গীতসংহিতা 9 - Chakma Bible

গান পরিচালগত্তে। সুর-“পুয়োবোর মরণান।” দায়ূদোর গান।

¹ ও লগেপ্রভু, মঅ বেক্ মনান্দোই মুই তরে বাঈনী গুরিম আর তর্ বেক্ আমক্ অইদে কামর্ কধানি কোম।

² তরে নিইনে মুই হুজি থেম্ আর ফুত্তি গুরিম। ও দাঙর্ গোজেন, মুই তর্ নাঙ্ গিনেদে গান গেইম্।

³ মর্ শত্রুগুনে ফিরি যেইয়োন্; তঅ মুজুঙোত্ তারা পড়ি যেয়োন্ আর ভস্ত ওই যেইয়োন;

⁴ কিয়া তুই মঅ বিচের্ গুরিনে মঅ পক্ষেদি রায় দুয়োচ্; তর্ সিংহাসনত্ বোইনে তুই ন্যায়বিচের্ গোজ্যস্।

⁵ তুই অন্য জাদ্‌তুনোরে ওদেই দুয়োচ্ আর পাজিগুনোরে ভস্ত গোজ্যস্; তারার্ নাঙানি তুই উমরত্যে বাদ্ দুয়োচ্।

⁶ শত্রুগুনে উমরত্যে ভস্ত অনার্ মুয়োত্ পোজ্যন্; তারার্ শঅরানি তুই উগুরেনে ফেলেই দুয়োচ্; তারার্ নাঙানিয়ো বাদ্ যেয়েগোই।

⁷ লগেপ্রভু জিংকানিবর্ রাজাগিরি গরে; তে বিচেরর্ সিংহাসনান্ থিদেবর্ গোজ্যে।

⁸ তে গমেডালে সংসারর্ বিচেরানি গুরিবো, গমেডালে বেক্ জাদ্‌‌তুনোরে শাজন্ গুরিবো।

⁹ যিগুনে অত্যেচারত্ পড়ি আগন্ লগেপ্রভু যেন তারার্ আশ্রয় অয় আর দুঘোত্ ঘর ধোক্ক্যেন অয়।

¹⁰ যিগুনে তরে হবর্ পান তারা যেনে তঅ উগুরে বিশ্বেজ্ গরন্, কিয়া ও লগেপ্রভু, যিগুনে তরে গভিন্ গুরিনে জানিবাত্তে চান্ তারারে তুই কনদিন্‌‌অ ছাড়ি ন-যাজ্।

¹¹ লগেপ্রভু সিয়োনত্ আঘে; তুমি তার্ নাঙ্ গিনেদে বাবোত্যে-গান গঅ। তে যিয়েনি গোজ্যে সিয়েনি অন্য জাদ ইদু ফগদাং গরঅ;

¹² কিয়া যিবে লো ঝরানার্ হেনা সুজে তে মারে ফেলেয়্যে মানুচ্চুনোরে ভুলি ন-যায়, দুঘি মানুচ্চুনোর্ কানানিগানি তে এলাফেলা ন-গরে।

¹³ ও লগেপ্রভু, মঅ উগুরে দোয়্যে গর্; চাহ্, মঅ শত্রুগুনে কিবাবোত্যে গুরিনে মরে অত্যেচার গত্তন্। মরণর্ দোরোত্তুন্ তুই মরে তুলি আন্,

¹⁴ যেনে সিয়োন্ শহরর্ গেদ্‌‌তুনোত্ মুই তর্ বাঈনী ফগদাং গুরি পারং, তর্ দিয়্যে উদ্ধোরান্ পেইনে ফুত্তি গুরি পারং।

¹⁵ অন্য জাদ্‌তুনে নিজে খুজ্যে গাদত্ পত্তন্দোই; তারার্ লুগেয়্যে জালত্ তারা টেঙানি আক্‌‌সো যেইয়্যে।

¹⁶ দোল্ বিচেরর্ মাধ্যমে লগেপ্রভু নিজোরে জানিবাত্তে দে; তে পাজিগুনোরে তা কামর্ ফালত্ ফেলায়।

¹⁷ যিদুক্কুন জাদে গোজেনরে ভুলি যান্ সেই পাজিগুনে মুরিনে গোরত্ যেবাক্।

¹⁸ নাদা মানুচ্চুনোরে উমরত্তে ভুলি গেলে ন-অবঅ; তারার্ আজানি কনদিন্‌‌অ পূরোণ ন-থেবঅ।

¹⁹ ও লগেপ্রভু, তুই উঠ্, মান্‌‌জ্যরে তঅ উগুরে জিদিবাত্তে ন-দিচ্; তঅ মুজুঙোত্ অন্য জাদ্‌‌তুনোর্ বিচের্ ওক্।

²⁰ ও লগেপ্রভু, তারার্ মনত্ দর্‌বুগ্ লাগেই দে, অন্য জাদ্‌‌তুনে হবর্ পাদোক্, তারা বানা মানুচ্।