গীতসংহিতা 78 - Chakma Bibleআসফর দুঘোত্ তবনার গান। 1 ও মর্ জাদঅ মানুচ্চুন, মঅ সল্লাগান শুনো; মর্ মুয়ো কধানি শুনো। 2 মুই উপমা দিইনে কধানি ভাঙি কোম্; মুই পুরণ দিনো হবর্ ন-পেইয়্যে কধানি কোম। 3 এ কধানি আমি শুন্যেই আর হবর্ পেইয়্যেই, আমা পুরোণিমানুচ্চুনে আমা ইদু কোই যেইয়োন্। 4 তারার বংশগুনোর ইদু আমি সিয়েনি লুগেই ন-রাগেবং; আমি মুজুঙো বংশধরুনোর ইদু লগেপ্রভুর বাঈনীবলা কামর কধা কবং; তার খেমতার কধা আর তে যেদক্কানি আমক্ অবার কাম গোজ্যে সেই কধানি কোম। 5 তে যাকোব বংশ উগুরে তা উগুমান জারি গোজ্যে, ইস্রায়েল জাদত্তে তার সুদোমানি থিদেবর্ গোজ্যে; সে সুদোমানি তারার ঝি-পুঅগুনোরে শিগেবাত্যে তে আমা পুরোণি মানুচ্চুনোরে উগুম গোজ্যে, 6 যেনে মুজুঙো বংশধরুনে, যিগুনে ইয়ো ন-জর্মান্ তারা সিয়েনি হবর্ পান আর তারার পুঅ-ছাগুনো ইদু কোই পারন। 7 সেক্কে তারা গোজেন উগুরে বিশ্বেজ্ গুরিবাক্; তার কামানি তারা ভুলি ন-যেবাক্ বরং তা উগুমানি পালেবাক্। 8 ইয়ন্দোই তারার পুরোণি মানুচ্চুনো ধোক্ক্যেন তারা একবুচ্যে আর উল্লোমি ন-অবাক্; সেই পুরোণি মানুচ্চুনোর মনানি গোজেন উগুরে যোগাজ্যে ন-এলঅ আর মনানিয়ো বিশ্বেজি ন-এলঅ। 9 ইফ্রয়িমর মানুচ্চুনে ধনুবলা অলেয়ো যুদ্ধোত্ পিজেন্দি উদি যেইয়োন। 10 তারা গোজেনর সুদোমানি ন-পালান্, তার সুদোম মজিম আদিবাত্যে তারা অস্বিগের্ গোজ্যন্। 11 তে যে গোজ্যে সিয়েন তারা ভুলি যেইয়োন, ভুলি যেইয়োন তার আমক্ অইদে কামর কধানি যিয়েনি তে তারারে দেগেয়্যে। 12 ইস্রায়েলীয়গুনোর পুরোণি মানুচ্চুনোর চোগো মুজুঙোত্ তে আমক অবার্ কাম গোজ্যে; মিসর আর সোয়ন চাগালাত্ তে সিয়েনি গোজ্যে। 13 তে সাগরান দ্বিভাগ গুরিনে সংমোধ্যেন্দি তারারে নেযেয়্যে; তে পানিগানরে ভিদে ধোক্ক্যেন্ গুরি থিয়্যেই রাগেয়্যে। 14 দিনোত্ মেঘ দিইনে আর পুরো রেত্তো আগুনো পহ্র্লোই তে তারারে পথ দেগেয়্যে। 15 ধূল্যেচর-চাগালাত্ শীল্ ফাদিনে মাদি তলেত্তুন্ তে তারারে বোউত্ হেবার পানি দিলো। 16 মুড়ো ধোক্ক্যেন শিলোত্তুন্ তে পানি গঙার নিগিলেই আনিলো; সেই পানিগান তে ছড়া ধোক্ক্যেন বুয়োই দিলো। 17 মাত্তর্ তারা তা উল্লোমি গুরিনে পাপ গরা ধুরিলাক্; দাঙর্ গোজেন বিরুদ্ধে ধূল্যেচর চাগালাত্ উল্লোমি গুরিলাক্। 18 তারার আওজ্ মজিম হানা দাবি গুরিনে মনে মনে তারা গোজেনরে জগা চেলাক্। 