গীতসংহিতা 66 - Chakma Bibleগান পরিচালগত্যে। এক্কো গান। এক্কো গীদ্। 1 পিত্থিমীর মানুচ্চুন, তুমি বেক্কুনে গোজেনর নাঙে হুজিয়ে রঅ ছাড়। 2 তার বাঈনী-গীদ্ গঅ; তারে যগাজ্যে নাঙ্ গিনিবার্ দান গরঅ। 3 গোজেনরে কঅ, “তর্ কাম দেগিনে মনত্ কত্তমান দর্ আর ভোক্তি জাগে। তর্ দাঙর খেমতার মুজুঙোত্ তর্ শত্রুগুনে মাঢা লোঙেবার্ ভান গুরিবাক্। 4 দুনিয়ের বেক্ মানুচ্চুনে তরে তর্ যগাজ্যে সর্মান দিবাক্; তর্ নাঙে তারা নাঙ্ গিনেদে-গীদ্ গেবাক্; তারা তর্ নাঙ্ গিনেদে গীদ্ গেবাক্।” 5 তুমি এইনে গোজেনর কামানি চেই যঅ; মান্জ্যত্তে তে যে কামানি গোজ্যে সিয়েনি মনত্ ভোক্তিবলা দর্বুক্ লাগায়। 6 তে দোজ্যে সাগরানরে গোজ্যে শুগুনো জাগা; তারা ঠেঙোই আঢিনে গাঙান্ পার্ ওইয়োন। এজ, আমি দেজ ভিদিরে তারে নিইনে ফুত্তি গুরিই। 7 তার বল্লোই তে জিংকানিবর রাজাগিরি গরে; তা চোখ্কুন বেক্ জাদ্তুনো উগুরে আঘে। যিগুনে গোজেন উগুরে উল্লোমী তারা নিজোরে দাঙর্ মনে ন-গোরোক্। 8 বেক্ জাদর মানুচ্চুন্, আমা গোজেনর বাঈনী গরঅ; তারে নাঙ্ গিনেনার্ রগুন্ যেনে শুনো যায়। 9 তেয়ই আমারে বাঁজেই রাগেয়্যে আর আমা ঠেঙানি থির্ রাগেয়্যে। 10 ও গোজেন, তুই আমারে জগা চেইয়োচ্; রূবোর খাটিগান আগুনোত্ পুড়ি নিগিলেইদে ধোক্ক্যেন গুরি তুই আমারে জোক্জোক্যে গোজ্যস্। 11 তুই আমারে জালত্ ফেল্যচ্ আর আমা পিদোত্ অমকদ ঘুয়োর্ বুধি চাপি দুয়োচ্। 12 তুই আমা মাদা উগুরেন্দি যেন মানুচ্চুনোরে ঘোড়াত চড়িনে যাদে দুয়োচ্। আগুন আর পানি ভিদিরেন্দি আমাত্তুন্ এজা পোজ্যে, মাত্তর্ তুই আমারে যগাজ্যে আশিদ্বাদ ভিদিরে আন্যচ্। 13 মুই তঅ ঘরত্ পুজ্যে-উৎসর্ব আনিম আর তইদু মর্ বেক মান্যেগানি ছিড়েম্। 14 সেই মান্যেগানির কধা মুই মুয়োন্দি কোইয়োং, আর দজার দিনোত্ মঅ মুয়োন্দি সিয়েনি ফগদাং গোজ্যং। 15 মুই তঅ নাঙে পক্তা-মক্তা য়েমান্দোই পুজ্যে-উৎসর্বর পরব্ গুরিম আর সিয়েন সমারে পুজ্যে ভেড়ার তুম্বাজ উৎসর্ব গুরিম; মুই বলদ আর ছাগল উৎসর্ব গুরিম। 16 তুমি যিগুনে গোজেনরে ভোক্তি গরঅ তুমি বেক্কুনে এইনে শুনো; তে মত্তে যিয়েনি গোজ্যে সিয়েনি মুই তমারে কঙর্। 17 মুই নিজো মুয়োন্দি তারে ডাক্যং; মর্ মুয়োন্দো তার্ বাঈনী গরানা এলঅ। 18 মঅ মনত্ যুনি মুই কুজুরোমিগান পুজিদুং সালে মঅ কধাগান প্রভু ন-শুনিদো। 19 মাত্তর্ গোজেনে যে শুন্যে সিয়েনত কনঅ ভুল নেই; তে মর্ তবনাগান শুন্যে। 20 গোজেনর বাঈনী ওক্! তে মর্ তবনাগান এলাফেলা ন-গরে বা মঅ উগুরে তার অমকদ কোচ্পানাগান বন্ধ ন-গরে। |
Copyright © 2021 Bangladesh Bible Society
Bangladesh Bible Society