গীতসংহিতা 88 - Chakma Bible

এক্কো গীদ্। কোরহর বংশর গান। গান পরিচালগর তুবোনাত্যে। সুর-“মহলৎ-লিয়ান্নোৎ।” ইষ্রাহীয় হেমনর দজাত্ তবনার-গান।

¹ ও লগেপ্রভু, মর্ উদ্ধোর গুরিয়্যে গোজেন, মুই দিনে-রেদে তইদু কানঙর্।

² তুইদু মর্ তবনাগান লুমোক্; তুই মর্ কানানিগান শুন;

³ কিত্তে মঅ মনান দুঘে ভরা; মঅ পরাণান পেরায় মরণর জাগাত্ যেয়েগোই।

⁴ যিগুনে মরণর জাগাত যেবাক্ তারাত্তুন্ মরে ধরা ওইয়্যে; বলিবন্দ ওনেয়ো যে বল্‌পোজ্যে ওইয়্যে মুই তা ধোক্ক্যেন্ ওইয়োং।

⁵ মরে যেন মরাগুনোর্ সংমধ্যে ফেলে রাগা ওইয়্যে; মুই মারে ফেলেয়্যে, গোরত্ পড়ি থেইয়্যে মানুচ্চুনো ধোক্ক্যেন্ ওইয়োং; যিগুনোর কধা তুই ইদোত্‌অ ন-রাগাচ্, যিগুনে তঅ সাহায্যত্তুন ফারগ্ ওই যেয়োন।

⁶ তুই মরে মরণর জাগাত্ বেগত্তুন তলে জাগানত্ রাগেয়োচ্, রাগেয়োচ্ আন্ধারর গভীন্ জাগানত।

⁷ তঅ রাগ্‌কান মঅ উগুরে অমকদ আঘে; তর্ বেগ রাগর টেলায় তুই মরে ভাজে নেযর্।

⁸ মঅ নিজো মানুচ্চুনোরে মত্তুন্ তুই সোরেই নেযেয়োচ্; তারা ইদু তুই মরে ঈচ্ গরা হেইয়্যে গোজ্যস্। মুই আক্‌সো যেয়োং, নিগিলি এই ন-পারঙর্;

⁹ দুঘে মঅ চোগ্‌কুন ফেজেরা ওই যেয়োন্। ও লগেপ্রভু, পত্তিদিন মুই তরে ডাগং; মুই তইদু মঅ আঢ্‌তান বাবেই দুয়োং।

¹⁰ যিগুনে মুরি যেয়োন্, তারাত্তে কি তুই আমক্ অবার কাম গরচ্? মরাগুনে উদিনে কি তরে নাঙ্ গিনিবাক্?

¹¹ গোর ইদু কি তর্ অমকদ কোচ্‌পানা আর নরগত্ কি তর্ বিশ্বেজর কধা ফগদাং গরা অবঅ?

¹² আন্ধারত্ কি তর্ আমক্ অবার কামানি বুঝো যেবঅ? যে দেজর্ মানুচ্চুনোরে মান্‌জ্যে ভুলি যান সিদু কি তর্ ন্যায় কামানি বুঝো যেবঅ?

¹³ ও লগেপ্রভু, মুই তইদু এজাল্ পেবাত্যে কানং; বেন্যেমাদান্ তইদু মর্ তবনাগান লুমেগোই।

¹⁴ ও লগেপ্রভু, কিত্তে তুই মরে ছাড়ি যেয়োচ্? তর্ মুয়োন মত্তুন্ কিত্তে লুগেই রাগেয়োচ্?

¹⁵ চিগনত্তুন্ ধুরি মুই দুঘোত্ আগং আর মরণর মুয়োত্ আগং। তর্ দর্‌গরেপারা সাজা মঅ উগুরে লামি এচ্চ্যে; মুই অমকদ অসহায়।

¹⁶ তর্ দর্‌গরেপারা রাগ্‌কান মঅ উগুরেন্দি বুয়োই যেইয়্যে; তর্ দর্‌বুগ্ লাগেয়্যে আঘাত্‌তানে মরে শেজ্ গুরি দিয়্যে।

¹⁷ সিয়েনে পানি ধোক্ক্যেন্ গুরি সারা দিন মরে ঘিরি রাগেয়্যে, মরে পুরোপুরিভাবে ডুবেই দুয়োচ্।

¹⁸ মঅ সমাজ্যে যিগুন, কোচ্‌পেইয়্যে যিগুন, তারারে তুই মত্তুন্ নেযেয়োচ্; ইক্কিনে আন্ধারানই মর্ সমাজ্যে।