ফগদাং পেইয়্যে 10 - Chakma Bible

স্বর্গদূত্ আর সেই চিগোন বোইবো

¹ সে পরেদি মুই আর এক্কো খেমতাবলা স্বর্গদূতোরে স্বর্গত্তুন্ লামি এত্তে দেগিলুং। তা পজাগ্‌কান এলঅ মেঘ, আর তা মাঢাবো উগুরে এলঅ রান্‌জনীগান। তা মুয়োন বেলান ধোক্ক্যেন আর তা টেঙানি এলঅ আগুনো টুনি ধোক্ক্যেন।

^2-3 তা আঢত্ এক্কো মেল্ল্যে চিগোন বোই এলঅ। তে তার্ ডেন্ টেঙান দোজ্জ্যে সাগর উগুরে আর বাঙ্ টেঙান মাদি উগুরে থোইনে সিংহ গুজুরোনি ধোক্ক্যেন দাঙর্ গুরি রঅ ছাড়িলো। তার্ রঅ ছাড়ানার্ লগে লগে সাত্‌টো দেবা পেরাগ্ পড়েদে ধোক্ক্যেন রঅ অলঅ।

⁴ যেক্কে সাত্‌টো দেবা পেরাগ পড়েদে আবাজ্ অলঅ সেক্কে মুই লিগিবাত্যে যুক্কোল অলুং। মাত্তর্ স্বর্গত্তুন্ মরে এ কধাগান কুয়ো অলঅ, “সাত্‌টো দেবা পেরাগ্ যে কধাগান কলঅ সিয়েন গুমুরোত্ থঅ, ন-লিগিচ্।”

⁵ যে স্বর্গদূত্‌তোরে মুই দোজ্জ্যে সাগর আর মাদি উগুরে থিয়্যেই থাগদে দেক্ক্যং তে তার্ ডেন্ আঢ্‌তান স্বর্গর্ ইন্দি তুলিলো।

⁶ যিবে উমর সং জেদা আঘে আর আগাজ্, পিত্‌থিমী, দোজ্জ্যে সাগর আর সিয়েনি ভিদিরে যিয়েনি আঘে সিয়েনি সৃট্টি গোজ্জ্যে, তা নাঙে শমক্ খেইনে সেই স্বর্গদূত্‌তো কলঅ, “আর দেরি ন-অবঅ।

⁷ মাত্তর্ সাত-লম্বর স্বর্গদূত্‌তো তা তূরীবো বাজেবার দিনোত্ গোজেনর্ গুমুরো উদ্দেচ্চ্যগান পরিপূরোণ অবঅ। গোজেনে তা নিজো চাগরুনো ইধু, অত্তাৎ ভাববাদীগুনো ইধু যিয়েনি জানেয়্যে ঠিগ্ সেবাবোত্যে গুরি ইয়েনি অবঅ।”

⁸ যিবেরে মুই স্বর্গত্তুন্ কধা কধে শুন্ন্যং তে আরঅ মরে কলঅ, “যে স্বর্গদূত্‌তো দোজ্জ্যে সাগর আর মাদি উগুরে থিয়্যেই আঘে তাইধু যেইনে তা আঢত্তুন্ মেল্ল্যে বোইবো লঅ।”

⁹ সেক্কে মুই সেই স্বর্গদূত্‌তো ইধু যেইনে সেই বোইবো মরে দিবাত্যে কলুং। তে মরে কলঅ, “ইবে লোইনে হেই ফেলা। তঅ পেট্‌তোরে ইবে তিদে বানেব, মাত্তর্ মুয়োত্ মধু ধোক্ক্যেন মিধে লাগিবো।”

¹⁰ সেক্কে স্বর্গদূত্‌তো আঢত্তুন্ মুই সেই চিগোন বোইবো লোইনে হেই ফেলেলুং। মঅ মুয়োনত্ সিবে মধু ধোক্ক্যেন মিধে লাগিলো, মাত্তর্ হেই ফেলানার্ পরেদি মঅ পেট্‌তো তিদে ওই গেলঅ।

¹¹ সে পরেদি মরে এ কধাগান কুয়ো অলঅ, “তরে আরঅ ভালোক্কানি দেশ্, জাত্, ভাযা আর রাজা পৌইদ্যেনে ভবিচ্চদর্ কধা কুয়ো অবঅ।”