গীতসংহিতা 69 - Chakma Bibleগান পরিচালগত্যে। সুর-“পদ্মফুল।” দায়ূদোর এক্কো গান। 1 ও গোজেন, মরে উদ্ধোর গর্, মুই যেনে পানিত ডুবঙর্। 2 মুই গভিন পুদোত্ ডুবঙর্, সিয়েনত্ মর্ থিয়্যেবার জাগা নেই। মুই গভিন পানিত্ এইনে পোজ্যং; বান পানিয়ে মঅ উগুরেন্দি বেই যার্। 3 ডাগদে ডাগদে মুই বল্পোজ্যে ওইয়োং, মর্ মুয়োপানিগান্ শুগেয়্যে; মর্ গোজেনত্তে চেই থাগদে থাগদে মঅ চোগ্কুন ঝাপ্সা ওইয়োন। 4 যিগুনে অকারনে মরে ঈচ্ গরন, তারা জনেদি মর্ চুলানিত্তুন্অ বেশ্। যিগুনে মরে ভস্ত গুরি ফেলেবাত্তে চান তারা বেশ্ বোলিবন্দ; তারা মিজে মিজে মর্ শত্রু ওইয়োন। মুই যিয়েন চুর্ ন-গরং সিয়েন্অ মত্তুন ফিরেই দিয়্যে পোজ্যে। 5 ও গোজেন, তুই দঅ মর্ ভুলো কধা হবর্ পাজ্; মঅ দুষ্ছান তইদু লুগেবার নেই। 6 ও প্রভু, বেগত্তুন খেমতাবলা লগেপ্রভু, যিগুনে তরে বাজ্জেই আগন্ মত্তেই তারা যেন লাজ্ ন-পান। ও ইস্রায়েলর গোজেন, যিগুনে তরে জানিবাত্তে আওজ্ গত্তন্ তারা যেন মত্তে অসর্মান ন-অন্। 7 মুই তত্তেই অগমান সোজ্য গোজ্যং, অসর্মানে মর্ মুয়োন ঢাগা যেইয়্যে। 8 মঅ ভেইয়ুনোর ইদু মুই যেন অচেনা ওই যেইয়োং, মা পেদঅ ভেইয়ুনোর ইদু বিদেশি ওইয়োং। 9 তঅ ঘরানত্তে মর্ যে গভিন কোচ্পানা, সেই কোচ্পানাগানে মঅ মনানরে জ্বালেয়্যে। যিগুনে তরে অগমান গরন্ তারার বেক্ অগমানানি মঅ উগুরে পোজ্যে। 10 মর্ কানানিগান আর মর্ উবোস্ থানার্ দুঘ্কান মর্ দুন্নামর্ বেপার ওইয়্যে। 11 মুই যেক্কেনে বস্তাপাদা পিন্যং সেক্কে মান্জ্যে মরে ঈচ্ গোজ্যন। 12 যিগুনে শঅরর্ গেদোত বোইনে তারা ভিদিরে মরে নিইনে কধা তুলোন্; মাত্তলুনে মরে নিইনে গীদ্ গান। 13 মাত্তর্ ও গোজেন, যে সময়োত্ তর দোয়্যে পাহ্ যায় মুই সেই অক্তত্ তইদু তবনা গরঙর্; ও গোজেন, তর্ অমকদ কোচ্পানালোই তর্ উদ্ধোর গুরিবার বিশ্বেজ্চান্ দেগেইনে মরে জোব্ দে। 14 ফুদোত্তুন্ মরে উদ্ধোর গর্, মরে ডুবিবাত্তে ন-দিচ্; মঅ শত্রুগুনোর আঢত্তুন্ তুই মরে উদ্ধোর গর্, উদ্ধোর গর্ গভিন পানি ভিদিরেত্তুন্। 15 পানি বান যেন মঅ উগুরেন্দি বেই ন-যায়, গভিন পানিগানে যেন মরে তলাত্ ন-ফেলায়; মরণ জাগানর মুয়োন যেন মত্তেই বানা ন-অয়। 16 ও লগেপ্রভু, তর্ ভালেদির অমকদ কোচ্পানায় মরে তুই জোব্ দে; তর্ থুম্ ন-ওইয়্যে দোয়্যে-মেয়্যেলোই তুই মন্দি ফির্। 17 তঅ চাগর্বোর ইন্দিত্তুন তর্ মুয়োন তুই ফিরেই ন-রাগেচ্; মুই দযাত্ পোজ্যং, মরে যাদিমাদি জোব্ দে। 18 তুই মইদু এইনে মরে ছাড়েই নেযা; তুই মরে উদ্ধোর গর্, কিত্তে মর্ শত্রু আগন্। 