গীতসংহিতা 6 - Chakma Bible

গান পরিচালগত্তে। তারর্ বাজনা সমারে সমারে গাহ্ পরিবো। বাজনা আর গান চিগোন্ চিগোন্ রঅ গুরি গাহ্ পুরিবো। দায়ূদোর গান।

¹ ও লগেপ্রভু, রাগ্ গুরিনে তুই মরে গেইল্ ন-দিচ্; বেজার্ ওইনে মরে শাজন্ ন-গুরিচ্।

² ও লগেপ্রভু, তুই মঅ উগুরে দোয়্যে গর্, কিয়া মুই বলপোজ্যে। ও লগেপ্রভু, মরে গম্ গর্, কিয়া দরে মর্ আড়ুনোত্ গির্‌গিরেনি ধোজ্যে,

³ আর পরাণানত্ অমকদ দর্‌বুগ্ লাক্যে। ও লগেপ্রভু, আর কয়দিন সেধোক্ক্যেন্ অবঅ?

⁴ ও লগেপ্রভু, মন্দি ফিরি আয়, মরে উদ্ধোর্ গর্; তর্ অমকদ কোচ্‌‌পানার দোয়্যেলোই, মরে রোক্ষ্যে গর্।

⁵ মুরি গেলে তরে মনত্ গরা ন-যেবঅ; মোজ্যেদে জাগানত্ কন্না তর্ বাঈনী গুরিবো?

⁶ মুই ফবাদে ফবাদে বল্ পোজ্যে ওই পোজ্যং; সারা রেত্ কানি কানি মুই বিচ্ছোনান্ ভিজেয়োং, চোগো পানিয়ে মঅ খাট্‌‌তান্ ভিজাং।

⁷ দুঘে মর্ দেগিবার্ খেমতাগান্ কুমি যেইয়্যে; শত্রুগুনোর্ কারনে মঅ চোগো পহ্‌‌রান্ কুমি যেইয়্যে।

⁸ ও বজং কাম্ গুরি বেড়েয়্যে মানুচ্চুন, তুমি বেক্কুনে মঅ কায়-কুরেত্তুন দূর্ ওই যঅ, কিয়া লগেপ্রভু মঅ কানানিগান শুন্যে।

⁹ মঅ দোয়্যে-ভিক্ষ্যেগান লগেপ্রভু শুন্যে, মঅ তবনাগান তে গ্রাজ্য গোজ্যে।

¹⁰ মঅ শত্রুগুনে বেক্কুনে লাজত্ পরিবাক্ আর দোরেবাক্; তারা ফিরি যেবাক্, আদিক্ক্যেন্‌গুরি লাজত্ পুরিবাক্।