷ মুই তারে দেগিনে ভারী আমক্ ওলুং। সেক্কে সেই স্বর্গদূত্‌তো মরে কলঅ, তুই আমক্ অর্ কিত্ত্যে? মিলেবোর্ আর যে য়েমান্নো তারে বুয়োইনে বেড়ার্ সেই য়েমান্নোর্ গুমুরো অত্তগান তরে বুঝেই দোঙর্। ইবে সেই য়েমান্নো যিবের্ সাত্‌টো মাঢা আর দোচ্‌শো শিং এলঅ।

⁸ যে য়েমান্নোরে তুই দেখ্যচ্ তে আগে এলঅ মাত্তর্ ইক্কুনি নেই। যেরেদি তে সেই সুরুঙো গাঢ্‌তোত্তুন্ উদি এইনে উমর্ সং সাজা ভুগিবো। সেক্কে যিগুনে এই পিত্‌থিমীর, অত্তাৎ জগদ্‌তান সৃট্টির সময়োত্তুন্ ধুরি যিগুনোর্ নাঙানি জিংকানি-বোইয়োত্ লেগা নেই তারা সেই য়েমান্নোরে দেগিনে আমক্ ওই যেবাক্; কিয়া য়েমান্নো আগে এলঅ, ইক্কিনে নেই, অদচ আরঅ দেগা দিবো।

⁹ ইক্কিনে যিয়েন কুয়ো অবঅ সিয়েন বুঝিবাত্যে বুদ্ধির্ দরকার। সেই সাত্‌টো মাঢা অলঅ সাত্‌টো মূড়ো যিবে উগুরে মিলেবো বৈ আঘে। সেই সাত্‌টো মাঢা আরঅ সাতজন রাজায়ো ঠিগ্।

¹⁰ সেই রাজাগুনো ভিদিরে পাঁচজন আগেই শেজ্ ওই যেয়োন্, একজন এজঅ আঘে আর অন্যজন এজঅ ন-এজে। সেই রাজাবো এজানার্ পরেত্তুন্ ধুরি তাত্তুন্ কিজু দিন থা পরিবো।

¹¹ যে য়েমান্নো আগে এলঅ মাত্তর্ ইক্কুনি নেই তে সেই সাতজন ভিদিরে একজন অলেয়ো তে আস্‌তো লম্বর রাজা; তে উমর সং সাজা ভুগিবো।

¹² “যে দোচ্চো শিং তুই দেখ্যচ্ সিগুন অলাক্ দশজন রাজা। তারা এজঅ রাজাগিরি গরানা আরাম্ভ ন-গরন, মাত্তর্ তারা সেই য়েমান্নো সমারে কানক্কনত্যে রাজা ইজেবে রাজাগিরি গুরিবার খেমতা পেবাক্।

¹³ এই রাজাগুনোর উদ্দেচ্য এক্কুই, আর তারা বেক্কুনে তারার্ খেমতা আর অধিকার সেই য়েমান্নোরে দিবাক্।

¹⁴ ইগুনে ভেড়া-ছবোর্ বিরুদ্ধে যুদ্ধো গুরিবাক্ আর ভেড়া-ছবো তারারে ওদেই দিবো; কিয়া তে প্রভুগুনোর প্রভু আর রাজাগুনোর রাজা। যিগুনোরে ডাগা ওইয়্যে আর বেঈ লুয়ো ওইয়্যে আর যিগুনে বিশ্বেজি তারা তা সমারে থেবাক্।”

¹⁵ সে পরেদি সেই স্বর্গদূত্‌তো মরে কলঅ, “তুই যে পানিগান দেখ্যচ্, যিবে উগুরে সেই বেশ্যেবো বৈ আঘে, সিয়েনি অলঅ ভালোক্কানি দেশ্, ভালোক্কুন মানুচ্‌, ভালোক্কুন জাত্ আর ভালোক্কানি ভাষা।

¹⁶ তুই যে দোচ্চো শিং দেখ্যচ্ সিগুনে আর সেই য়েমান্নো সেই বেশ্যেবোরে ঘিনেবাক্। তারা তারে ভস্ত আর লাংদা গুরিবাক্ আর তা য়েরাগান্ হেবাক্; সে পরেদি তারে আগুন্দোই পুড়ি ফেলেবাক্।

¹⁷ ইয়েনর্ কারণান্ অলঅ, গোজেনে তারার্ মন ভিদিরে এমন্‌ আওজ্ দিয়্যে যেনে তার্ কধানি ফলে। সিয়েনর্ কারনে তারা একমন ওইনে সেই য়েমান্নো ইধু তারার্ বেক খেমতাগানি দান গুরিবাক্, যেনে গোজেনর্ কধানি পূরোণ ন-অনা সং তে রাজাগিরি গুরি পারে।

¹⁸ যে মিলেবোরে তুই দেখ্যচ্ তে অলঅ সেই নাঙ্-গোজ্জ্যে শঅরান্, যে জগদর্ বেক্ রাজাগুনো উগুরে রাজাগিরি গরের্।”