গীতসংহিতা 65 - Chakma Bible

গান পরিচালগত্যে। এক্কো গান। দায়ূদোর এক্কো গীদ্।

¹ ও গোজেন, সিয়োনত্ অলর্ গুরি তরে নাঙ্ গিনে অর্; আমা বেক্ মানত্‌তানি তঅ নাঙে ছিড়ে অবঅ।

² ও তবনাগানি মানি লোইয়্যেবো, তইদু বেক্ মানুচ্চুন এজন্।

³ মর্ অন্যেয় কামত্ মুই তলে পড়ি আগং, মাত্তর্ তুই আমা বেক পাপ্পানি খেমা গুরি থাচ্।

⁴ বর্‌পেইয়্যে সেই মানুচ্চ্য, যিবেরে তুই বেঈ নেযেয়োচ্ আর নিজোর কায়কুরে আন্, যেনে তে তর্ উদোনত্ বজত্তি গুরি পারে। তঅ ঘরর, তর্ পবিত্র থেবার ঘরর্ আশীদ্‌বাদে আমি হুজি অবং।

⁵ ও আমার উদ্ধোর্ গুরিয়্যে গোজেন, তর্ ন্যায্য ভোক্তিবলা দর্‌বুক লাগাইদ্যে কাম্বোই তুই আমা ডাগনিলোই শমক্ দিবে। পিত্‌থিমীর বেক্ মানুচ্চুন, এমন কি, বেগত্তুন দূরোত্ আর দূরো গাঙ পাড়র মানুচ্চুনেয়ো তঅ উগুরে বিশ্বেজ্ গরন।

⁶ তর্ খেমতালোই বেক মুড়ো-মুড়িগুন থিয়্যেই আগন্; ইয়েন্দোই ফগদাং অয় তুই খেমতাবলা।

⁷ তুই দোজ্যে সাগরর্ গুজুরোনিগান অলর্ গুরি দুয়োচ্, অলর্ গুরি দুয়োচ্ তার তুবোলর্ গুজুরোনিগান আর জাদ্‌তুনোর বেজালানি।

⁸ বেক্ মানুচ্চুন, এমন্ কি, ভালোত্ দূরোর মানুচ্চুনেয়ো তর্ আমক্ অবার চিহ্নোর-কামানি চেইনে দরান; বেলান উদোনাত্তুন ধুরি বেলান ডুবেদে সং তুই হুজিয়ে-গানে বেক জাগায়ানি পেলেপেলে গুরি রাগাচ্।

⁹ তুই পিত্‌থিমীর মাঢিগান উগুরে খিয়েল্ রাগাচ্ আর সিয়েনত্ পানি দি থাচ্; তুই তার বোলবোল্যেগান্ বোউত্ বাড়েই দে; তত্তুন্ ঝড়র ফুদোগুন লামি এজন্; তুই মান্‌জ্যরে খেত্-খেত্তি দি থাচ্- এবাবোত্যেগুরি মাঢিগান যুক্কোল্ গুরি রাগাচ্-

¹⁰ চাজ্‌বাজ্ গোজ্যে ভূইয়োর ভাজ্‌ছুন তুই পানি ভুরি দে আর সিয়েনর দ্বিকিত্তেন্দি সং গরঅ; অমকদ ঝড়লোই মাদিগান নরম গরঅ আর সিয়েনত্ নুয়ো গোজেয়্যে চারাগুনোরে বর্ দে।

¹¹ তুই বজরবোরে বোউত্ বর্ দিইনে ভালেদি গোজ্যস্; তর্ চলিবার পদথ্ বোউত্ আশিদ্‌বাদ ঝুড়ি পড়ে।

¹² সিয়েন ঝুড়ি পড়েদে য়েমান চোড়েবার মাদত্; মুড়োগুনোত্ যেন হুজির পোজাগ্ আঘে।

¹³ পত্তি খলা ভেড়া পাল্লোই ভরি আগন, আর সোজ্য খেত্‌তোই যেন কিজিঙানি ঢাক্যে আঘে; সিয়েনিয়ে হুজিয়ে রঅ ছাড়ের আর গান গার্।