গীতসংহিতা 89 - Chakma Bibleইষ্রাহীয় এথনর দুঘোত্ তবনার-গান। 1 মুই জিংকানিবর লগেপ্রভুর অমকদ কোচ্পানার গান গেম্; বংশর পর বংশ ধুরিনে বেক্কুনো মুজুঙোত্ তর্ বিশ্বেজর্ কধা জানেম। 2 মুই ফগদাং গুরিম, তর্ কোচ্পানার কামানি জিংকানিবর্ ধুরিনে বাড়ের্; তর্ বিশ্বেজ্ছান স্বর্গত্ তুই থিদেবর্ গোজ্যস্। 3 তুই কোইয়োচ্যে, “মর্ বেঈ লোইয়্যে মানুচ্চোত্যে মুই এক্কান্ সুদোম থিদেবর্ গোজ্যং; মর্ চাগর দায়ূদো ইদু মুই এ শমক্তান্ গোজ্যং, 4 ‘তর্ বংশবোরে মুই উমরত্যে থিদেবর্ গুরিম; বংশর পর বংশ ধুরি তর্ সিংহাসনান ঠিগ্ রাগেম।’ ” 5 ও লগেপ্রভু, স্বর্গর বেক্কানি তর্ দোল্ দাঙর কামানি নাঙ্ গিনিনে, পবিত্র দূত্তুনে তর্ বিশ্বেজর বাঈনী গরন্। 6 স্বর্গ ইদু এন্ কন্না আঘে যিবেরে লগেপ্রভুর লগে সং গুরি পারে? স্বর্গদূত্তুনো ভিদিরে কন্না লগেপ্রভুর সং সং? 7 পবিত্র দূত্তুনোর তেম্মাঙত্ বেক্কুনে গোজেনরে দরান্ আহ্ ভোক্তি গরন্; তার চেরোকিত্যে বেক্কুনোত্তুন্ তেয়ই বেশ্ ভোক্তিবলা দর্ জাগায়। 8 ও লগেপ্রভু, বেগত্তুন খেমতাবলা গোজেন, কন্না আগে তঅ ধোক্ক্যেন খেমতাবলা, ও লগেপ্রভু? তর্ বিশ্বেজ্ছানে তরে ঘিরি আঘে। 9 ফুলি উঠ্যে সাগরর তুবোলানে তর্ শাজনত্ থায়; তার তুবোলান্ উদিলে তারে তুয়ই বুঝোচ্। 10 তুই রহবরে কট্টা কট্টা গুরি মারে ফেলেয়্যে মান্জ্য ধোক্ক্যেন গোজ্যস্; তর্ দরমর আঢ্তোই তর্ শত্রুগুনোরে তুই ছিদি দুয়োচ্। 11 দেবাবো তর্, দুনিয়েগান্অ তর্; এ পিত্থিমীগান আর তা ভিদিরে বেক্কানি তুয়ই থিদেবর্ গোজ্যস্। 12 উত্তোর দোগিণ তরই বানেয়্যে; তাবোর আর হর্মোণ মুড়োগুনে তরে নিইনে হুজির গীদ্ গান। 13 তঅ আঢ্তান খেমতালোই ভরা; তঅ আঢ্তানত্ আগেদে বল্, তর্ ডেন আঢ্তান বলেন্দি বোউত্ উগুরে। 14 সততা আর ন্যায়বিচের উগুরে তর্ সিংহাসনান্ থিয়্যেই আঘে; কোচ্পানা আর বিশ্বেজ্ছান তর্ আগেন্দি যায়। 15 বর্পেইয়্যে সেই মানুচ্চুন, যিগুনে সেই হুজির রগুন চিনোন্; ও লগেপ্রভু, তারা তর্ দোয়্যের চোগেদি রিনি চানালোই পহরত্ আঢাউদো গরন্। 16 গোদা দিন্নো সং তরে নিইনে তারার হুজি; তর্ সততাগানে তারারে অজলত্ তুলে। 17 তুয়ই দঅ তারার বলর্ শোভাগান; তর্ দোয়্যেলোই আমা বলর্ শিঙুন অজলত্ উদোন্। 18 আমা রাজাবোরে ইস্রায়েলর সেই সুদ্ধো-সাংগ মানুচ্চো নেযেয়্যে; আমা সেই ঢালান লগেপ্রভুর্ বেঈ লোইয়্যে। 19 একপল্লা তুই দর্শন দিইনে তর্ ভক্তগুনোরে কোইয়োচ্, মুই এক্কো বীরোরে সাহায্য গোজ্যং; মানুচ্চুনো ভিদিরেত্তুন একজনরে বেঈ নেযেইনে অজলত্ তুল্যং। 20 মর্ চাগর দায়ূদোরে মুই তোগেইনে পেয়োং; মর্ সুদ্ধো-সাংগ তেল্লোই তারে অভিষেগ্ গোজ্যং। 21 মর্ বল্ আঢ্তান তা সমারে থেবঅ; মঅ আঢ্তানে তারে বল্ দান গুরিবো। 22 কনঅ শত্রু তা উগুরে উদি ন-পারিবো; কনঅ পাজি মান্জ্যে তারে অত্যেচার গুরি ন-পারিবো। 23 তা মুজুঙোত্ মুই তা বিপক্ষগুনোরে কট্টা গুরি ফেলেম আর যিগুনে তারে ঈচ্ গরন্ তারারে আঘাত গুরিম। 24 মর্ বিশ্বেজছান আহ্ অমকদ কোচ্পানাগান তা সমারে থেবঅ; মঅ নাঙে তার বলর্ শিঙুন অজলত্ উদিবাক। 25 মুই সাগর উগুরে আর গাঙ উগুরে তারে খেমতা দিম। 