গীতসংহিতা 61 - Chakma Bible

গান পরিচালগত্তে। তারর্ বানা এক্কো বাজানা সমারে গাহ্ পুরিবো। দায়ূদোর গান।

¹ ও গোজেন, মর্ কানানিগান শুন; মর্ তবনাগান শুন।

² মুই যেক্কেনে নিরাজায়্ ভাঙি পড়ং সেক্কেনে পিত্‌থিমীর শেজ্ দুযিত্ থেলেয়ো সিয়োত্তুন্ মুই তরে ডাগিম। মরে তুই এন্ কনঅ অজল্ আশ্রয়-মুড়োত নেযেইনে রাগা যিয়েন মর্ নাগালর বারেন্দি।

³ তুই দঅ মর্ আশ্রয় ওই আগচ্; শত্রুর বিরুদ্ধে তুই মর্ দরমর ঘর।

⁴ তর্ তাম্বুলোত্ যেন মুই জিংকানিবর বজত্তি গুরি পারং; তর্ ডুয়োগান তলে যেন আশ্রয় পাং।

⁵ ও গোজেন, মুই যে বেক্কানি মানত্ গোজ্যং সিয়েন দঅ তুই শুন্যচ্; তরে যিগুনে ভোক্তি গরন্ তারাত্তে যে অধিকারান তুই থির্ গোজ্যস্ সিয়েন তুই মরেয়ো দুয়োচ্।

⁶ তুই রাজার আয়ুগান বাড়েই দিবে; তে কয়েক আজু-পিজু সং বাঁজি থেবঅ।

⁷ তে জিংকানিবর গোজেনর মুজুঙোত্ বজত্তি গুরিবো; তারে রোক্ক্যে গুরিবাত্তে তর্ অমকদ কোচ্‌পানা আর বিশ্বেজ্‌ছানরে তুই কামত্ লাগা।

⁸ মুই জিংকানিবর তর্ নাঙ্ গিনেদে গান গেম্, আর দিনকে দিন মঅ মান্যেগানি ছিড়েম্।