গীতসংহিতা 96 - Chakma Bible

¹ তুমি লগেপ্রভুর নাঙে নুয়ো গীদ্ গঅ; পিত্‌থিমীর বেক মানুচ্চুন্, তুমি লগেপ্রভুর নাঙে গীদ্ গঅ।

² লগেপ্রভুর নাঙে গীদ্ গঅ, তার বাঈনী গরঅ; তার দিয়্যে উদ্ধোরর্ কধা দিন্‌কে দিন ফগদাং গরঅ।

³ নানান্ জাদর ইদু তার মহিমার কধানি ফগদাং গরঅ; বেক মানুচ্চুনো ইদু তার বেক আমক্ অবার কামানি ফগদাং গরঅ।

⁴ লগেপ্রভুই দাঙর্ আর বেক্কুনো উগুরে নাঙ্ গিনিবার্ যোগাজ্যে; বেক দেব-দেবেদাগুনোত্তুন্ তে বেশ্ দর্‌বুক্ লাগেদ।

⁵ নানান্ জাদর দেব-দেবেদাগুনে বাজে ধরনর, মাত্তর্ লগেপ্রভু দাঙর্ আগাজ্‌চান্ বানেয়্যে।

⁶ তারেই ঘিরি আগেদে বাঈনী আর মহিমাগানে; তার সুদ্ধো-সাংগ ঘরানত্ আগেদে খেমতা আর দোল।

⁷ ও নানান্ জাদর বেক গুট্টিগুন, স্বিগের্ গরঅ বাঈনী আর খেমতা লগেপ্রভুর।

⁸ তুমি স্বিগের্ গরঅ বেক্ বাঈনী পানাগান্ লগেপ্রভুর; উৎসর্বর পযাপিরালোই তা উদোনত্ এজঅ।

⁹ লগেপ্রভুর মহিমাবলা পবিত্রগানর কধা ভাবিনে তারে শ্রদ্ধা জানঅ; পিত্‌থিমীর বেক মানুচ্চুন্, তুমি তা মুজুঙোত্ গির্‌রে উদো।

¹⁰ নানান্ জাদর ইদু ফগদাং গরঅ, “লগেপ্রভুই রাজা। পিত্‌থিমীগান দরমরগুরি থিদেবর্ অলঅ, সিয়েন কনদিন্‌অ ন-লুড়িবো; তে গমেডালে বেক জাদ্‌তুনোরে শাজন্ গুরিবো।”

¹¹ আগাজ্‌ছানে হুজি ওক্, পিত্‌থিমীগানে হুজি ওক্; সাগর আর সে ভিদিরে যিদুক্কুন আগন্ বেক্কানিয়ে গুজুরি উদোক্;

¹² মাদত্ আর তা ভিদিরে যেদক্কানি আঘে বেক্কানিয়ে হুজি ওক্। সালে ঝাড়র বেক গাজ-বাশছুনেয়ো হুজিয়ে গীদ্ গেবাক্;

¹³ তারা লগেপ্রভুর মুজুঙোত্ গীদ্ গেবাক্, কিত্তে তে এজের্। তে দুনিয়েগানর বিচের গুরিবাত্তে এজের্। তে গমেডালে পিত্‌থিমীগানর বিচের গুরিবো, আর জাদ্‌তুনোর বিচের গুরিবো বিশ্বেজ্ গুরিনে।