গীতসংহিতা 59 - Chakma Bible

গান পরিচালগত্যে। সুর-“ভস্ত ন-গোজ্য।” দায়ূদোর এক্কো মিক্‌তাম। দায়ূদোরে মারে ফেলেবাত্তে শৌল যেক্কেনে মানুচ্ পাধেইনে তা ঘরত্ চুগিদার বোজেয়্যে, গান্নো সেই সময়োর।

¹ ও গোজেন, মঅ শত্রুগুনো আঢত্তুন্ তুই মরে উদ্ধোর গর; মর্ বিপক্কগুনোত্তুন্ তুই মরে অজলত্ তারার নাগাল বারেদি তুলি রাগা।

² যিগুনে বজং কাম গুরি বেড়ান্ তারার আঢত্তুন্ মরে উদ্ধোর গর্; খুন গুরিয়্যেগুনোর আঢত্তুন মরে বাঁজা।

³ তারা মত্তেই হাফ্ দি আগন, দর্‌গরেপারা মানুচ্চুনে মঅ উগুরে আক্রমন আরাম্ভ গোজ্যন্; ও লগেপ্রভু, সিয়েন মর্ কনঅ অন্যেয় বা পাপত্তে নয়।

⁴ মুই কনঅ দুষ্ ন-গরং, তো তারা ধাবা এইনে মঅ বিরুদ্ধে লাক্ক্যন্। মরে বল্ দিবাত্তে তুই উদি আয়, মঅ দযাগান চাহ্।

⁵ ও বেগত্তুন্ খেমতাবলা লগেপ্রভু গোজেন, ইস্রায়েলর গোজেন, তুই বেক্ জাদ্‌তুনোরে সাজা দিবাত্তে উঠ্; পাজি কুজুরোমিগুনো উগুরে কনঅ মেয়্যে ন-দেগেচ্।

⁶ তারা সাজোন্যে অক্তত্ ফিরি এজন্, কুগুরো ধোক্ক্যেন রঅ ছাড়ি ছাড়ি, আর শঅরর্ বেক জাগানিত ঘুরি ঘুরি বেড়ান্।

⁷ চাহ্, তারা মুয়োন্দি কি বেক্ কধানি নিগিলেয়োন্, তারার ঠুদোত্তুন যেন লাম্বা ছুরি নিগিলি এজের্; তারা কদন, “আমা কধানি কনজনে ন-শুনিবাক্।”

⁸ মাত্তর্ ও লগেপ্রভু, তারারে চেইনে তুই আজর্ আর সে জাদ্‌তুনোরে বিদ্রুপ গরর্।

⁹ তারা বোলি বিলিনে মুই তরে বাজ্জেই থেম্, কিত্তেই ও গোজেন, তুয়ই মর্ ঘর।

¹⁰ গোজেনে তার অমকদ কোচ্‌পানাত্যে মইদু এবঅ, মর্ শত্রুগুনোর উদি যানা মরে চেবাত্তে দিবো।

¹¹ ও প্রভু, আমা ঢাল, মঅ শত্রুগুনোরে তুই মারে ন-ফেলেচ্, নলে মঅ মানুচ্চুনোর ইয়েনি মনত্ ন-থেবঅ। তুই বরং তঅ বল্লোই তারারে এবাবোত্যে গর্ যেনে তারা ইদু-উদু ঘুরি বেড়ান; তুই তারারে ওদেই দে।

¹² তারার মুয়ো পাপ্পোই আর ঠুদো কধালোই যে অভিশাপ্পান্ আর মিজে কধানি আঘে, সিয়েনত্তে তারার বার্‌বোগানিলোই তারা ধরা পোড়োদোক্।

¹³ তুই রাগে তারারে ভস্ত গর্, ভস্ত গর্ যেনে তারা আর্ ন-থান; ইয়েন্দোই পিত্‌থিমীর শেজ্ দুযি সং বেক্কুনে হবর্ পেবাক্, গোজেনে যাকোবর বংশবো উগুরে রাজাগিরি গুরিবো।

¹⁴ তারা সাজোন্যে অক্তত্ ফিরি এজন্, কুগুরো ধোক্ক্যেন রঅ ছাড়ি ছাড়ি, আর শঅরর্ বেক জাগানিত্ ঘুরি ঘুরি বেড়ান্।

¹⁵ তারা হানা তোগেবাত্তে ইন্দি-উন্দি ঘুরোন্; পেট ন-ভুরিলে তারা গদা রেত্তো ঘুম ন-যান।

¹⁶ মাত্তর্ মুই তর্ বল পৌইদ্যেনে গান গেম্, আর বেন্যেমাদান হুজিয়্যে তর্ অমকদ কোচ্‌পানার গান গেম; কিত্তেই তুই মর্ ঘর, দযাত্ আশ্রয়র-জাগা।

¹⁷ ও গোজেন, মর্ বলান, মুই তর্ নাঙে নাঙ্ গিনেদে গান গেম্। তুই মর্ ঘর; তুয়ই সেই গোজেন, মত্তেই যিবের অমকদ কোচ্‌পানা আঘে।