ফগদাং পেইয়্যে 1 - Chakma Bibleযোহন ইধু গোজেনর্ ফগদাং পেইয়্যে কধানি 1 এ বোইবো ভিদিরে যিয়েনি লেগা ওইয়্যে সিয়েনি যীশু খ্রীষ্টই ফগদাং গোজ্জ্যে। ইয়েনি বেক্কানি গোজেনে খ্রীষ্ট ইধু ফগদাং গোজ্জ্যে, যেন যেদক্কানি ঘটনা কয়েকদিনো ভিদিরে খামাক্কায় ঘুদিবাত্যে যার্ সিয়েনি তে তার চাগরুনোরে জানায়। খ্রীষ্ট তার দূত্তো পাধেইনে তার চাগর যোহনরে ইয়েনি বেক্কানি জানেয়্যে। 2 গোজেনর্ কধানি আর যীশু খ্রীষ্টর সাক্ষ্যগানি পৌইদ্যেনে যোহনে যিয়েনি দেক্ক্যে, সিয়েনি বেক্কানি পৌইদ্যেনে তে ইয়েনত্ সাক্ষ্য দিয়্যে। 3 গোজেনর্ কধানি যিয়েনি ইয়েনত্ লেগা ওইয়্যে, যিবে সিয়েনি পড়ে তে বর্পেইয়্যে আর যিগুনে সিয়েনি শুনোন্ আর পালন গরন সিগুনেয়ো বর্পেইয়্যে, কিয়া সময়ান কায়কুরে লুম্মেগি। পাত্তুরুতুরু 4-5 মুই যোহন এশিয়া রেজ্যর্ সাত্টো মন্ডলী ইধু লেগঙর্। যিবে আঘে, যিবে এলঅ আর যিবে এজের্ তে আর তা সিংহাসনান মুজুঙোত্ যে সাত্টো আত্মা থায় সিগুনে আর যীশু খ্রীষ্ট তমারে দোয়্যে গোরোক্ আর শান্তি দান গোরোক্। যীশুই বিশ্বেজি-সাক্ষী আর মরণত্তুন্ তেয়ই পত্তমে জেদা ওই উঠ্যে, আর তেয়ই পিত্থিমীর রাজাগুনোর শাসনগুরিয়্যে। তে আমারে কোচ্পায় আর নিজোর্ লো-গান্দোই পাপত্তুন্ আমারে উদ্ধোর্ গোজ্জ্যে। 6 তে আমারে নিইনে এক্কান রেজ্য বানেয়্যে আর তার বাব আর গোজেনর্ সেবাত্যে ধর্মগুরু বানেয়্যে। উমরত্যে যীশু খ্রীষ্টর নাঙে বাঈনী ওক্ আর উমরত্যে তা খেমতাগান থোক্। আমেন। 7 চঅ, তে মেঘ সমারে এজের্। পত্তিজনর্ চোগেদি তারে দেগিবাক্; যিগুনে তারে পেরেক্ মাজ্জ্যন্ তারায়ো দেগিবাক্ আর পিত্থিমীর বেক্ জাদ্তুনে তাত্যেই গুজুরি গুজুরি কানিবাক্। সিয়েনই ওক্, আমেন। 8 প্রভু গোজেনে কত্তে, “মুয়ই সেই আল্ফা আর ওমিগা যিবে আঘে, যিবে এলঅ আর যিবে এজের্। মুয়ই বেগত্তুন্ খেমতাবলা।” যোহনে খ্রীষ্টরে দেগিলো 9 মুই তমার ভেই যোহন; যীশু লগে মিজেইনে মুই তমা লগে একই দুঘ্, একই রেজ্য আর একই ধৈজ্জ্যর্ ভাগী ওইয়োং। গোজেনর্ কধানি আর যীশুর সাক্ষ্যগানি ফগদাং গোজ্জ্যং বিলিনে মরে পাট্ম দ্বীবোত্ নেযেইনে থুয়ো ওইয়্যে। 10 প্রভুর দিনোত্ পবিত্র আত্মাগানে মরে পরিচালনা গোজ্জ্যে। এন্ সময়োত্ মঅ পিজেদি তূরীর রঅ ধোক্ক্যেন একজনর দাঙর্ রঅ শুনিলুং। 11 তে মরে কলঅ, “যিয়েন দেগিবে সিয়েন এক্কো বোইয়োত্ লেখ্, আর সিয়েন ইফিষ, স্মুর্ণা, পর্গাম, থুয়াতীরা, সার্দ্দি, ফিলাদিল্ফিয়া আর লায়দিকেয়া-এ সাত্টো শঅরর্ সাত্টো মন্ডলী ইধু পাধেই দে।” 12 যিবে কধা কোইয়্যে তারে চেবাত্যে মুই ঘুরিনেই থিয়্যেলুং আর সনার সাত্টো চেরাগটগ্ দেগিলুং। 13 সেই চেরাগ টগ্কুনোর সংমোধ্যে মান্জ্যপুয়োবো ধোক্ক্যেন কেঅ একজন এলঅ। তার্ কিয়্যেত্ টেং সং লাম্বা পজাক্ এলঅ আর তা বুগোত্ সনার্ ফিটে বান্ন্যে এলঅ। 14 তা মাঢাবোর চুলানি ভেড়া কেজর্ আর বরফ ধোক্ক্যেন ধূব্ এলঅ আর তা চোগ্কুন আগুনো জিলো ধোক্ক্যেন এলঅ। 15 তা টেঙানি এলঅ আগুনোত্ পুড়িনে সাব্ গোজ্জ্যে ভারী চক্চোক্ক্যে পিদোল ধোক্ক্যেন, আর তার মুয়ো রবুয়ো এলঅ জুরে বেঈ যেইয়্যে গঙার আবাজ ধোক্ক্যেন। 16 তে তার্ ডেন্ আঢেদি সাত্টো তারা ধুরি থোইয়্যে আর তা মুয়োত্তুন্ এক্কান ধার্ ছুরি নিগিলি এজের্ যিয়েনর্ দ্বিয়ো কিত্ত্যেদি ধার্ এলঅ। ভারী তেজে জ্বোল্জোল্ল্যে বেলান ধোক্ক্যেন তা মুয়ো চেঙারাগান এলঅ। 17 তারে দেগিনে মুই মরা ধোক্ক্যেন তা টেঙ কুরে পড়িলুং। সেক্কে তে তার্ ডেন্ আঢ্তান মঅ উগুরে থোইনে কলঅ, ন-দোরেচ্। মুয়ই পত্তম আর থুম্, 18 মুয়ই উমরত্যে জেদা। মুই মোজ্জ্যং আর চঅ, ইক্কিনে মুই যুগ যুগ ধুরিনে উমরত্যে জেদা আঘং। মইধু মরণান্ আর মরণ জাগার চাবি আঘে। 19 ইয়েনত্যে তুই যিয়েনি দেগিলে, যিয়েনি ইক্কিনে ঘদের্ আর ইয়েনির্ পরেদি যিয়েনি ঘুদিবো সিয়েনি লিগি থঅ। 20 যে সাত্টো সনার চেরাগ টগ্ আর মঅ ডেন্ আঢেদি যে সাত্টো তারা তুই দেগিলে সিয়েনর্ গুমুরো অত্তগান ইয়েন-সেই সাত্টো তারা অলঅ সেই সাত্টো মন্ডলীর সাতজন দূত আর সাত্টো চেরাগ টগ্ অলঅ সেই সাত্টো মন্ডলী। |
Copyright © 2021 Bangladesh Bible Society
Bangladesh Bible Society