গীতসংহিতা 73 - Chakma Bibleতিন লম্বর ভাগ ( ৭৩-৮৯ ) আসফর গীদ্। 1 যিগুনোর মনানি দোল্ সে ইস্রায়েলীয়গুনোর তপ্পেন্দি গোজেনে ঘেচ্চেক্গুরি ভালেদি গরে। 2 মাত্তর্ মুই পেরায় পোজ্যং; মঅ টেঙান্ পেরায় বিজিদি যেইয়্যে। 3 মুই দেগিলুং, পাজিগুনে বেশ্ সুগে আগন্, সেনত্তে বেক্ বার্বো গুরিয়্যেগুনোরে দেগিনে মর্ ইংসে ওইয়্যে; 4 কিত্তে মুরিবার কাদাল্যে তারা দুঘ্ ন-পান্ আরে তারার কিয়্যেগানিয়ো বেশ্ পক্তামক্তা থায়। 5 অন্য মানুচ্চুনে যেবাবোত্যেগুরি দজাত্ পড়ন্ সে বাবোত্যে তারা দজাত্ ন-পড়ন; অন্যগুনে যে বাবোত্যেগুরি দুঘ্ পান সে বাবোত্যেগুরি তারা দুঘ্ ন-পান। 6 সেনত্তে বার্বো অয়দে তারার তদাবোর্ নেগেলেচ্চো, আর অত্যেচারানি অয়দে তারার কিয়্যের কাবড়ানি। 7 অমকদ পক্তায় তারার চোগ্কুন নিগিলি এচ্চ্যে; তারার মন কুজুরোমিগানি উগুরি পড়ের্। 8 তারার কধানিত্ ঈচ্ গরানা আর ইংসে আঘে; বার্বোলোই তারা অত্যেচারর্ দর্বুক্ লাগান্। 9 তারা স্বর্গর বিরুদ্ধে কধা কন আর গদা দুনিয়্যেগান তারার দাঙর্ দাঙর্ কধানি ছিদি পড়ে। 10 সেনত্তে গোজেন মানুচ্চুনে বজং পধেন্দি ফিরি যান আর সে কধানি অমকদ ধরন্। 11 তারা কন্দে, “গোজেনে কি বাবোত্যেগুরি হবর্ পেব? দাঙর্ গোজেন ইদু জ্ঞান বিলিনে কি কিজু আঘে?” 12 ইগুনে অলাক্ সেই পাজি মানুচ্চুন যিগুনে আরামে থেইনে ধন-সোম্বোত্তি বাড়েয়োন্। 13 মঅ মনানরে মুই অনত্তক্ ঠিগ্ রাগেয়োং, মঅ আঢ্তানরে মিজে মিজে ঠিগ্ রাগেয়োং। 14 পুরো দিন্নো মুই দুঘ্ পাঙর্; পত্তিদিন বেন্যেমাদান্ সাজা পেয়োং। 15 যুনি এ কধানি মুই মান্জ্যর ইদু কদুং, সালে এ কালত্ তঅ মানুচ্চুনোর ইদু মুই অবিশ্বেজি অদুং। 16 মুই যেক্কেনে ইয়েনি পৌইদ্যেনে বুঝিবার চেট্ট্যা গুরিলুং সেক্কেনে মঅ মনানরে সিয়েনিয়ে দুঘ্ দিয়্যে ধুরিলো; 17 মাত্তর্ যেক্কেনে মুই গোজেনর সুদ্ধো-সাংগ জাগানত্ গেলুং সেক্কেনে তারার শেজ্ দজানর কধা বুঝি পারিলুং। 18 তুই ঘেচ্চেক্গুরি তারারে বিজোল্ জাগাত্ রাগেয়োচ্ আর ভস্ত অনাগানত্ ফেলেয়োচ্। 19 কেজান্গুরি অদাঢত্ তারা ভস্ত ওই যান আর দর্বুক লাগেয়্যে দজাত্ এক্কুবারে শেজ্ ওই যান। 20 ঘুম ভাঙিলে মানজ্যর্ স্ববনান্ যেধোক্ক্যেন তুচ্চো ওই যায়, সেধোক্ক্যেন ও প্রভু, তুই জাগিলে তারায়ো তইদু তুচ্চো ওই যেবাক্। 21 যেক্কেনে মঅ মনান্ থিদে ওইয়্যে আর মনত্ আঘাত লাক্ক্যে, 22 সেক্কেনে মুই বাজে আর অবুঝুনোর্ ওইয়োং আর তইদু বুদ্ধিনেইয়্যে য়েমান ধোক্ক্যেন ওইয়োং। 23 তো মুই নিত্য তঅ সমারে সমারে আগং; তুই মর্ ডেন আঢ্তান ধুরি রাগেয়োচ্। 24 তর্ উগুম্মোই তুই মরে চালেবে, আর যেরেন্দি তর্ মহিমালোই মরে মানি লবে। 25 স্বর্গত তুয়ই মর্; তরে পেইনে পিত্থিমীত্অ মর্ চেবার আর কিচ্চু নেই। 26 মর্ কিয়্যে আর মনান ক্ষয় ওই যেই পারে, মাত্তর্ গোজেনে মর্ মনানর্ বল্ আর মর্ উমরর্ সোম্বোত্তির ভাগ। 27 যিগুনে তত্তুন্ দূরোত্ সুরি যেইয়োন, তারা শেজ্ ওই যেবাক্; যিগুনে তঅ উগুরে অবিশ্বেজি তুই তারারে ভস্ত গুরি ফেলেবে। 28 মাত্তর্ গোজেন সমারে থানা মত্তে মংগল; প্রভু লগেপ্রভুরে মুই মর্ আশ্রয়র জাগা বানেয়োং, যেন তার কামর কধানি মুই ফগদাং গুরি পারং। |
Copyright © 2021 Bangladesh Bible Society
Bangladesh Bible Society