গীতসংহিতা 98 - Chakma Bibleএক্কো গান। 1 তুমি লগেপ্রভুর নাঙে নুয়ো গীদ্ গঅ, কিত্তে তে ভালোক্কানি আমক্ অবার কাম গোজ্যে; তার খেমতা, অয়, তার পবিত্র দাঙর্ খেমতালোই তে উদ্ধোর্ গোজ্যে। 2 লগেপ্রভু তার উদ্ধোরর্ কামানি দেগেই দিয়্যে; বেক জাদ্তুনোর ইদু তার ন্যায়র কামানি ফগদাং গোজ্যে। 3 ইস্রায়েল জাদ্তুনোত্যে তার অমকদ কোচ্পানা আর বিশ্বেজর কধা তে মনত্ রাগেয়্যে; আমা গোজেন উদ্ধোরর্ কামানি পিত্থিমীর বেক মানুচ্চুনে দেখ্যন্। 4 পিত্থিমীর বেক মানুচ্চুন্, তুমি লগেপ্রভুর নাঙে রঙ্গ-ফুত্তি গরঅ; হুজিয়্যে-গীদে রঅ ছাড়িনে নাং গিনেদে গীদ্ গঅ। 5 বীণা বাজেইনে আর দোল্ সুরে লগেপ্রভুর নাঙে নাং গিনেদে গীদ্ গঅ। 6 তূরী বাজেইনে আর শিংগার রবোলোই রাজা লগেপ্রভুর মুজুঙোত্ হুজিয়ে রঅ ছারঅ। 7 সাগর আর সাগর ভিদিরে বেক্কানিয়ে হুজিয়ে রঅ ছাড়দোক্; পিত্থিমী আর পিত্থিমীত্ বজত্তিগুরিয়্যেগুনে হুজিয়ে রঅ ছাড়দোক্। 8 বেক ছড়া-গাঙানিয়ে ফুত্তি গোরোক্; মুড়ো-মুড়ি একসমারে মিজেইনে হুজিয়ে গীদ্ গাদোক্। 9 লগেপ্রভুর মুজুঙোত্ তারা সিয়েন গোরোদোক্, কিত্তে তে দুনিয়েত্ বিচের গুরিবাত্যে এজের্। তে দোলেদালে পিত্থিমীগানর বিচের গুরিবো, আর জাদ্তুনোর বিচের গুরিবো গমেডালে। |
Copyright © 2021 Bangladesh Bible Society
Bangladesh Bible Society