গীতসংহিতা 92 - Chakma Bible

এক্কো গান। জিরেবার দিনোত্যে এক্কো গীদ্।

^1-3 ও লগেপ্রভু, দাঙর্ গোজেন, দশতারা আর হার্‌মোনি বাজেইনে আর বাশিলোই তরে ভালেদি জানানা, তর্ নাঙ্-গিনেদে গান গরানা, বেন্যেমাদান্ তর্ অমকদ কোচ্‌পানার কধা আর রেদোত্ তর বিশ্বেজর্ কধা ফগদাং গরানা কদক্ হুজির কধা!

⁴ ও লগেপ্রভু, তর্ কামানিয়ে মরে হুজি গোজ্যে; তর্ বেক কামানিত্যে মুই হুজিয়ে গীদ্ গেম্।

⁵ ও লগেপ্রভু, তর্ বেক কামানি কেজান্ দোল্ আর তর্ চিন্তেগান কত্তমান্ গভিন!

⁶ যিবের মনান্ বাজে তে সিয়েন হবর্ ন-পায়; যিবের মনত্ বিবেচনা নেই তে সিয়েন বুঝি ন-পারে।

⁷ পাজি মানুচ্চুনে যুনিয়ো ঘাস ধোক্ক্যেন্ যাদি দাঙর অন্ আর অন্যেয়গুরিয়্যেগুনে যাদিমাদি ফুলি উদোন্, তো তারা উমরত্যে ভস্ত ওই যেবাক্।

⁸ মাত্তর্ ও লগেপ্রভু, তুই উমর সং বেক্কুনো উগুরে থেবে।

⁹ ও লগেপ্রভু, তর্ শত্রুগুনে ভস্ত ওই যেবাক্, অয়, তারা ভস্ত ওই যেবাক্; অন্যেয়গুরিয়্যেগুনে বেক্কুনে ছিদি পড়িবাক্।

¹⁰ ঝাড় গোরুর অজল্ শিং ধোক্ক্যেন্ তুই মর্ মাঢাবো অজলত্ তুল্যচ্; হুজিয়ে মঅ উগুরে নুয়ো তেল ঢালি দিয়্যে ওইয়্যে।

¹¹ মর্ শত্রুগুনোর উদি যানা মুই নিজোর চোগেন্দি দেখ্যং; যিগুনে মর্ বিরুদ্ধে লাক্ক্যন্ সেই পাজি মানুচ্চুনোর কানানি মুই নিজো কানে শুন্যং।

¹² গোজেন ভক্তগুনে খাজোর গাজ ধোক্ক্যেন্ ফুলে-গুলোগুলিয়ে ভুরি উদিবাক্; তে লেবাননর্ এরস গাজ ধোক্ক্যেন দাঙর্ অবাক্।

¹³ আমা গোজেন লগেপ্রভুর ঘরত্ যিগুনোর লাগা ওইয়্যে তারা তা উদোনত্ দাঙর্ অবাক্।

¹⁴ শেজ্ বয়জত্‌অ তারা ফল দিবাক্; তারা রসিক্ আর ফোত্‌পোত্যে অবাক্।

¹⁵ সিয়েন্দোই ফগদাং অবঅ, লগেপ্রভু ন্যায়বলা; তেয়ই মর্ বল্, তাইদু কনঅ অন্যেয় নেই।