গীতসংহিতা 63 - Chakma Bible

দায়ূদোর এক্কো গান। তে যেক্কেনে ধূল্যেচর চাগালাত্ এলঅ গান্নো সেই সময়োর।

¹ ও গোজেন, তুই মর্ গোজেন, মুই আওজ্ গুরিনে তরে ডাগঙর্; এ শুগুনো পানিনেইয়্যে দেজত্, যিবের খেত-খেত্তি দিবার বলঅ ফুরেই যেইয়্যে, সিয়েনত তত্তেই মর্ পরাণান আওজ্ গরের্, তত্তেই মর্ কিয়্যেগান থিদেবর্ নেইয়্যে ওইয়্যে।

² এ মনভাব্‌পোই সেই পবিত্রজাগানত্ মুই তরে দেখ্যং, দেখ্যং তর্ বল্ আর বাঈনী পানা।

³ তর্ অমকদ কোচ্‌পানা পানাগান্ বাঁজি থানাত্তুন্‌অ বেশ্ গম; মর্ মুয়োনে তর্ বাঈনী গুরিবো।

⁴ মুই জিংকানিবর্ তরে নাঙ্ গিনিম; তর্ নাঙে মুই আত্ তুলিনে তবনা গুরিম।

⁵ য়েরা আর আড় মগজ্‌সোই ঈল্ ওইয়্যে মান্‌জ্য ধোক্ক্যেন মঅ পরাণান্ ; মর্ মুয়োনে অমকদ হুজিয়ে তরে নাঙ্ গিনিবো।

⁶ বিচ্ছোনত্ পড়িনে মুই তঅ কধা ভাবং, পুরো রেত্তো তঅ পৌইদ্যেনে ধ্যান গরং;

⁷ কিত্তেই তুই মর্ এজালদিয়্যে; তর্ ডুয়োগানির্ তলেদি মুই গান গাং।

⁸ মর্ পরাণানে তরে আজাবোদে ধোজ্যে; তর্ ডেন আঢ্‌তানে মরে ধুরি রাগেয়্যে।

⁹ যিগুনে মর্ জিংকানিগান শেজ্ গুরিবাত্তে তগান্ তারা পিত্‌থিমীর তলাত্ বেগত্তুন তলে জাগানত্ লামিবা্ক্।

¹⁰ লাম্বা ছুরির মুজুঙোত্ তারারে তুলি দিয়্যে অবঅ; তারা শিয়েলর হানা অবাক্।

¹¹ মাত্তর্ রাজা গোজেনরে লোইনে ফুত্তি গুরিবো; যিগুনে গোজেনর নাঙে শমক্ খান তারা বেক্কুনে তাল্লোই বার্‌বো গুরিবাক্; মাত্তর্ মিজেকধা কোইয়্যেগুনোর মুয়োনি বানি দিয়্যে অবঅ।