গীতসংহিতা 91 - Chakma Bible

¹ দাঙর্ গোজেনর আশ্রয়ত্ যে বজত্তি গরে তে বেগত্তুন্ খেমতাবানর ছাবাত্ থায়।

² লগেপ্রভুর পৌইদ্যেনে মুই এ কধাগান্‌ কোম্, “তেয়ই মর্ আশ্রয় আর মর্ ঘর; তেয়ই মর্ গোজেন যিবে উগুরে মুই বিশ্বেজ্ গরং।”

³ তে তরে শিগেরিগুনোর ফালত্তুন্ আর মরেদে ভানা (সাজুরেদে পীড়ে) আঢত্তুন্ রোক্ষ্যে গুরিবো।

⁴ তার ডুয়োনিলোই তে তরে ঢাগি রাগেব, তার ডুয়োগানির তলে তুই আশ্রয় পেবে; তার বিশ্বেজ্‌ছান তর্ ঢাল আর কিয়্যে রোক্ষ্যেগুরিয়্যে ঢাল অবঅ।

⁵ রেদোত্ দজা আর দিনোর আক্রমণানরে তুই ন-দোরেবে;

⁶ ন-দোরেবে আন্ধারর্ ঘুদি যেইয়্যে ভানাগানরে (সাজুরেদে পীড়ে) বা দিবুজ্যে ভস্তগুরিয়্যে আঘাত্‌তানরে।

⁷ অয়ত তর্ এককিত্তেন্দি পুরিবো আজার জন, আর দশ আজার পুরিবাক্ ডেন আঢেন্দি, মাত্তর্ ইগুনে তইদু ন-এবাক্।

⁸ পাজি মানুচ্চুনে কেজান্ পাওনা পান তুই বানা সিয়েন চোগেন্দি দেগিবে।

⁹ “ও লগেপ্রভু, তুয়ই মর্ আশ্রয়র জাগা।” তুই ঠিগ্ গোজ্যস্‌ছে দাঙর্ গোজেনে তর থেবার জাগা;

¹⁰ সেনত্তে তর্ কনঅ সর্বনাশ ন-অবঅ, তঅ ঘর উগুরে কনঅ আঘাত্ ন-পুরিবো;

¹¹ কিত্তে তে তার দূত্‌তুনোরে তঅ পৌইদ্যেনে উগুম দিবো যেন বেক্কানিত্তুন্ তারা তরে রোক্ষ্যে গরন্।

¹² তারা আঢ্‌তোই তরে ধুরিবাক্ যেনে তঅ টেঙত্ শিলো আঘাত্ ন-লাগে।

¹³ তুই সিংহ আর আজাব সাব উগুরেন্দি আঢি যেবে, দামারা সিংহ আর সাপ্‌পোরে টেঙোই দুলি পারিবে।

¹⁴ লগেপ্রভু কোইয়্যেদে, “কোচ্‌পানালোই যে মরে আজাবোধে ধোজ্যে, তারে মুই রোক্ষ্যে গুরিম; মুই তারে দজাত্ ন-ফেলেম, কিত্তে তে মরে ঘেচ্ছেক্‌গুরি চিন্যে।

¹⁵ তে মরে ডাগিলে মুই তারে শমক্ দিম; দযাত্ মুই তা সমারে থেম্; তারে মুই রোক্ষ্যে গুরিম আর সর্মানর জাগা দিম্।

¹⁶ বোউত্ আয়ুলোই মুই তারে হুজি গুরিম; মর্ উদ্ধোরর্ কামানি মুই তারে দেগেম।”