গীতসংহিতা 64 - Chakma Bible

গান পরিচালগত্যে। দায়ূদোর এক্কো গান।

¹ ও গোজেন, তুই মর্ আবিত্তি গুরিবার্ কধানি শুন; তুই শত্রুর দর্ বুগোত্তুন মঅ পরাণান বাঁজা।

² পাজিগুনোর কুজুরোমির আঢত্তুন্ তুই মরে বাঁজা; যিগুনে বজং কাম গুরি গুরি বেড়ান্ সেই মানুচ্চুনোর কিজিক্ কাজাগত্তুন মরে বাঁজা।

³ তারা যেন লাম্বা ছুরি ধোক্ক্যেন গুরি জিলান্ দারেই রাগেয়োন, তারার্ থিদে কধার সেলুন ধনুগানত্ লাগেই রাগেয়োন;

⁴ যেনে হবর্ ন-পেইয়্যে জাগাত্তুন নিদ্দুযি মান্‌জ্যন্দি সেই সেলুন তারা মারি পারন্; তারা আদিক্ক্যেন্‌গুরি সিগুন্ মারন, ন-দরান।

⁵ তারার বজং সল্লাগানি তারা দরমর গুরি নেযান, আর হবর্ ন-পেইয়্যেগুরি ফাল্ পাদিবার সল্লা গরন্; তারা কন্দে, “কনজনে ইন্দি খিয়েল্ ন-গুরিবাক।”

⁶ তারা অন্যেয় গুরিবার ফন্দি গুরিনে কন্দে, “আমি চেরোকিত্তে চিন্তে গুরিনে এক্কান সল্লা গোজ্যেই।” ঘেচ্চেকগুরি মান্‌জ্যর্ মনানি আর মনর্ ভিদিরেগান তোগেইনে পাহ্ ন-যায়।

⁷ মাত্তর্ গোজেনে তারা উগুরে সেল মারিবো; আদিক্ক্যেন্‌গুরি সেল্লো ফুদিনে তারা পড়ি যেবাক্।

⁸ তারার জিলান্‌দোই তারা নিজোর দজাগান্ ডাগি আনিবাক্; তারারে চেইনে বেক্কুনে ঈচ্ গুরিনে মাঢা লাড়েবাক্।

⁹ সেক্কেনে বেক্কুনোর মনত্ দর্‌বুক লাগিবো; গোজেনে যিয়েন গোজ্যে তারা সিয়েন ফগদাং গুরিবাক্ আর সেই কধাগান ভাবিবাক্।

¹⁰ গোজেন ভক্ত মানুচ্চুনে লগেপ্রভুলোই ফুত্তি গুরিবাক্ আর তাইদু আশ্রয় নেযেবাক্; মনেদি যিগুনে গম্ তারা তার বাঈনী গুরিবাক্।