গীতসংহিতা 97 - Chakma Bible

¹ লগেপ্রভুই রাজা, পিত্‌থিমীগানে ফুত্তি গোরোক্, দূরোর গূণি ন-পুরেইয়্যে থল্ মুড়োগুনে হুজি ওক্।

² তার চেরোকিত্তে মেঘে আর আন্ধারে ঘিরে; ধর্ম আর দোল্‌বিচেরর্ উগুরে তার সিংহাসনান্ থিয়্যেই আঘে।

³ তা আগ্‌মলিম আগুনানে যার্; সেই আগুনানে তা চেরোকিত্যে বেক শত্রুগুনোরে পুড়ি ফেলেয়্যে।

⁴ তা কারেন্টর্ ঝিমিলেনিয়ে দুনিয়েগান পহর্ অলঅ; সিয়েন দেগিনে পিত্‌থিমীগান গির্‌গিরে উদিলো।

⁵ লগেপ্রভুর মুজুঙোত্, বেক দুনিয়েগান প্রভুর মুজুঙোত্ মুড়ো-মুড়ি মুম ধোক্ক্যেন গুলি যেইয়্যে।

⁶ দেবাবো তার ন্যায়র কধা ফগদাং গোজ্যে, আর বেক জাদ্‌তুনে তার বাঈনী গরানাগান্ দেখ্যন্।

⁷ যিগুনে মূত্তিপূজো গরন আর দেব-দেবেদালোই বাড়্‌বো গরন্ তারা বেক্কুনে লাজত্ পোড়োদোক্; লগেপ্রভুর মুজুঙোত্ দেব-দেবেদাগুনে মাঢা নিগিরোদোক্।

⁸ ও লগেপ্রভু, তর্ ন্যায়বিচেরর কধা শুনিনে সিয়োনানে হুজি ওইয়্যে, যিহূদার আদামানিয়ে হুজি ওইয়্যে।

⁹ ও লগেপ্রভু, তুই বেক দুনিয়েগানর দাঙর্ গোজেন; বেক দেবেদাগুনোত্তুন্ ভালোদ্দুর্ উগুরে তর্ জাগায়ান।

¹⁰ যিগুনে লগেপ্রভুরে কোচ্‌পান তারা অন্যেয়ানরে ঘিনাদোক্; তেয়ই দঅ তা ভক্তগুনোর্ পরাণানি রোক্ক্যে গরে আর পাজিগুনোর আঢত্তুন্ তারারে উদ্ধোর্ গরে।

¹¹ গোজেন ভক্তগুনোর্ জিংকানিত পহর্ দিয়্যে অয়, আর যিগুনোর মনানি দোল্ তারার জিংকানিত্ হুজি দিয়্যে অয়।

¹² ও গোজেনভক্ত মানুচ্চুন্, লগেপ্রভু যেন তমার হুজির বেপার অয়। তুমি তার পবিত্রতাগানর বাঈনী গরঅ।