ফগদাং পেইয়্যে 12 - Chakma Bible

সেই মিলেবো আর দানপ্পো

¹ পরেদি স্বর্গত্ এক্কান দাঙর্ চিহ্নো দেগা গেলঅ-এক্কো মিলে, যে পজাগ্‌কান এলঅ বেলান আর টেঙত্ তলে এলঅ চানান্। বারঅবো তারালোই গাধেয়্যে এক্কো মুকুট্ তা মাঢাবোত্ এলঅ।

² তে পিদিলি এলঅ আর পুয়ো ফুদোদে রঅ ছাড়ের্।

³ সে পরেদি স্বর্গত্ আর এক্কান চিহ্নো দেগা গেলঅ-আগুনো ধোক্ক্যেন রাঙা এক্কো দাঙর্ দানব্। তার্ সাত্‌টো মাঢা আর দশ্‌চো শিং, আর মাঢাগুনোত্ সাত্‌টো মুকুট এলাক্।

⁴ তা লেজ্‌চান্দোই তে আগাজর্ তিন ভাগর্ এক ভাগ তারা টানি আনিনে পিত্‌থিমীত্ লুঙি মারি দিলো। যে মিলেবোর পুয়ো অদ যার্ দানপ্পো তা মুজুঙোত্ থিয়্যেই এলঅ যেন পুয়োবোর জর্ম অলে তে হেই ফেলেই পারে।

⁵ মিলেবোর এক্কো পুয়ো অলঅ। সেই পুয়োবো লুয়ো লুদিক্কোই বেক্ জাদ্‌তুনোরে শাসন গুরিবো। সেই পুয়োবোরে গোজেনে আর তা সিংহাসন ইধু তুলি নেযা অলঅ,

⁶ আর সেই মিলেবো ধূল্যেচরত্ ধেই গেলঅ। গোজেনে সেই ধূল্যেচরত্ তাত্যে এক্কান জাগা থিক্ গুরি থোইয়্যে যেন এক আজার দ্বিশঅ ষায়েত দিন তে সিধু যত্তন্ পায়।

⁷ সে পরেদি স্বর্গত্ যুদ্ধো অলঅ। মীখায়েল আর তা অধীনোত্ স্বর্গদূত্‌তুনে সেই দানব আর তা দুত্‌তুনো সমারে যুদ্ধো গুরিলাক্।

⁸ সেই দানপ্পো জিদি ন-পারিলো আর স্বর্গত্ তারারে আর্ থেবাত্যেয়ো দিয়্যে ন-অলঅ।

⁹ সেক্কে সেই দাঙর্ দানপ্পোরে আর তা সমারে তা দুত্‌তুনোরে পিত্‌থিমীত ফেলেই দিয়্যে অলঅ। এই দানপ্পো অলঅ সেই পুরোনা সাব্‌পো যিবেরে দিয়াবল বা শদান্ কুয়ো অয়। তে পিথ্‌তিমীর্ বেক্‌ মানুচ্চুনোরে ভুল্ পধেদি নেযায়।

¹⁰ সে পরেদি মুই স্বর্গত্তুন্ দাঙর্ দাঙর্ গুরি একজনরে কধে শুনিলুং, ইক্কিনে উদ্ধোর্, খেমতা আর আমার গোজেনর্ রেজ্য আর তার্ মশীহর খেমতা লুম্মেগি, কিয়া যিবে আমা ভেইবোরে দুষ্ দিদো তারে স্বর্গত্তুন্ ফেলেই দিয়্যে ওইয়্যে। আমা গোজেন মুজুঙোত্ তে দিন-রেত্ তারারে দুষ্ দেগেদ।

¹¹ ভেড়া-ছবোর্ লো আর নিজোর সাক্ষ্যলোই তারা তারে অদেই দুয়োন। তারা নিজোরে বেশ্ কোচ্‌ ন-পান্ বিলিনে তারার্ জিংকানিগানি দিবাত্যে তারা রাজী এলাক্।

¹² “সেনত্যে ও স্বর্গগান, হুজী অ; তুমি যিগুনে সিধু বজত্তি গরঅ, হুজী অ। মাত্তর্ পিত্‌থিমী আর দোজ্জ্যে সাগরান, অভিশাব্ দুয়োং তমারে! কিয়া শদানে তমা উগুরে লামি এচ্চ্যে। শদানে রাগে ফুলি উত্ত্যে, কিয়া তে কোই পারে তা সময়ান আর্ বেশ্ নেই।”

¹³ সেই দানপ্পো যেক্কে দেগিলো, তারে পিত্‌থিমীত ফেলেই দিয়্যে ওইয়্যে সেক্কে যে মিলেবোর পুয়ো ওইয়্যে দানপ্পো তা পিজেদি লাগিলো।

¹⁴ সেক্কে সেই মিলেবোরে এক্কো দাঙর্ ঈগলর্ দ্বিয়েন দুয়ো দিয়্যে অলঅ যেন তে ধূল্যেচরত্ তা জাগানত্ উড়িনে যেই পারে। সিধু সেই সাব্‌পোর্ চোগো আন্দলে সাড়ে তিন বজর্ তারে যত্তন্ গরা অবঅ।

¹⁵ সেক্কে সেই সাপ্পো সেই মিলেবোর্ পিজেন্দিত্তুন্ তারে গঙারত্ ভাজেই নেযেবাত্যে তা মুয়োত্তুন্ পানি নিগিলেনেই এক্কান্ গাঙ্ সৃট্টি গুরি ফেলেল,

¹⁶ মাত্তর্ পিত্‌থিমীগানে সেই মিলেবোরে সাহায্য গুরিলো। সেই দানপ্পো তা মুয়োত্তুন্ যে পানিগান নিগিলেল পিত্‌থিমীগানে তা মুয়োন্ খুলিনে সিয়েন হেই ফেলেল।

^17-18 সেক্কে সেই দানপ্পো সেই মিলেবো উগুরে অমকদ রাগ গুরিলো; আর সেই মিলেবো গুট্টির বাদ্‌বাগী মানুচ্চুন্, অত্তাৎ যিগুনে গোজেনর্ উগুম পালান্ আর যীশুর শিক্ষ্যেনি ধুরি রাগান্ তারা বিরুদ্ধে তে যুদ্ধো গুরিবাত্যে গেলঅ আর দোজ্জ্যে সাগর পারত্ থিয়্যেই রলঅ।