26 তে মরে ডাগি কবঅ, “তুয়ই মর্ বাপ, মর্ গোজেন, মর্ রোক্ষ্যেগুরিয়্যে মুড়ো। 27 মুইয়ো তারে মর্ পত্তম পুয়ো বানেম; পিত্থিমীর রাজাগুনো ভিদিরে তারে আজল্লো গুরিম। 28 উমর সং তা উগুরে মর্ কোচ্পানা থেবঅ; তাত্ত্যেই মর্ থিদেবর্ গোজ্যে সুদোমান অদে অদে থেবঅ। 29 মুই তা বংশবোরে উমর সং থিদেবর্ গুরিম; যেদকদিন্ আগাজ্ছান থেবঅ তা সিংহাসনান্অ সেদকদিন থেবঅ। 30 তা পুয়োগুনে যুনি মঅ উগুমোত্তুন্ দূরোত্ সুরি যান আর মর্ সুদোমানি ন-মানন্, 31 যুনি তারা মঅ সুদোমান্ অমান্য গরন আর মঅ উগুমান ন-পালান্, 32 সালে বারি মারিনে মুই তারারে পাপর সাজা দিম, তারার অন্যেয়র সাজা দিম। 33 মাত্তর্ মর্ অমকদ কোচ্পানা মুই তা উগুরেত্তুন তুলি ন-নেযেম; মঅ বিশ্বেজ্ছান মিজে অবাত্তে ন-দিম। 34 মর্ থিদেবর্ গোজ্যে সুদোমান মুই ন-ভাঙিম; মঅ মুয়োনে যিয়েনি কোইয়্যে সিয়েন ন-বোদোলেম্। 35 মঅ পবিত্রতাগান শমক্ গুরি মুই একপল্লা কোই রাগেয়োং- মুই দায়ূদো ইদু কনদিন্অ মিজে কধা ন-কোম; 36 তা বংশবো উমরত্যে থেবঅ; তা সিংহাসনান্ মঅ মুজুঙোত্ বেলান ধোক্ক্যেন টিগি থেবঅ। 37 দেবাবোর বিশ্বেজর সাক্ষী চান্নো ধোক্ক্যেন্ সিবে উমরত্যে থিদেবর্ গরা অবঅ।” 38 মাত্তর্ তুয়ই ফেলেই যেয়োচ্, টেঙোই ঠেল্যচ্; তর্ অভিষেগ্ গোজ্যে মানুচ্চো উগুরে তুই অমকদ বেজার্ ওইয়োচ্। 39 তঅ চাগরবোত্যে যে সুদোমান থিদেবর্ গোজ্যস্ সিয়েন তুই টেঙোই মাজ্যচ্; তা মুকুট্তো তুই মাদিত্ ফেলেইনে অসিজি গোজ্যস্। 40 তার রোক্ষ্যে গরেদে-দেবালান্ তুই ভাঙি দুয়োচ্; তার বেক্ তাম্বুলানি ভস্ত গোজ্যস্। 41 যিগুনে তা দেজর্ কায়-কুরেন্দি যান তারা বেক্কানি লুদোন্; তার পারাল্যে জাদ্তুনোর ইদু তে ইংসে গরা হেইয়্যে ওইয়্যে। 42 তুই তার বিপক্কগুনোরে বোলী বানেয়োচ্; তার শত্রুগুনোরে হুজি গোজ্যস্। 43 তুই তার তলোয়ারান্ অকেজো গুরি দুয়োচ্; তুই যুদ্ধোত্ তারে টিগিবাত্যে ন-দুয়োচ্। 44 তার্ সয়সাগোজ্যেগান্ তুই থুম্ গুরি দুয়োচ্; তার সিংহাসনান্ মাদিত্ ফেলেই দুয়োচ্। 45 তার গাবুজ্যের্ দিনুন্ তুই কোমেই দুয়োচ্, লাজে তারে নাঢি দুয়োচ্। 46 ও লগেপ্রভু, আর কয়দিন? জিংকানিবর্ কি তুই নিজোরে লুগেই রাগেবে? আর কয়দিন তঅ রাগ্কান আগুনো ধোক্ক্যেন জুলিবো? 47 ভাবি চাহ্ মর্ জিংকানিগান কত্তমান্ চিগোন; অনত্তক্ কি তুই মান্জ্যরে বানেয়োচ্! 48 কন্না সেই বোলি মানুচ্চো, যে বাঁজি থেবঅ, ন-মুরিবো? এন্ কন্না আঘে, যে পাদালত্তুন্ নিজোরে রোক্ষ্যে গুরি পারিবো? 49 ও প্রভু, কুদু তর্ সেই পুরোণী অমকদ কোচ্পানাগান? তর্ বিশ্বেজত্তে সেই কোচ্পানার শমক্তান্ তুই দায়ূদো ইদু গোজ্যস্। 50 ও প্রভু, তর্ চাগরুনোরে যে অগমান গরা ওইয়্যে সিয়েন তুই ইদোত্ তুলি চাহ্; ইদোত্ তুলি চাহ্, অন্য জাদে গোজ্যে সেই অগমান কেধোক্ক্যেন্ গুরি মুই সোজ্য গুরি আগং। 51 ও লগেপ্রভু, তর্ শত্রুগুনে সেই অগমানান্ গোজ্যন; অগমান গোজ্যন তর্ অভিষিক্ত মানুচ্চোরে তার বেক্কানিত্। 52 জিংকানিবর্ লগেপ্রভুর বাঈনী ওক্! আমেন, আমেন। |
Copyright © 2021 Bangladesh Bible Society
Bangladesh Bible Society