19 তারা গোজেন বিরুদ্ধে এ কধাগান কলাক্, “গোজেনে কি ধূল্যেচর-চাগালাত্ হানা দিইনে টেবিল সাজেই পারে? 20 তে শিল্লোত্ আঘাত গুরিলো আর সিয়োত্তুন ঠেলা মাজ্যে পানি গঙার্ নিগিলি এলঅ; সিয়েন গরে বিলিনে কি তে আমারে রুটি দি পারিবো? তে কি তা মানুচ্চুনোত্যে য়েরা যুক্কোল্ গুরি পারিবো?” 21 এ কধাগান শুনিনে লগেপ্রভু রাগে ফুলি উদিলো। যাকোব বিরুদ্ধে তা মনত্ আগুন জুলি উদিলো, ইস্রায়েলর বিরুদ্ধে তা রাগ্কান জাগি উদিলো; 22 কিত্তেই গোজেন উগুরে তারা বিশ্বেজ্ ন-গরন; তে যে তারারে উদ্ধোর্ গুরিবো সে কধানি তারা নির্ভর ন-গরন্। 23 তো তে উগুরে দেবাবোরে উগুম দিলো আর দেবাবোর দোরান্ খুলি দিলো। 24 মানুচ্চুনোরে হেবাত্যে তে ঝড় ধোক্ক্যেন গুরি মান্না দিলো, স্বর্গর শোজ্য তারারে দিলো। 25 স্বর্গদূতোর হানা মান্জ্যে হেলাক্; তারা যেত্তমান্ হানা হেই পারন সেত্তমান্ হেবার জিনিস তে তারারে পাধেই দিলো। 26 তা দেবাবোত্তুন্ পূগো বোইয়্যের বেঈ দিলো; তে নিজো খেমতালোই দোগিনো বোইয়্যেরান চালেল। 27 তে ধূল্যেচর ধোক্ক্যেন এরা ঝড় দিলো, সাগর পার বালুচর ধোক্ক্যেন পেগো ঝড় দিলো 28 তারার তাম্বুলোর্-চাগালাত্, তারার তাম্বুলোর চেরোকিত্যে তে সিয়েনিরে পড়িবাত্যে দিলো। 29 তারা পেট ভুরি সিয়েন হেলাক্; তারা যিয়েন চেইয়োন তারারে তে সিয়েনই দিলাক্। 30 যে হানাগান তারা হেবাত্যে চেইয়োন সিয়েন হানা শেজ্ ন-অদে, এন্ কি, সিয়েন তারার মুয়োত্ থাগদে 31 গোজেন রাগ্কান তারার বিরুদ্ধে জাগি উদিলো। তারার কিজু দরমর গাবুজ্যেরে তে মারে ফেলেল; ইস্রায়েলর সেরা মানুচ্চুনোরে তে তা অধিনোত্ আনিলো। 32 তো তারা পাপ গরা ধুরিলাক্, তার আমক্ অবার কামানি দেগিনেয়ো তারে বিশ্বেজ্ ন-গুরিলাক্। 33 সেনত্তে তে তারার দিনুন্ বিফলে শেজ্ গুরি দিলো আর দর্বুক্ লাগেইনে বজরুন শেজ্ গুরি দিলো। 34 তে তারারে মারে ফেলানার পরেন্দি বাদ্বাগি মানুচ্চুনে তা কধা ইদোত্ তুলিলাক্; তারা আরঅ তান্দি ফিরিনে আওজ্ গুরিনে তারারে ডাগিলো। 35 তারার মনত্ পড়িলো গোজেনে তারার আশ্রয়-মুড়ো, দাঙর্ গোজেনে তারার উদ্ধোর্ গুরিয়্যে। 36 মাত্তর্ তারা সেক্কেনে মুয়োন্দি ছলনা গুরিলাক্, জিল্লোই তাইদু মিজে কধা কলাক্। 37 তারার মনানি তা উগুরে থির্ ন-এলঅ; তার সুদোমানি উগুরে তারা বিশ্বেজি ন-এলাক্। 