19 মুই যে কদক্ ঈচ্ গোজ্যে, লাজত্ পোজ্যে আর অসর্মানর মানুচ্ ওইয়োং সিয়েন দঅ তুই হরব পাচ্; মঅ শত্রুগুনে বেক্কুনে তঅ মুজুঙোত্ আগন। 20 ঈচ্ গরানায় মঅ মনান্ ভাঙি যেইয়্যে, সেনে মুই অমকদ অসুখ্ ওইয়োং। মর্ দুঘে যেন অন্য মানুচ্চুনে দুঘ্কান বুঝোন সিয়েনই মুই চেইয়োং, মাত্তর্ মুই সিয়েন ন-পাং। সান্তনা দিবাক্ এবাবোত্যে মানুচ্ মুই চেইয়োং, মাত্তর্ সেবাবোত্যে কনজনরে ন-পেলুং। 21 মর্ হানাগানত্ তারা বিষ দুয়োন্ আর পানি তিরেজর্ সময়োত্ দুয়োন সিরকা। 22 তারার হানার পরব্পুন ফাল্ ওক্, আর গমেডালে থেবার মনভাব্পান তারার জালর ফাল্ ওক্। 23 তারার চোগ্কুন কান্ ওক যেনে তারা ন-দেগন্, আর নিত্য তারার কমরুনোত্ গির্গিরেনি ধোরোক্। 24 তর্ অমকদ অগমানে তুই তারারে গেইল্ দে; তর্ জোলজোল্যে রাগ্কানে তারারে ধোরোক্। 25 তারার থেবার জাগায়ান খালি পড়ি থোক্। তারা তাম্বুলোত্ থেবার্ কেঅ ন-থাদোক্। 26 তুই যিবেরে সাজা দুয়োচ্ তারা তারে অত্যেচার গোজ্যন্; যিগুনোরে তুই আঘাত গোজ্যচ্ তারা যন্ত্রণাগান অলঅ তারার তেম্মাঙর্ বেপার। 27 অন্যেয় উগুরে তারারে অন্যেয় গুরিবাত্তে দে; তারা যেন তর্ দিয়্যে উদ্ধোরর্ ভাগ ন-পান। 28 জেদাগুনোর নাঙানিত্তুন্ যেন তারার নাঙানি বাদ যায়, গোজেন ভক্তগুনোর্ নাঙানিত্তুন্ যেন তারার নাঙানি ন-থায়। 29 মুই দুঘোত্ আর যন্ত্রনাত আগং; ও গোজেন, তুই মরে উদ্ধোর্ গুরিনে তারার মুজুঙোত্তুন্ বারেন্দি রাগা। 30 মুই গীদ্ গেইনে গোজেনরে নাঙ্ গিনিম্; ভালেদি জানেইনে তার বাঈনী গুরিবোং। 31 বলদ আর শিং আর ঠেঙর্ টুক্বলা দামাড়া উৎসর্বত্তুন্ সিয়েনে লগেপ্রভুরে বেশ্ হুজি গুরিবো। 32 সিয়েন দেগিনে নম্র মানুচ্চুনে হুজি অবাক্; তুমি যিগুনে গোজেনরে জানিবাত্তে আওজি, তুমি বাঁজি থাগ। 33 লগেপ্রভু নাদামানুচ্চুনোর্ কধানি শুনে; তা মানুচ্চুন, যিগুনে বন্দীদজাত্ আগন্, তারারে তে বেঙা চোগেন্দি ন-চায়। 34 দেবাবো আর পিত্থিমীগানে তারে নাং গিনোদোক্; দোজ্যে সাগর আর সাগর ভিদিরে ঘুরি বেড়েয়্যে বেক্ প্রাণিগুন তারে নাং গিনোদোক্; 35 কিত্তেই গোজেনে সিয়োনানরে উদ্ধোর্ গুরিবো, যিহুদার শঅরানরে আরঅ বানেব; সেক্কেনে তা মানুচ্চুনে সিদু বজত্তি গুরিবাক্ আর সিয়েনর অধিকারি অবাক্। 36 তা চাগরুনো গুট্টির মানুচ্চুনে সিয়েনর অধিকার ইজেবে পেবাক্, আর যিগুনে তারে কোচ্পান তারা সিদু বজত্তি গুরিবাক্। |
Copyright © 2021 Bangladesh Bible Society
Bangladesh Bible Society