গীতসংহিতা 85 - Chakma Bible

গান পরিচালগত্যে। কোরহর বংশর গান।

¹ ও লগেপ্রভু, তঅ দেজ্‌ছান উগুরে তুই দোয়্যে দেগেয়োচ্; তুই যাকোবরে তা বন্দি দজাত্তুন্ ফিরেই আন্যচ্।

² তঅ মানুচ্চুনোর অন্যেয়ানি তুই খেমা গোজ্যস্; তুই তারার বেক পাপ্পানি ঢাগি রাগেয়োচ্।

³ তর্ বেক রাগ্‌কান তুই দূর্ গুরি দুয়োচ্ আর তর্ অমকদ রাগত্তুন্ ফিজ্জোস্।

⁴ ও আমা উদ্ধোর গুরিয়্যে গোজেন, তুই আমারে আগ অবস্তাদ ফিরেই আন; আমা উগুরে তর্ বেজার্ অনাগান তুই থামা।

⁵ উমরত্যে কি তুই আমা উগুরে তর্ রাগ্‌কান অদে অদে রাগেবে? বংশর পর বংশ ধুরি কি তুই জদবদে গুরি বেজার্ ওই থেবে?

⁶ তঅ মানুচ্চুনে যেনে তরে নিইনে ফুত্তি গুরি পারন্ সেনত্তে কি তুই তারারে আরঅ জেদা ন-গুরিবে?

⁷ ও লগেপ্রভু, তর্ অমকদ কোচ্‌পানা তুই আমারে দেগা আর আমারে উদ্ধোর গর্।

⁸ লগেপ্রভু গোজেনে যিয়েন কবঅ মুই সিয়েন শুনিম; তা মানুচ্চুনো ইদু, তা ভক্তগুনো ইদু তে সুগ্-শান্দির কধা কবঅ; মাত্তর্ তারা যেন আর ভুলো মিক্ক্যে ন-ফিরোন্।

⁹ যিগুনে তারে ভোক্তি গরন ঘেচ্চেক্‌গুরি তার উদ্ধোর্ গুরিবার অক্তবো তারা ইদু এচ্চ্যে; সেক্কে তা মহিমাগান আমা দেজত্ বজত্তি গুরিবো।

¹⁰ অমকদ কোচ্‌পানা আর বিশ্বেজর এগত্তর্ ঘুদিবো; ন্যায় আর ভালেদিগানে এক্কান আরেক্কানরে চুমিবো।

¹¹ দেজর্ মাদিত্তুন বিশ্বেজছান জাগি উদিবো; স্বর্গত্তুন্ ন্যায়য়ানে তলেন্দি রিনি চেবঅ।

¹² যিয়েন গম লগেপ্রভু ঘেচ্চেক্‌গুরি সিয়েন দিবো, আর আমা দেজ্‌ছানে খেত-খেত্তি দিবো।

¹³ ন্যায়য়ানে তার আগ্ মলিম যেবঅ; সে পরেন্দি টেঙর্ চিহ্নোগানে আদিবার পথ্‌তান গুরি দিবো।