গীতসংহিতা 83 - Chakma Bible

এক্কো গীদ্। আসফর এক্কো গান।

¹ ও গোজেন, তুই জুরো গুরি বোই ন-থেচ্; ও গোজেন, তুই মুয়োন বানি ন-রাগেচ্, সাড়্ দিচ্।

² চাহ্, কেজান্ গুরি তর্ শত্রুগুনে রঅ ছাড়দন্ আর যিগুনে তরে ঘিনান্ তারা বার্‌বো গুরিনে মাদাগুন উজু গোজ্যন্।

³ তঅ মানুচ্চুনোর বিরুদ্ধে তারা সল্লা গত্তন্, তুই যিগুনোরে রোক্ষ্যে গোজ্যস্ তারার বিরুদ্ধে কুজুরোমি গোজ্যস্।

⁴ তারা কদন্, “আদঅ, আমি জাদ্ ইজেবে তারারে শেজ্ গুরি দিই, যেন ইস্রায়েলর নাঙান্ আর কারঅ মনত্ ন-থায়।”

⁵ তারা এক্ মনা ওইনে কুজুরোমি গোজ্যন্; যিগুনে তমা বিরুদ্ধে চুক্তি গোজ্যন্ তারা অলাক্-

⁶ তাম্বুল্লোই থেইয়্যে ইদোমীয়গুনে, ইশ্ময়েলীয়গুনে, মোয়াবীয়গুনে আর হাগারীয়গুনে,

⁷ গবালীয়গুনে, অম্মোনীয়গুনে, অমালেকীয়গুনে আর সোর-আদাম্মেগুনো সমারে পলেষ্টীয়গুনে;

⁸ এন্ কি, আসিরিয়োগুনেয়ো তারা সমারে মিজেয়োন আর লোটর বংশধরুনোর ডেন আত্ ওইয়োন।

⁹ তুই মিদিয়নীয়গুনোর উগুরে যিয়েন গোজ্যস্, কীশোন গাঙর্ পাড়ত্ সীষরা আর যাবীনো উগুরে যিয়েনি গোজ্যস্, ইগুনো উগুরেয়ো সিয়েন গর্।

¹⁰ সীষরা আর যাবীন ঐন্‌দোরোত্ ভস্ত ওই যেয়োন্; তারা ভূইয়ো উগুরে গবর ধোক্ক্যেন্ পড়ি আগন্।

¹¹ তারার নেতাগুনোর দজা তুই ওরেব আর সেবের ধোক্ক্যেন গর্; তারার বেক শাজন্‌গুরিয়্যেগুনোর দজা সেবহ আর সল্ মুন্নের ধোক্ক্যেন গর্।

¹² সেই শত্রুগুনে কোইয়োন্দে, “এজঅ, আমি গোজেনর দিয়্যে দেজ্‌ছান গজক্ গুরি নেযেই।”

¹³ ও মর্ গোজেন, তুই তারারে বোইয়্যেরে উড়ি যেইয়্যে শুগুনো গাজ ধোক্ক্যেন্ গর্, বোইয়্যের মুয়োত্ তুজো ধোক্ক্যেন্ গর্।

¹⁴ ঝাড়ত্ আগুন বাঁজিলে যেধোক্ক্যেন্ গাজর্ পর গাজর্ পুড়ি যান্ আর আগুনো জিলানে মুড়োকে মুড়ো জ্বালেই দে,

¹⁵ সেবাবোত্যেগুরি তঅ ঝড়ান্দোই তুই তারারে ধাবেই দে; তর্ দর্‌গরেপারা ঝড়ান্দোই অমকদ দর্‌বুক লাগেই দে।

¹⁶ তুই লাজে তারার মুয়োনি ঢাগি দে, যেনে ও লগেপ্রভু, তারা তরে ডাগন্।

¹⁷ তারা উমরত্যে লাজাদোক্ আর অমকদ দরাদোক্; তারা অসর্মান ওইনে ভস্ত ওই যাদোক্।

¹⁸ তারা যেন হবর্ পান, তঅ নাঙান লগেপ্রভু, অয়, বানা তুয়ই গোদা দুনিয়াগানর দাঙর্ গোজেন।