ফগদাং পেইয়্যে 16 - Chakma Bibleগোজেনর রাগে ভরা সাত্টো কদরা 1 যেরেদি মুই শুনিলুং, সেই উবোসনা-ঘরত্তুন্ সেই সাতজন স্বর্গদূতোরে একজনে দাঙর্ দাঙর্ গুরি কত্তে, “তুমি যেইনে গোজেনর রাগে ভরা সাত্টো কদরা পিত্থিমী উগুরে উবোত্ গুরি ঢালি দুয়ো।” 2 সেক্কে পত্তম স্বর্গদূত্তো যেইনে তা কদরাবো পিত্থিমী উগুরে উবোত্ গুরিলো। সিয়েনত্যে যিগুনো উগুরে সেই য়েমান্নোর্ চিহ্নো এলঅ আর যিগুনে তার মূত্তিবোরে পূজো গুরিদাক্ তারা কিয়্যেত্ ভারী খারাব আর বিষবলা এক বাবত্যে ঘা দেগা দিলো। 3 দ্বি-লম্বর স্বর্গদূত্তো তা কদরাবো সাগর উগুরে উবোত্ গুরিলো। সেক্কে সাগর পানিগান মরা মান্জ্যর্ লো ধোক্ক্যেন অলঅ, আর সাগরর্ বেক্ প্রাণীগুন মুরি গেলাক্। 4 যেরেদি তিন লম্বর স্বর্গদূত্তো গাঙান উগুরে আর পয়নালাবো উগুরে তা কদরাবো উবোত্ গুরিলো। সেক্কে সিয়েনি লো গাঙ্ আর পয়নালা ওই গেলঅ। 5 পানি উগুরে যে স্বর্গদূত্তোর খেমতা এলঅ মুই তারে এ কধাগান কধে শুনিলুং: “ও পবিত্র, তুই আঘচ্ আর তুই এলে। তুই ন্যায়বান, কিয়া তুই এই সাজাগানি দুয়োচ্। 6 এ মানুচ্চুনে গোজেন মানুচ্চুনোরে আর ভাববাদীগুনোরে খুন গোজ্জ্যে। সেনত্যে তুই তারারে এ লো-গান হেবাত্যে দুয়োচ্ আর ইয়েনই তারাত্যে যগাজ্জ্যে ওইয়্যে।” 7 মুই পূজোবোত্তুন্ একজনরে এ কধাগান কধে শুনিলুং: “বেগত্তুন্ খেমতাবলা প্রভু গোজেন, তর বেক্ বিচেরানি সত্য আর ন্যায়ে ভরা।” 8 চের-লম্বর স্বর্গদূত্তো বেলান উগুরে তা কদরাবো উবোত্ গুরিলো। সেক্কে মানুচ্চুনোরে আগুনদোই পুড়ি ফেলেবাত্যে বেলানরে খেমতা দিয়্যে অলঅ। 9 সেক্কে অমকদ গরমে মানুচ্চুনোর কিয়্যেগানি পুড়ি গেলঅ, আর এই আঘাত উগুরে যিবের খেমতা আঘে তারা সেই গোজেনরে নিন্দে গরা ধুরিলাক্, মাত্তর্ তো তারা তারার্ ভান্ন্যেই কামানিত্তুন্ মনানি ন-ফিরেলাক্। 10-11 যেরেদি পাচ-লম্বর স্বর্গদূত্তো সেই য়েমান্নোর্ সিংহাসনান উগুরে তা কদরাবো উবোত্ গুরিলো; সেক্কে সেই য়েমান্নোর্ রেজ্যগান আন্ধার্ ওই গেলঅ। যন্ত্রণায় মান্জ্যে তারার জিলানি কামারা ধুরিলাক্ আর তারার এ যন্ত্রণা আর ঘা গানিত্যে তারা স্বর্গর গোজেনরে নিন্দে গরা ধুরিলাক্, মাত্তর্ তো তারা তারার্ ভান্ন্যেই কামানিত্তুন্ মনানি ন-ফিরেলাক্। 