গীতসংহিতা 86 - Chakma Bible

দায়ূদোর তবনা।

¹ ও লগেপ্রভু, মঅ কধাগান শুন আর মরে জোব্ দে, কিত্তেই মুই দুখি আর নাদা মানুচ্।

² মর্ পরাণান বাঁজা, কিত্তে মুই তর্ ভক্ত; ও মর্ গোজেন, যে চাগর্‌বো তঅ উগুরে বিশ্বেজ্ গোজ্যে তারে তুই রোক্ষ্যে গর্।

³ ও প্রভু, মঅ উগুরে দোয়্যে গর, কিত্তে মুই সারা দিন্নো তরে ডাগং।

⁴ তঅ চাগর্‌বো মনানত্ ফুত্তি দে, কিত্তেই ও প্রভু, মঅ মনান্ মুই তন্দি দুয়োঙর্।

⁵ ও প্রভু, তুই মংগলময় আর খেমাগুরিয়্যে; যিগুনে তরে ডাগন্ তারা উগুরে তুই কোচ্‌পানালোই ভরা।

⁶ ও লগেপ্রভু, মঅ তবনাগান শুন; মর্ নোনেয়্যে কানানিগান তুই শুন।

⁷ দযাত্ মুই তরে ডাগিম, কিত্তেই তুই মরে জোব্ দিবে।

⁸ ও প্রভু, দেবেদাগুনো ভিদিরে তঅ ধোক্ক্যেন্ কনজন নেই; তঅ কামানির সমারে অন্য কনঅ কামর তুলনা ন-অয়।

⁹ ও প্রভু, তর্ বানেয়্যে বেক জাদ্‌তুনে এইনে তঅ মুজুঙোত্ জু জু জানেইনে মাঢা নিগিরিবো; তারা তর্ গুনগান গুরিবাক্।

¹⁰ তুই দাঙর্ আর আমক্ অবার্ কাম গুরি থাচ্; বানা তুয়ই গোজেন।

¹¹ ও লগেপ্রভু, তর্ পথ্‌তান পৌইদ্যেনে মরে শিক্ষ্যে দে, যেনে মুই তর্ সত্যলোই চলি পারং; তরে ভোক্তি গুরিবাত্যে মর্ দ্বিভাগ ওইয়্যে মনানরে তুই এগত্তর্ গর্।

¹² ও প্রভু, মর্ গোজেন, মুই বেক্ মনান্দোই তর্ বাঈনী গুরিম; উমর জিংকানি তর্ গুণগান গুরিম।

¹³ মঅ উগুরে তর্ অমকদ কোচ্‌পানার শেজ্ নেই; মরণর বেগত্তুন্ তলে জাগানত্তুন্ তুই মঅ পরাণান রোক্ষ্যে গোজ্যস্।

¹⁴ ও গোজেন, বার্‌বো গুরিয়্যেগুনে মঅ বিরুদ্ধে লাক্ক্যন্; অত্যেচারির দলুনে মঅ পরাণান্ নিবাত্তে চেট্ট্যা গত্তন্। তঅ উগুরে সেই মানুচ্চুনোর কনঅ ভোক্তি নেই।

¹⁵ মাত্তর্ ও প্রভু, তুই মেয়্যেলোই ভরা দোয়্যেলু গোজেন; তুই এনেবাদে বেজার্ ন-ওজ্, তর্ অমকদ কোচ্‌পানা আর বিশ্বেজর শেজ্ নেই।

¹⁶ তুই মন্দি ফির্ আর মরে দোয়্যে গর্; তঅ চাগর্‌বোরে তর্ খেমতা দান গর্; তঅ চাগরানিবোর পূয়োবোরে রোক্ষ্যে গর্।

¹⁷ তর্ ভালেদির আওজর্ প্রমাণান্ মরে দেগা, যেনে মরে যিগুনে ঈচ্ গরন্ তারা দেগিনে লাজ্ পান; কিত্তে ও লগেপ্রভু, তুয়ই মরে বল্ দুয়োচ্ আর বুঝেয়োচ্।