গীতসংহিতা 74 - Chakma Bibleআসফর দুঘোত্ তবানার গীদ্। 1 ও গোজেন, তুই উমরত্যে কিত্তে আমারে ফেলেই যেয়োচ্? তর্ চড়েদে জাগানর্ ভেড়াগুনোর বিরুদ্ধে কিত্তে তর্ রাগর আগুনান্ ধূমেই উদের্? 2 ইদোত্ তুলি চাহ্ তর্ সেই মানুচ্চুনোর কধানি যিগুনোরে তুই ভালোক্ দিন আগে তঅ মানুচ্ ইজেবে নেযেয়োচ্, যে বংশবোরে তুই তর্ অধিকার ইজেবে উদ্ধোর গুরি আন্যচ্। ইদোত্ তুলি চাহ্ সেই সিয়োন মুড়োবোর কধা যিয়েনরে তুই তর্ থেবার জাগা ইজেবে বানেয়োচ্। 3 উমরর্ এ ভস্তর কুড়োবোন্দি তুই আঢিনে উজেই আয়; সুুদ্ধো-সাংগ জাগানত্ শত্রুগুনে বেক্কানি বর্বাত্ গুরি দুয়োন। 4 যিয়েনত্ তঅ সমারে আমার এগত্তর্ অদঅ সেই জাগানত শত্রুগুনে রঅ ছাড়ি নিগিল্যন্, সিয়েনত্ তারা নিজোর বাবতাগান উড়েয়োন্। 5 অবস্তা দেগিনে মনে অলঅ যেন কনজনে ঝাড় গাজ কাবিবাত্যে কুড়োল বাজেয়োন্। 6 কুড়োল আর মাত্তুল্লোই বেক নক্শা গোজ্যে কামানি তারা বর্বাত্ লাগেই দুয়োন্। 7 তর্ সুদ্ধো-সাংগ জাগানত্ তারা আগুন বাজেই দুয়োন্, তর্ থেবার জাগানত্ মাদি সমারে মিজেইনে অসিজি গোজ্যন্। 8 তারা মনে মনে কোইয়োন্, “আমি তারারে পুরোপুরি গুরিনে দোঙেই রাগেবং।” গোজেন সমারে মিজেবার বেক্ জাগায়ানি তারা পুড়ি ফেলেই দুয়োন্। 9 আমাত্যে কনঅ আমক্ অবার কাম গরা অর্ এবাবোত্যে দঅ আর মুই ন-দেগং; কনঅ ভাববাদিয়ো আর নেই; এবাবোত্যে যে আর কয়দিন্ চলিবো সিয়েন আমাত্তুন কনজনে হবর্ ন-পান্। 10 ও গোজেন, শত্রুগুনে আর কয়দিন ঠাট্টা-তামাজা গুরিবাক্? জিংকানিবর্ কি শত্রুগুনে তর্ নাঙান অগমান গুরিবাক্? 11 কিত্তেই তুই তর্ আঢ্তান, সেই ডেন্ আঢ্তান লুগেই রাগেয়োচ্? সিয়েন বুগো ভিদিরেত্তুন নিগিলেই আনিনে তারারে শেজ্ গুরি দে। 12 তো ও গোজেন, ভালোক্ দিন আগেত্তুন ধুরি তুয়ই মর্ রাজা; তুয়ই এ দুনিয়ের বুগোত্ উদ্ধোরর কাম গোজ্যস্। 13 নিজো খেমতালোই তুই সাগরানরে ভাগ গোজ্যস্; তুই সাগর ভিদিরে পানি-দেবেদাগুনোর মাদাগুন ভাঙি দুয়োচ্। 14 লিবিয়াথনর্ মাদাগুন তুয়ই নিগুজ গুরি দুয়োচ্ আর তার কিয়্যেগান ধূল্যেচর প্রাণিগুনোরে হেবাত্যে দুয়োচ্। 15 তুই পয়নালা আর চিগোন ছড়াগানির পথ্তানি খুলি দুয়োচ্; ভালোক্ দিনোর বেই যেইয়্যে গাঙানি তুয়ই শুগেই ফেলেয়োচ্। 16 দিন্নো তর্, রেত্তোয়ো তর্; চান্নো-তারাবো আর বেলান তুয়ই থিদেবর্ গোজ্যস্। 17 পিত্থিমীর বেক দুযিগানি তুয়ই ঠিগ্ গুরি দুয়োচ্; তুয়ই যার্কাল আর্ হরান্ন্যেবোরে বানেয়োচ্। 18 ও লগেপ্রভু, পুরি ন-ফেলেচ্ শত্রুগুনে তরে নিইনে ঠাট্টা-তামাজা গোজ্যন্, বাজে-বিবেকবলা মানুচ্চুনে তর্ নাঙান অগমান গোজ্যন্। 19 তর্ এ কোচ্পানার কঅবোরে তুই ঝাড়্বো য়েমান আঢত্ তুলি ন-দিচ্; তর্ অত্যেচার ওইয়্যে মানুচ্চুনোর জিংকানির কধানি তুই কনদিন্ ভুলি ন-যেচ্। 20 তর্ সুদোমর কধাগানি তুই ইদোত্ তুলি চাহ্; দেজর্ বেক্ পৌল্যেনে থেবার জাগায়ানি অত্যেচারে ভুরি উঠ্যে। 21 তুই অত্যেচার ওইয়্যে মানুচ্চুনোরে অগমান ওইনে ফিরি এবাত্যে ন-দিচ্; দুঘি আর নাঢা মানুচ্চুনে তর্ নাঙানর বাঈনী গোরোদোক্। 22 ও গোজেন, বিচের গুরিবাত্যে তুই উঠ্ তঅ মগদ্দমাগান্ আরাম্ভ গর; বাজে-মানুচ্চুন ভুলি ন-যেইয়ো পুরো দিন্নো তরে নিইনে ঠাট্টা-তামাজা গরন্। 23 তঅ শত্রুগুনোর কিজিক্ কাজাক্, তঅ বিরুদ্ধে তারার যে রঅ ছাড়াচাড়ি নিত্য চলের্, সিয়েন ভুলি ন-যেচ্। |
Copyright © 2021 Bangladesh Bible Society
Bangladesh Bible Society