গীতসংহিতা 7 - Chakma Bible

দায়ূদোর গান্‌নো-সুরলোই বানেয়্যে। বিন্যামীন-গুট্টির্ কূশর পৌইদ্যেনে লগেপ্রভুর্ নাঙে গান।

¹ ও লগেপ্রভু, মর্ গোজেন, মুই তইদু আশ্রয় নেযেয়োং। যিগুনে মঅ পিজেন্দি লোড়েইনে এত্তন্ তারার্ আঢত্তুন্ তুই মরে উদ্ধোর্ গর্, মরে রোক্ষ্যে গর্।

² সিয়েন ন-অলে সিংহ ধোক্ক্যেন গুরি তারা মরে ছিনি ফেলেবাক্; তারা মরে কট্টা কট্টা গুরি ফেলেবাক্, মরে বাজেবার্ কনজন ন-থেবাক্।

³ ও লগেপ্রভু, মর্ গোজেন, যুনি মুই এমন্ কিজু গুরি থাং, যুনি অন্যেয়র্ কনঅ কলংগ মঅ আঢত্ বাজে,

⁴ যুনি মঅ সমাজ্যেগুনো উগুরে অন্যেয় গুরি থাং, যে এনেবাদে মর্ শত্রু ওইনে উঠ্যন্ মাত্তর্ মুই তারেয়ো উদ্ধোর্ গোজ্যং-

⁵ মাত্তর্ শত্রুগুনে লোড়েইনে মরে ধুরি ফেলাদোক্; তারা মরে মাদিত্ ফেলাদোক্ আর টেংগোই উরোদোক্, মঅ সর্মানান্ ধুলোত্ মিজেই দেদোক্।

⁶ ও লগেপ্রভু, অমকদ রাগ্ গুরিনে তুই উদিনে থিয়্যে, মঅ শত্রুগুনোর্ রাগর বিরুদ্ধে আত্ তুল্। মত্তেই তুই উঠ্, কিত্যে তর্ ন্যায়বিচেরর্ কধা তুই ফগদাং গোজ্যস্।

⁷ বেক্ জাদর্ মানুচ্চুনে তঅ চেরোকিত্তে এগত্তর্ ওদোক্; তুই স্বর্গত্ ফিরি যেইনে আরঅ তারা উগুরে রাজাগিরি গর্।

⁸ লগেপ্রভু যেনে তারারে বিচের্ গরে। ও লগেপ্রভু, মর্ ন্যায় কাম্ আর গম্ কাম মজিম্ তুই মরে বিচের্ গর্।

⁹ ও ধার্মিগো গোজেন, তুই পরাণানিরে আর মনানিরে যগা চাজ্; তুই পাজিগুনোর্ শদানিগানি শেজ্ গর্ মাত্তর্ তঅ ভক্তগুনোরে গমেডালে থিদেবর্ রাগা।

¹⁰ গোজেনে মর্ ঢাল; যিগুনে মনেদি খাটি তারারে তে রোক্ষ্যে গরে।

¹¹ গোজেনে ন্যায়বিচেরগ্, পাজিগুনোর্ বিচের্ তে নিত্য গুরি থায়।

¹² অন্যেয়গুরিয়েবো যুনি ন-ফিরে সালে তে তার্ লাম্বা ছুড়িগান ধারেব আর তার্ ধনুগান লোঙেনে ঠিগ্ গুরি নেযেব।

¹³ তে তার্ মরণ-আত্যেরান্ ঠিগ্ গুরি রাগেয়্যে, আর তা চিম্‌‌‌চিম্যে সেল্‌‌লো বানেই রাগেয়্যে।

¹⁴ অন্যেয়গুরিয়্যেবো বজঙানিরে মনত্ রাগায়, অন্যেয়রে মনত্ রাগেইনে জ্বালাপোড়াত্ ভুগে আর মিজেগানি ফগদাঙ্ গরে।

¹⁵ গাত্ খুড়িনে তে ভিদিরেত্তুন্ মাদি তুলি ফেলায় আর নিজো গাঢত্ নিজে পড়ে।

¹⁶ তা অন্যেয়র্ ভারান্ তা নিজো মাঢাবোত্ ফিরি এজে; তে যে অত্যেচার্ গরে সিয়েন্ তা মাঢাবো উগুরে লামি এজে।

¹⁷ লগেপ্রভু ন্যায়বিচের্ গরে, সেনত্তে মুই তারে ভালেদি জানেম; মুই দাঙর্ লগেপ্রভুর্ নাঙ্ গিনেদে-গান গেইম।