গীতসংহিতা 71 - Chakma Bible

¹ ও লগেপ্রভু, মুই তইদু আশ্রয় নেযেয়োং, মরে কনদিন্‌অ লাজত্ ন-ফেলেজ্।

² তুই ন্যায়বান বিলিনে মরে বাঁজা, উদ্ধোর গর্; মঅ কধা শুন আর মরে রোক্ষ্যে গর্।

³ তুই মর্ আশ্রয়-মুড়ো অ যিবে ইদু মুই নিত্য যেই পারং। তুই মর্ অজল্ মুড়ো আর ঘর, সেনত্তে মরে রোক্ষ্যে গুরিবাত্তে উগুম দুয়োচ্।

⁴ ও মর্ গোজেন, পাজিগুনোর আঢত্তুন্, বজং আর চিৎনেইয়্যে মানুচ্চুনোর আঢত্তুন্, তুই মরে উদ্ধোর গর্।

⁵ ও প্রভু লগেপ্রভু, তুয়ই মর্ আজা, গাবুরো বয়জত্তুন্ ধুরি তুই মর্ ভরসা।

⁶ জর্মত্তুন ধুরি মুই তঅ উগুরে নির্ভরশীল; তুই মরে মা পেদত্তুন নিগিলেই আন্যচ্। তুই নিত্য মর্ বাঈনী গুরিবার্ বিষয়।

⁷ মরে চেইনে ভালোক্‌জনে আহ্ গুরি চেই থান্, মাত্তর্ তুই মর্ গভিন আশ্রয়।

⁸ মঅ মুয়োন্দি তর্ নাঙ্ গিনেনাগান্ থেবঅ, সিয়েন পুরো দিন্নো তর্ বাঈনী গুরিবার্ কধা কবঅ।

⁹ মর্ এ শেজ্ বয়জত মরে ফেলেই ন-দিচ্; মর্ বলান ফুরেই যেইয়্যে, মরে ফেলেই ন-যেচ্।

¹⁰ মর্ শত্রুগুনে মঅ বিরুদ্ধে কধা কদন্; যিগুনে মরে মারে ফেলেবাত্তে চান্ তারা বেক্কুনে মিলিনে সল্লা-তেম্মাং গত্তন্।

¹¹ তারা কদন্, “গোজেনে তারে ছাড়ি যেইয়্যে; তারে লোড়েইনে ধুরি ফেল, তারে বাঁজেবাত্তে কনজন নেই।”

¹² ও গোজেন, তুই মত্তুন্ দুরোত্ ন-থেচ্; ও মর্ গোজেন, মরে এজাল্ দিবাত্তে তুই যাদিমাদি আয়।

¹³ মর্ বিপক্কগুনে লাজত্ পোড়োদোক্ আর ভস্ত ওদোক্; যিগুনে মরে দযাত্ ফেলেবার চেট্টাদ্ আগন্ তারা ঈচ্ গরা হেইনে আর অগমানে নাঢা যাদোক্।

¹⁴ মাত্তর্ মুই নিত্য তঅ উগুরে ভরসা গুরিম, তর্ বাঈনী উগুরে বাঈনী গুরি গুরি থেম্।

¹⁵ তর্ ন্যায় কাম আর তর্ উদ্ধোর কামর কধানি দিনভর্ মঅ মুয়োন্দি থেবঅ, কিত্তেই সিয়েনি কোই কোই থুম্ গরা ন-যায়।

¹⁶ ও প্রভু লগেপ্রভু, তর্ মহৎ কামর কধানি কবাত্তে মুই তঅ ঘরত্ সোমেম্; মুই তর্, বানা তঅ ধোক্ক্যেন্ ন্যায়র কাম কধানি কোম।

¹⁷ ও গোজেন, গাবুজ্যে অক্তত্তুন্ ধুরি তুই মরে শিক্ষ্যে দুয়োর্; এজঅ সং মুই তর্ আমক্ অবার কামর কধানি ফগদাং গরঙর্।

¹⁸ ও গোজেন, এচ্চ্যে বুড়ো ওইনে চুল পাগিলেয়ো তুই মরে ছাড়ি ন-যেচ্; আগাম্ বংশধরুনোর ইদু তর্ খেমতার কধা, আগাম্ বংশধরুনোর ইদু তর্ বলর্ কধা মরে ফগদাং গুরিবাত্তে দে।

¹⁹ ও গোজেন, তর্ ন্যায়র কামান যেন দেবাবো ইদু লুম্মেগোই; বেক দাঙর্ কামানি তুই গোজ্যস্; ও গোজেন, তর্ সং সং আর কন্না আঘে?

²⁰ যুনিয়ো তুই মঅ উগুরে বোউত্ দুঘ্ আর দযা আন্যচ্, তো তুই আরঅ মঅ পরাণান জেদা গুরি দিবে; মাদি তলেত্তুন্ তুলি আনেদে ধোক্ক্যেন গুরি আরঅ তুই মরে তুলি আনিবে।

²¹ মুই চাং তুই যেনে মঅ সর্মানান বাড়েই দুয়োচ্, আরঅ মরে সুগ-শান্দি দুয়োচ্।

²² ও মর্ গোজেন, তর্ বিশ্বেজর্ পৌইদ্যেনে মুই বীণা বাজেইনে তর্ বাঈনী গুরিম; ও ইস্রায়েলর সেই পবিত্র মানুচ্চো, মুই হারমোনিলোই তর্ নাং গিনেদে-গান গেম্।

²³ মুই যেক্কেনে তর্ নাং গিনেদে-গান গেম্ মর্ মুয়োনে সেক্কে রঅ ছাড়িনে রঙ্গ-ফুত্তি গুরিবো; মর্ মনানে তর্ নাং গিনেদে-গান গেবঅ, কিত্তেই তুই মরে উদ্ধোর্ গোজ্যস্।

²⁴ মর্ মুয়োনে সারা দিন্নো তর্ ন্যায় কামর কধানি কবঅ, কিত্তেই যিগুনে মরে দযাত্ ফেলেবার চেট্টাদ্ আগন তারা লাজত্ পোজ্যন আর অগমান ওইয়োন্।