38 তো তে দোয়্যে-মেয়্যেলোই ভরা বিলিনে তারার অন্যেয়ানি খেমা গুরিলো, তারারে ভস্ত ন-গুরিলো; তা রাগ্কান তে বার বার দোঙেই রাগেল, তা বেক্ রাগ্কান ফুলি ন-উদিলো। 39 তে ভাবি চেলদে তারা দঅ মানুচ্, তারা বেঈ যেইয়্যে বোইয়্যের ধোক্ক্যেন যিয়েন ফিরি ন-এজে। 40 ধূল্যেচর-চাগালাত্ কয়বার তা বিরুদ্ধে তারা উল্লোমি গোজ্যন্, সেই ধূল্যে ভূইয়োত্ কয়বার তারে দুঘ্ দুয়োন। 41 বার বার তারা গোজেনরে জগা চেইয়োন, ইস্রায়েলর সেই পবিত্র মানুচ্চোরে দুঘ্ দুয়োন। 42 তারা তার খেমতার কধানি ইদোত্ ন-রাগান্; ইদোত্ ন-রাগান সেই দিনোর কধানি- যেদিন্যে তে শত্রুর আদত্তুন্ তারারে উদ্ধোর গোজ্যে, 43 যেদিন্যে মিসরত্ তে চিহ্নো দেগেয়্যে আর আমক্ অবার কাম গোজ্যে সোয়ন চাগালাত্। 44 সেদিন্যে তারার বেক গাঙ পানিগান লো বানেই দিয়্যে আর সেই পানিগান তারা হেই ন-পারন্। 45 তারা ইদু তে ঝাক ঝাক পুগ্ পাদেল, সিগুনে তারারে যেন হেইনে শেজ্ গুরি দিলাক্। তে বেঙ দল পাধেই দিলো, সিগুনে তারারে সর্বনাশ গুরিলাক্। 46 তারার শোজ্যগুন তে ফিরিঙুনোরে দিলো আর তারার ফসলানি পুগ্-যুগ্কুনোরে দিলো। 47 শিলোঝড়্লোই তারার আংগুর লুদিগানি বর্বাত্ গুরি দিলো; জমা ওইয়্যে শিরো পানিলোই ডোমোর গাজ্ছুন বর্বাত্ গুরি দিলো। 48 তে শিলোঝড়ত্ তারার গোরু পালুন ইরি দিলো আর দেবা পেরাগ আদত্ তারার য়েমান পালুন তুলি দিলো। 49 তে তারার বিরুদ্ধে তার জোল্জোল্যে অমকদ রাগ্কান্ আর দুঘ্-কষ্ট পাধেই দিলো; সিগুন অলাক্ ভস্তর কামত্ নেযেয়্যে একদল দূত। 50 তা রাগ্কানত্তে তে পথ বানেল, তে মরণত্তুন্ তারারে রেহাই ন-দে ; বরং ভানা (সাজুরেদে পিড়ে) আদত্ তারারে তুলি দিলো। 51 তে মিসর দেজর পত্তি গিরির্ পত্তম্ পুয়োগুনোরে আঘাত গুরিলো, আঘাত গুরিলো হাম-বংশর তাম্বুলোত্ গাবুজ্যে-বলর্ পত্তি গিরির্ পত্তম্ ফল্লোরে। 52 সে পরেন্দি তা মানুচ্চুনোরে তে ভেড়া ধোক্ক্যেন গুরি নিগিলেই আনিলো, আর ধূল্যেচর-চাগালার ভিদিরেন্দি ভেড়া পাল ধোক্ক্যেন গুরি তারারে পরিচালনা গুরিলো। 53 তে তারারে গমেডালে আনিলো, তারার কনঅ দর্বুক ন-লাগিলো; মাত্তর্ সাগরানে তারার শত্রুগুনোরে গিলি ফেলেল। 54 যেরেন্দি তে তার সুদ্ধো-সাংগ দেজত্ তারারে আনিলো, আনিলো সেই মুড়োমুড়ি দেজত্ যে দেজ্ছান তা খেমতাবলা আত্তোই তে গজক্ গোজ্যে। 