গীতসংহিতা 75 - Chakma Bible

গান পরিচালগত্যে। সুর-“ভস্ত ন-গোজ্য।” আসফর এক্কো গীদ্। এক্কো গান।

¹ ও গোজেন, আমি তরে ভালেদি জানেই, আমি তরে ভালেদি জানেই, কিত্তেই তুই মুজুঙোত্ আগচ্; মানুচ্চুনে তর্ আমক্ অবার কামর কধানি ফগদাং গরন্।

² তুই কোই থাচ্, ঠিগ সময়ান মুয়ই বেঈ লং, মুয়ই দোল্‌বিচের্ গরং।

³ পিত্‌থিমী আর তার মানব-সমাজর সুদোমানি যেক্কে ভাঙি যায়, সেক্কেনে মুয়ই তার খুদোগুন টিগেই রাগেয়োং।

⁴ “মুই বার্‌বোগুনোরে কং, ‘বার্‌বো ন-গোজ্য,’ আর পাজিগুনোরে কং, শিঙুন্ ন-পাত্যেয়ো।

⁵ তমা শিঙুন ন-পাত্যেয়ো আর গত্তনা বেঙা গুরিনে কধা ন-কোইয়ো। ”

⁶ পূগে কি পোজিমে বা ধূল্যেচর-চাগালাত্তুন্ কনজনে রোক্ক্যে গুরিবাত্যে ন-এজন্;

⁷ মাত্তর্ গোজেনে বিচের গরে; তে একজনরে তলে লামায় আর আর একজনরে উগুরে তুলে।

⁸ লগেপ্রভুর আঢত্ এক্কো গলস আঘে, সিয়েনত্ ফেনা উত্যে মজলা মিজেয়্যে আংগুর-রস আঘে। তে সেই গলস ইত্তুন ঢালি দে; পিত্‌থিমীর বেক পাজি মানুচ্চুনে সিবের্ তলাগান সং হেই পেবাক্।

⁹ মাত্তর্ মুই জিংকানিবর গোজেন পৌইদ্যেনে ফগদাং গুরিম আর যাকোব গোজেনর নাঙে নাঙ্ গিনেদে গীদ্ গুরিবোং।

¹⁰ মুই পাজিগুনোর বেক শিঙুন কাবি ফেলেই দিম, মাত্তর্ গোজেন ভক্তগুনোর্ শিঙুন অজলত্ তুলো অবঅ।