গীতসংহিতা 81 - Chakma Bible

গান পরিচালগত্যে। গিত্তীৎ। আসফর গান।

¹ গোজেন, যিবে আমার বল্, তুমি তা নাঙে হুজির্ রঅ ছাড়অ; যাকোবর গোজেনর নাঙে জয় জয় গরঅ।

² গান আরাম্ভ গরঅ, ঝোন্‌ঝোনি বাজঅ; বাজঅ মধুর বাশি আর হার্‌মোনি।

³ আমা পরব দিনোত্ আঙোস্যে আর পূর্ণিমাত্ শিংগা বাজঅ;

⁴ সিয়েনই ইস্রায়েলর সুদোম, যাকোব গোজেনর আইন।

⁵ যেক্কেনে তে সাজা দিবাত্যে মিসর দেজ বিরুদ্ধে নিগিলিলো সেক্কেনে যোষেফ-বংশবোত্যে তে এ পরব্‌পো সাক্ষি ইজেবে থিদেবর্ গুরিলো। মুই এন্ এক্কান কধা শুনেলুং যিয়েন আগে ন-বুঝোং।

⁶ লগেপ্রভু কলঅ, মুই তা কানাত্তুন্ বুধিবো সোরেই দিলুং; কাল্লোং বুয়োনাত্তুন্ তে বাঁজিলো।

⁷ দজাত্ পড়িনে তুই মরে ডাগিলে আর মুই তরে উদ্ধোর্ গুরিলুং; দেবা পেরাগ রবো সেরেত্তুন্ মুই তরে জোব্ দিলুং; মরীবার পানিগান ইদু মুই তরে জগা চেলুং।

⁸ ও মঅ মানুচ্চুন্, তুমি মর্ উজিয়ার কধাগান শুনো; ও ইস্রায়েলীয়গুন, মর্ অমকদ আওজ্, তুমি মঅ কধানি শুনো।

⁹ কনঅ দেব-দেবেদা তমার ন-থোক্; অন্য কনঅ জাদর দেবেদাগুনো ইদুয়ো তুমি মাধা ন-নিগিরিবা।

¹⁰ মুয়ই লগেপ্রভু, তমা গোজেন; মুয়ই মিসর দেজত্তুন্ তমারে নিগিলে আন্যং। তুমি দাঙর্ গুরি মুয়োন আহ্ গর্, মুই সিয়েন ভোরেই দিম।

¹¹ মাত্তর্ মঅ মানুচ্চুনে মঅ কধানি ন-শুনিলাক্; ইস্রায়েল মর্ বাধ্য অদে রাজি ন-অলঅ।

¹² সেনত্তে মুই তারারে একবুচ্ছ্যে মনর্ মান্‌জ্য আদত্ রাগেলুং, যেনে তারা নিজো আওজ্ মজিম চলন্।

¹³ হায়, যুনি মঅ মানুচ্চুনে বানা মর্ বাধ্য থেদাক্, যুনি ইস্রায়েলে মঅ পধেন্দি চলিদো,

¹⁴ সালে যাদিমাদি মুই তারার শত্রুগুনোরে দোঙেদুং, তারার শত্রুগুনোর বিরুদ্ধে মঅ আঢ্‌তানি তুলিদুং।

¹⁵ “শত্রুগুনে মঅ মুজুঙোত্ মাদা নিগিরোদে বাধ্য অবাক্, তারার সাজাগান্ অবদে উমরত্ত্যে।

¹⁶ মাত্তর্ ইস্রায়েলরে মুই বেগত্তুন্ দোল গম্ হেবাত্যে দিম; ঘেচ্ছেক্‌গুরি মুই তারারে পেত্ ভোরেই দিম সে মধুলোই যিয়েন মুড়োগুনোর্ ফাদা জাগাত্ পাহ্ যায়।”