55 তারা মুজুঙোত্তুন অন্য জাদ্তুনোরে তে ধাবেই দিলো, আর সে জাদ্তুনোর জাগা-জোমিগানি তে জরীপ গুরিনে সোম্বোত্তি ইজেবে তারারে ভাগ গুরি দিলো; তারার ঘরানিত্ ইস্রায়েলর গুট্টিগুনোরে বজত্তি গরা বাজেই দিলো। 56 মাত্তর্ তো তারা দাঙর্ গোজেনরে জগা চেলাক্ আর তা বিরুদ্ধে উল্লোমি গুরিলাক্; তা উগুমান তারা ন-পালেলাক্। 57 তারার পুরোণি মানুচ্চুনো ধোক্ক্যেন তারা গম্ পদত্তুন সুরি যেইনে বেইমানি গুরিলাক্; বজং ধনু ধোক্ক্যেন তারা বেঙা গুরি থেলাক্। 58 তারা মুড়ো উগুরে ডালিবাজা দিইনে তারে অখুজি গোজ্যন্; বানেয়্যে মুত্তি পূজো গুরিনে তা পাইদে ভক্তির আওজ্ছান বাড়েই দুয়োন। 59 ইয়েনি দেগিনে গোজেনে অমকদ বেজার্ অলঅ; তে ইস্রায়েলরে পুরোপুরি গুরিনে এলাফেলা গুরিলো। 60 শীলোত তার যে থেবার-তাম্বুলান এলঅ সিয়েন তে ছাড়ি দিলো; ইয়েন সে তাম্বুলান যিয়েন তে মান্জ্য ইদু থিদেবর্ গোজ্যে। 61 তা খেমতার চিহ্নোগান তে বন্দীদজাত্ পাদেল; তা মহিমার চিহ্নোগান তা শত্রুগুনো আদত্ দিলো। 62 তা মানুচ্চুনোরে তে শত্রুর তলোয়ার আদত্ তুলি দিলো; তা নিজো মানুচ্চুনো উগুরে তা রাগ্কান ফেলেল। 63 আগুনানে তারার গাবুজ্যেগুনোরে পুড়ি ফেলেল; তারার গাবুজ্যে মিলেগুনোত্যে মেলা গান ন-অলঅ। 64 তলোয়ারানিত্ তারার ধর্মগুরুগুনে মুরি গেলাক্; তারার রানিমিলেগুনে আবিলেচ্ গুরি ন-পারিলাক্। 65 সে পরেন্দি প্রভু যেন ঘুমোত্তুন্ জাগিলো; তে আংগুর-রসর মাত্তল কাদে উঠ্যে বীরো ধোক্ক্যেন গুরি জাগিলো। 66 তা শত্রুগুনোরে তে পিজেন্দি ওদেই দিলো; তারারে তে জদবদে অগমানত্ ফেলেল। 67 পরেন্দি তে যোষেফ-বংশর চাগালাগান এলাফেলা গুরিলো, ইফ্রয়িম-গুট্টির চাগালাগান বেঈ ন-নেযেল; 68 মাত্তর্ বেঈ নেযেল যিহূদা-গুট্টির চাগালাগান সেই সিয়োন মুড়োবো যিবেরে তে কোচ্পেদ। 69 সিয়েনত্ তার্ সুুদ্ধো-সাংগ ঘরান তে অজল্ গুরি বানেল, সিয়েন এলদে যেন দেবাবো সং; তে সিয়েন পিত্থিমী ধোক্ক্যেন গমেডালে থিদেবর্ গুরিলো। 70 তে তার চাগর দায়ূদরে বেঈ নেযেল, নেযেল তারে ভেড়া গোরত্তুন্; 71 তারে দুধবলা পাদি ভেড়াগুনোরে চেইচিদিবার কামত্তুন্ আনিলো, যেন তে প্রভুর মানুচ্চুনোরে, অত্তাৎ যাকোবর বংশবোরে, যিগুন তার সোম্বোত্তি সেই ইস্রায়েল জাদ্তোরে চোরেই পারন্। 72 দায়ূদে তার দোল মন-মানসিক নিইনে তারারে পালেল; তে তারারে মগজ খাদেইনে চালেই নেযেল। |
Copyright © 2021 Bangladesh Bible Society
Bangladesh Bible Society