গীতসংহিতা 84 - Chakma Bible

গান পরিচালগত্যে। গিত্তীৎ। কোরহর বংশর গান।

¹ ও বেগত্তুন্ খেমতাবলা লগেপ্রভু, কি দোল্ তর্ থেবার জাগায়ান!

² মঅ পরাণানে লগেপ্রভুর ঘরর উদোনানি চেবাত্যে অমকদ ধারস্ গরের্, আর সেনত্যে মঅ পরাণানে যেন নিগিলি যার্; জেদা গোজেনত্যে মঅ কিয়্যেগান আর মনান্ হুজিয়্যে রঅ ছাড়ের্।

³ ও বেগত্তুন্ খেমতাবলা লগেপ্রভু, মর্ রাজা, মর্ গোজেন, তর্ পূজোবো ইদু চোড়োই পেগে ঘর পেয়োন্, খঞ্জন পেগেয়ো ছঅগুন্ থবার্ জাগা পেয়োন্।

⁴ বর্‌পেইয়্যে তারা, যিগুনে তঅ ঘরত্ থান্; তারা নিত্য তর্ বাঈনী গরন্।

⁵ তত্তুন্ যিগুনে বল্ পান তারা বর্‌পেইয়্যে। বর্‌পেইয়্যে তারা, যিগুনোর মনত্ সিয়োনত্ যেবার পদ চিন্তেগান আঘে।

⁶ বেঙা-কলগ ভিদিরেন্দি যেবার সময়োত্ তারা জাগায়ানরে পয়নালার জাগা বানান্; পত্তম্ বারিজের্ ঝড়ানে সেই জাগায়ানরে আশিদবাদে ভোরেই দে।

⁷ যেবার পদত্ তারা বল উগুরে বল্ পান; তারা পত্তিজনে সিয়োনত্ গোজেনর মুজুঙোত্ আজিল্ অন।

⁸ ও লগেপ্রভু, বেগত্তুন খেমতাবলা গোজেন, মর্ তবনাগান শুন; ও যাকোবর গোজেন, মঅ কধাগান শুন।

⁹ ও গোজেন, আমা ঢালানরে চাহ্; তর্ এ অভিষেগ গোজ্যে মানুচ্চো উগুরে তর্ দোয়্যের চোখ্‌কুন রাগা।

¹⁰ অন্য জাগাত্ আজার দিন কাদানাত্তুন্ তঅ ঘর উদোনত্ এক্কো দিন কাদানা বোউত্ গম; পাজি মানুচ্চুনোর তাম্বুলো ভিদিরে বজত্তি গরানাত্তুন্ বরং মর্ গোজেন ঘর দোরানর ইদু থিয়্যেই থানাগান্ বোউত্ গম।

¹¹ ঘেচ্চেক্‌গুরি গোজেন লগেপ্রভু বেলান আর ঢাল ধোক্ক্যেন; তে দোয়্যে আর বাঈনী দান গরে। যিগুনে গমেডালে চলন্ তারারে কনঅ গম জিনিস দেদে তে অস্বিগের ন-গরে।

¹² ও বেগত্তুন্ খেমতাবলা লগেপ্রভু, যে তমা উগুরে বিশ্বেজ্ গরে তে বর্‌পেইয়্যে।