ফগদাং পেইয়্যে 11 - Chakma Bible

দ্বিজন্ সাক্ষী

¹ সে পরেদি মাবেদে কাদি ধোক্ক্যেন এক্কো নলর্ লুদিক্ মরে দিয়্যে অলঅ আর কুয়ো অলঅ, “উবোসনা-ঘর আর পূজো মাপ আর যিগুনে সিধু গোজেনর্ উবোসনা গরন্ তারারে গুণো।

² মাত্তর্ উবোসনা-ঘরর্ বারেদি যে উদোনান্ আঘে সিয়েন বাদ দিচ্‌, ন-মাবিচ্; কিয়া সিয়েন অযিহূদীগুনোরে দিয়্যে ওইয়্যে। তারা বিয়াল্লিশ্ মাস সং পবিত্র শঅরান টেঙোই উরিবাক্।

³ মাত্তর্ মুই মর্ দ্বিজন সাক্ষীরে এন্‌ খেমতা দিম যে কারনে তারা বস্তা পিনিনে এক আজার দ্বিশ ষায়েট দিন সং ভাববাদী ইজেবে কধা কবাক্।”

⁴ সেই দ্বিজন সাক্ষী অলাক্ দ্বিবে জলপাই গাজ্ আর দ্বিবে চেরাগ টগ্, যিগুনে পিত্‌থিমীর প্রভুর মুজুঙোত্ থিয়্যেই আঘন।

⁵ কেঅ যুনি তারারে ক্ষোতি গুরিবাত্যে চায় সালে তারার্ মুয়োত্তুন্ আগুন নিগিলিনে সেই শত্রুগুনোরে পুড়ি ফেলেবাক্। যে কেঅ তারারে ক্ষোতি গুরিবাত্যে চেবাক্ তারাত্তুন্ এবাবোত্যেগুরি মরা পড়িবো।

⁶ এ মানুচ্চুনে যেদক বিলোন ভাববাদী ইজেবে কধা কবাক্ সেদক বিলোন যেন ঝড় ন-অয় সেনত্যে আগাজ্‌চান নাঢি দিবার খেমতা তারার্ থেবঅ। পানিগানরে লো বানেবার আর যেদকবার আওজ্ সেদকবার যে কনঅ আঘাত্‌তোই পিত্‌থিমীগানরে ক্ষোতি গুরিবার খেমতায়ো তারার্ থেবঅ।

⁷ তারার্ সাক্ষ্য দেনা থুম্ অলে পরেদি সেই গভিন্ গাঢ্‌তোত্তুন্ এক্কো য়েমান উদি এইনে তারা লগে যুদ্ধো গুরিবো আর তারারে অদেই দিইনে মারে ফেলেব।

⁸ তারার্ প্রভুরে যে শঅরত্ ক্রুশোত দিয়্যে ওইয়্যে সেই দাঙর্ শঅরানর্ পধত্ তারার কিয়্যেনি পড়ি থেবঅ। সেই শঅরানর্ নাঙান্ সদোম আর মিসরঅ কুয়ো অয়।

⁹ সেক্কে বেক্‌ দেশ্‌চানি, বংশ, ভাযা আর জাদ ভিদিরেত্তুন্ মানুচ্চুনে সাড়ে তিন দিন ধুরিনে সেই মরা-কিয়্যেগানি দেগিবাক্।

¹⁰ তারা সিগুনোর্ কিয়্যেগানি গোরত্ দিবাত্যে ন-দিবাক্। তারা মুরি যেয়োন বিলিনে যিগুনে এ পিত্‌থিমীর সিগুনে হুজি অবাক্ আর ফুত্তি গুরিবাক্। মানুচ্চুনে একজন আরেকজনরে বক্‌শিজ্ পাধেবাক্, কারন যিগুনে এ পিত্‌থিমীর তারা এই দ্বিজন ভাববাদীত্যে দুঘ্ পেইয়োন।

¹¹ মাত্তর্ এই সাড়ে তিন দিন পরে গোজেনর্ দিয়্যে পরাণ-বৈয়্যেরান তারা ভিদিরে সোমেল। সেক্কে তারা টেঙত্ ভর্ দিইনে থিয়েলাক্। সেক্কে যিগুনে তারারে দেগিলাক্ সিগুনে ভারী দোরেলাক্।

¹² যেরেদি সেই দ্বিজন সাক্ষী স্বর্গত্তুন্ দাঙর্ গুরি কোইয়্যে এ কধাগান শুনিলাক্, “ইধু উদি এজঅ।” সেক্কে তারা তারার্ শত্রুগুনোর চোগো মুজুঙোত্ এক্কান মেঘত্ গুরিনে স্বর্গত্ উদি গেলাক্।

¹³ সেই অক্তত্ যদবদে ভূজোল্ বেলঅ আর সেই শঅরর্ দশ ভাগর এক ভাগ ভাঙি পড়ি গেলঅ। সেই ভুজোলত্ সাত আজার মানুচ্‌ মুরি গেলাক্। সিয়েন্দোই বাদবাগী বেক্কুনে দোরেইনে স্বর্গর্ গোজেনরে বাঈনী গরা ধুরিলাক্।

¹⁴ এবাবোত্যেগুরি দ্বি-লম্বর দজাগান থুম্ অলঅ। চাহ্, যাদিমাদি তিন-লম্বর দজাগান এজের্।

সাত-লম্বর তূরী

¹⁵ যেরেদি সাত-লম্বর স্বর্গদূত্‌তো তা তূরীবো বাজেল। সেক্কে স্বর্গত্ দাঙর্ দাঙর্ গুরিনে কুয়ো অলঅ, “জগদর্ রেজ্যগান ইক্কিনে আমার প্রভু আর তার্ মশীহর ওইয়্যে।

¹⁶ তে উমর সং রাজাগিরি গুরিবো।” যে চব্বিচ্‌জন নেতা গোজেন মুজুঙোত্ তারার সিংহাসন উগুরে বৈ এলাক্ তারা মাঢা নিগুরিনে গোজেনরে সালাম গুরিনে কলাক্,

¹⁷ “বেগত্তুন্ খেমতাবলা প্রভু গোজেন, তুই আঘচ্ আর তুই আগে এলে। আমি তরে ভালেদি জানেই, কিত্যেই তুই তর্ দাঙর্ খেমতালোই রাজাগিরি গত্তে আরাম্ভ গোজ্জ্যস্।

¹⁸ বেক্‌ জাদ্‌তুনে রাগ গোজ্জ্যন্, আর তর্ রাগ ফগদাং গুরিবার সময় ওইয়্যে। মরাগুনোরে বিচের্ গুরিবার সময় এচ্চ্যে, আর তর্ চাগরুনোর্, অত্তাৎ ভাববাদীগুনোর আর তঅ মানুচ্চুনোর আর চিগোন-দাঙর্ যিগুনে তরে ভোক্তি গরন্ তারারে বক্‌শিজ্ দিবার সময় এচ্চ্যে। ইয়েনিবাদে যিগুনে পিত্‌থিমীর ক্ষোতি গোজ্জ্যন্, সিগুনোরে ভস্ত গুরিবার সময় এচ্চ্যে।”

¹⁹ সে পরেদি স্বর্গর উবোসনা ঘরান্ খুলো অলঅ আর সিধু গোজেনর্ বেবস্থা-সিন্দুক্‌কো দেগা গেলঅ। সেক্কে ঝিমিলেনি আর দর্‌গরেপারা রঅ আহ্ দেবা পেরাগ, ভূজোল্ আর জদবদে শিলোঝড় উয়ো ধুরিলো।