গীতসংহিতা 99 - Chakma Bible

¹ লগেপ্রভুই রাজা; বেক জাদ্‌তুনে গির্‌গিরে উদোদোক্। তে স্বর্গদূত্‌তুনো উগুরে সিংহাসনত্ বুজি আঘে; পিত্‌থিমীগান টলমল গোরোক্।

² সিয়োনত্ বজত্তিগুরিয়্যে লগেপ্রভু দাঙর্; বেক জাদ্‌তুনে তা তলে।

³ সে জাদ্‌তুনে তার বাঈনী গোরোদোক্; তে দাঙর্ আর ভোক্তিবলা দর্‌বুক লাগেয়্যে গোজেন; তে পবিত্র।

⁴ যে রাজা ন্যায়বিচের কোচ্‌পায় তা খেমতাগানরে তুয়ই অদে অদে রাগেয়োচ্, যেনে তে গমেডালে বিচের গুরি পারে। তুয়ই যাকোব বংশ ইদু ন্যায়বিচের আর ধর্মগান অদে অদে রাগেয়োচ্।

⁵ আমা গোজেন লগেপ্রভুর বাঈনী গর; তা টেঙ্ থইদ্যে মুজুঙোত্ মাদা নিগিরিনে তারে জু জু জান; তে পবিত্র।

⁶ তা ধর্মগুরুগুনোর্ ভিদিরে অলাক্ মোশি আর হারোণ; যিগুনে তাইদু তবনা গুরিদাক্ তারার ভিদিরে এলদে শমূয়েল। মোশি, হারোণ আর শমূয়েলে লগেপ্রভুরে ডাগিদাক্ আর তে তারারে জোব্ দিদো।

⁷ তে মেঘ চাগত্তুন্ তারা সমারে কধা কদঅ; তারা তার কধানি আর তার দিয়্যে উগুমানি পালেদাক্।

⁸ ও আমা গোজেন লগেপ্রভু, তুই তারার ডাগনিলোই শমক্ দিদে; তুই তারার খেমাগুরিয়্যে গোজেন ইজেবে এলে, যুনিয়ো তারার অন্যেয়র সাজা দিবাত্তে তুই ন-ছাড়স্।

⁹ সেনত্তে আমা গোজেন লগেপ্রভুর বাঈনী গরঅ; তা পবিত্র মুড়োবোর মুজুঙোত্ তারে শ্রদ্ধা জানঅ, কিত্তে আমা গোজেন লগেপ্রভু পবিত্র।