গীতসংহিতা 79 - Chakma Bible

আসফর এক্কো গান।

¹ ও গোজেন, অন্য জাদ্‌তুনে তর্ সোম্বোত্তিগানি আক্রমন গোজ্যন্, তারা সিদু চোমেয়োন্দি; তঅ সুদ্ধো-সাংগ ঘরান্ তারা অসিজি গোজ্যন্; যিরূশালেমানরে তারা ভস্তর কুড়্ বানেয়োন্।

² তঅ চাগরুনোর মরাকিয়্যেগানি তারা আগাজ পেখ্‌কুনোরে হেবাত্যে দুয়োন্; তঅ ভক্তগুনোর্ কিয়্যে এরানি পিত্‌থিমীর য়েমানুনোরে দুয়োন।

³ যিরূশালেম চেরোকিত্যে তারা পানি ধোক্ক্যেন গুরি তারার লো-গানি ঢালি দুয়োন; তারারে গোর্ দিবাত্যে কনজন নেই।

⁴ পাড়াল্যেগুনো ইদু আমি মুয়োন দেগেই ন-পারির্, আমা চেরোকিত্যে মানুচ্চুনোর ইদু ঈচ্ গরা হেইয়্যে মানুচ্ ওইয়্যেই।

⁵ ও লগেপ্রভু, আর কয়দিন? তুই কি জিংকানিবর্ বেজার ওই থেবে? আর কয়দিন তর্ পাইদ্যে ভোক্তি ন-পানার জ্বালা আগুনো ধোক্ক্যেন জুলিবো?

⁶ যিগুনে তরে মানি ন-নেযান্ সেই জাদ্‌তুনো উগুরে তঅ রাগ্‌কান ঢালি দে, ঢালি দে সে রেজ্যগানি উগুরে যিগুনে তরে তর্ যোগাজ্যে সর্মান ন-দুয়োন্;

⁷ কিত্তেই তারা যাকোবর বংশবোরে যেন শেজ্ গুরি ফেলেয়োন, তার থেবার ঘরান ভস্ত গোজ্যন্।

⁸ পুরোণি মানুচ্চুনোর অন্যেয়ানি তুই আমা বিরুদ্ধে ন-ধুরিচ্; তুই যাদিমাদি তর্ মেয়্যেগান আমারে দেগা, কিত্তে আমি চেরোকিত্যেত্তুন্ কুল ন-পেইয়্যে ওইয়্যেই।

⁹ ও আমা উদ্ধোর গুরিয়্যে গোজেন, তর্ বাঈনী গুরিবাত্যে তুই আমারে এজাল্ দে; তর্ সুনাঙ্ রাগেবাত্তে আমারে উদ্ধোর গর্ আর আমা পাপ্পানি খেমা গর্।

¹⁰ অন্য জাদ্‌তুনে কিত্তে কবাক্, “কুদু গেলঅ তারার গোজেনে?” তুই আমা মুজুঙোত্ তারারে জানেই দে, তঅ চাগরুনোর লো ঝড়ানার হেনাগান তুই নিবে।

¹¹ বন্দিগুনোর কানানিগানি তঅ কানত্ লুমোক্; যিগুনো উগুরে মরণর রায় দিয়্যে ওইয়্যে তর্ দাঙর্ বল্লোই তুই তারারে বাঁজা।

¹² ও প্রভু, আমা কায়-কুরে জাদ্‌তুনে যেবাবোত্যে গুরি তরে গেইল্ দুয়োন, সেই সাতগুন সাজা তুই তারারে ফিরেই দে।

¹³ সালে আমি, তঅ মানুচ্চুন, যিগুনে তর্ চোরেইয়্যে মাদ ভেড়া, উমর সং তরে ভালেদি জানেবং আর বংশর পর বংশ ধুরি তর্ বাঈনী গুরিবোং।