গীতসংহিতা 60 - Chakma Bible

গান পরিচালগত্যে। সুর-“পদ্মফুলোর সাক্ষি।” দায়ূদোর এক্কো শিক্ষ্যে-মিক্‌তাম। অরাম-নহরয়িম আর অরাম-সোবার সমারে যেক্কেনে দায়ূদোর যুদ্ধো অর্ আর যোয়াবে ফিরি এইনে নুনো সংজাগানত্ বার আজার ইদোমীয়রে মারে ফেলেল, গান্নো সেই সময়োর।

¹ ও গোজেন, তুই আমারে এলাফেলা গোজ্যস্, আমারে গুড়ি গোজ্যস্; তুই অমকদ বেজার্ ওইয়োচ্, মাত্তর্ এবেরা তুই আমারে আগ অবস্‌তাদ্ ফিরেই আন।

² তুই দেজ উগুরে ভূজোল্ আন্যচ্, ফাদা মারা ধোরেই দুয়োচ্; তুই সিয়েনর ফাদামারাগান নাঢি দে, কিত্তেই দেজ্‌ছান তলে পড়ের্।

³ তঅ মানুচ্চুনোরে তুই দুঘোর দিন দেগেয়োচ্; তুই আমারে এমন্ আংগুরো-রস হাবেয়োচ্ যিয়েনত্তে আমি মাত্তল ধোক্ক্যেন আদির্।

⁴ যিগুনে তরে ভোক্তি গরন্ তারারে তুই এক্কান বাবতা দুয়োচ্, যেনে সিয়েন তুলিলে ধরা যায় সত্যর্ পক্কে।

⁵ তর্ দরমর আঢ্‌তান বাবেইনে আমারে তুই উদ্ধোর গর্; মঅ ডাগনিলোই শমক্ দে যেনে তুই যিগুনোরে কোচ্‌পাজ্ তারা উদ্ধোর পান।

⁶ গোজেনে তার পবিত্র নাঙে কোইয়্যেদে, “মুই হুজিয়ে শিখিমান ভাগ গুরি দিম, সুক্কোতর সংজাগায়ান জরীপ গুরিনে ভাগ গুরি দিম।

⁷ গিলিয়দ আর মনঃশি মর্; ইফ্রয়িম যেন মঅ মাধাবোর লুয়োর্ টোক্ক্যে, আর যিহূদা মর্ রাজ্ লুদিক্।

⁸ মোয়াবপান মর্ টেং ধবার পিলে; মুই ইদোম উগুরে মর্ ঠেঙর্ জদানি ফেলেম; আর পলেষ্টীয়া, মত্তেই তুই রঅ ছাড়ি উঠ্।”

⁹ কন্না মরে সেই শঅরত্ নেযেব যিয়েনত্ সমাদে আঘাত্যে? কন্না মরে পথ দেগেইনে ইদোমত্ নেযেব?

¹⁰ ও গোজেন, তুই কি আমারে বাদ ন-দুয়োচ্? আমা সৈন্যগুনো সমারে তুই দঅ আর্ ন-যাচ্।

¹¹ ও গোজেন, শত্রুগুনোর বিরুদ্ধে তুই আমারে বল্ দে, কিত্তে মান্‌জ্যর এজালত্তে দঅ কনঅ দাম নেই।

¹² গোজেনর বলে আমি জিদিবোং; আমা শত্রুগুনোরে তে টেঙোই মাড়িবো।