12 সে পরেদি ছ লম্বর স্বর্গদূত্তো বড়্গাঙ ইউফ্রেটিস উগুরে তা কদরাবো উবোত্ গুরিলো। সেক্কে পুগেদি দেজর্ রাজাগুনোর যেবার পধ্তান যুক্কোল অবাত্যে সেই গাঙান পানিগান শুগেই গেলঅ। 13 সেক্কে মুই বেঙ ধোক্ক্যেন তিন্নো ভান্ন্যেই আত্মা দেগিলুং। সিগুন সেই দানব, সেই য়েমান্নো আর সেই ফক্কর ভাববাদীবো মুয়োত্তুন্ নিগিলি এত্তন্। 14 সেই ভান্ন্যেই আত্মাগুনে আমক্ আমক্ কাম গত্তন্। বেগত্তুন্ খেমতাবলা সেই গোজেনর দাঙর্ দিনোত্ যুদ্ধো গুরিবাত্যে তারা সারা জগদর্ রাজাগুনোরে এগত্তর্ গুরিলাক্। 15 যীশু কত্তে, “চঅ, মুই চুরো ধোক্ক্যেন এইম্। বর্পেইয়্যে সেই মানুচ্চো, যে জাক্ক্যে থায় আর নিজোর্ পোজাগ্কানি পিনি থায়, যেন তাত্তুন্ লাংদা ওইনে ঘুরো ন-পরে আর মান্জ্যে তার লাজানাগান ন-দেগন্।” 16 ইব্রীয় কধানি যে জাগায়ানর নাঙান্ হরমাগিদোন, ভান্ন্যেই আত্মাগুনে সেই রাজাগুনোরে সিয়েনত্ থুবেলাক্। 17 যেরেদি সাত-লম্বর দূত্তো তা কদরাবো বৈয়্যেরত্ উবোত্ গুরিলো। সেক্কে উবোসনা-ঘরর সিংহাসনানত্তুন্ জোরে এ কধানি কুয়ো অলঅ, “যিয়েন অবার সিয়েন ওই যেয়্যে।” 18 সেক্কে দেবা ঝিমিলেনি উয়ো ধুরিলো, দর্গরেপারা আবাজ্ অনা আর দেবা পেরাগ পড়া ধুরিলো আর এমন্ দর্গরেপারা ভূজোল্ বেলঅ যিয়েন পিত্থিমীত মানুচ্ সৃট্টির পরেত্তুন্ ধুরি আর কনদিন্অ দেগা ন-যায়। সেই ভুজোলান্ অমকদ দর্গরেপারা এলঅ। 19 সেই নাঙ্-গোজ্জ্যে শঅরান তিন ভাগে ভাগ ওই গেলঅ আর নানান্ জাদর্ শঅরানি ভাঙি পড়ি গেলঅ। যেরেদি সেই নাঙ্-গোজ্জ্যে বাবিল কধা গোজেনর্ মনত্ পড়িলো, আর তে তার্ রাগে দর্গরেপারা মদ গলচ্চো ভোরেইনে বাবিলরে হেবাত্যে দিলো। 20 সেক্কে এক এক্কো দ্বীপ ধেই গেলাক্ আর মূড়োগুন আর দেগা ন-গেলঅ। 21 আগাজত্তুন্ মান্জ্য উগুরে দাঙর্ দাঙর্ পাত্তর ধোক্ক্যেন শিল পড়া ধুরিলাক্। সিগুনোর্ এক এক্কো মাবেদি এলাক্ ছত্রিশ কেজি। সেক্কে মানুচ্চুনে শিলো আঘাদত্তে গোজেনরে নিন্দে গরা ধুরিলাক্, কিয়া সেই শিলোর আঘাত্তো দর্গরেপারা এলঅ। |
Copyright © 2021 Bangladesh Bible Society
Bangladesh Bible Society