গীতসংহিতা 57 - Chakma Bibleগান পরিচালগত্তে। সুর-“ভস্ত ন-গোজ্য।” দায়ূদোর এক্কো মিক্তাম। শৌলত্তুন ধেই যেইনে দায়ূদে যেক্কে গাঢত্ আশ্রয় নেযেল, গান্নো সেই সময়োর। 1 মঅ উগুরে দোয়্যে গর্; ও গোজেন, মঅ উগুরে তুই দোয়্যে গর্, কিত্তেই তইদু মুই আশ্রয় নেযেয়োং। তর্ ডুয়োনির ছাবাত্ তলে মুই থেম যেদকদিন সং মঅ উগুরেত্তুন এ দযাগানর ঝড়ান্ সুরি ন-যায়। 2 মুই দাঙর্ গোজেনরে ডাগিম; যিবে মরে দিয়্যে তার বেক্ কধানি রোক্ক্যে গরে মুই তারে ডাগিম। 3 স্বর্গত্তুন তার বলান্ লামি এবঅ; যিগুনে মরে লড়ান্ তারার দুজ্ছানির কধা কবাত্তে তে ন-ছাড়িবো। গোজেনর ইত্তুন তার অমকদ কোচ্পানা আরি বিশ্বেজ্ছান লামি এবঅ। 4 পেত্ পরায় পাগল সিংহ ধোক্ক্যেন মান্জ্যর্ সংমধ্যে মুই পড়ি আগং; তারার দাত্তুন্ যাদি আর শেল ধোক্ক্যেন, আর জিলান্ ধারেয়্যে ছুরি। 5 ও গোজেন, তর্ মহিমাগান দেবাবো সং উদোক্; তর্ বাঈনীগান পিত্থিমীগান উগুরে দেঘা দোক্। 6 তারা মর্ আঢিবার পদ্তানথ্ জাল পাত্যন্; অত্যেচারে মুই ভাঙি পোজ্যং; তারা মঅ পদ্তানথ্ গাদ্ খুজ্যন্, মাত্তর্ তারা নিজে সিয়েনত্ পোজ্যন। 7 ও গোজেন, মঅ মনান্ থির্ আঘে, ন-লড়ে; মুই গান গেম, গানর্ সুর তুলিম। 8 ও মর্ মনান, জাগি উঠ্; গীতার আর হারমোনি, জাগি উঠ্; মুই রেদ্তোরে কাদেই দিম। 9 ও প্রভু, নানান্ জাদর মুজুঙোত্ মুই তরে ভালেদি জানেম, তারার ইদু তর্ নাঙে গীদ্ গেম্; 10 কিত্তেই তর্ অমকদ কোচ্পানাগান যেন দেবাবো ইদু লুম্মেগোই, তর্ বিশ্বেজছান মেঘ উগুরে লুম্মেগোই। 11 ও গোজেন, তর্ মহিমাগান দেবাবো সং উদোক্; তর্ বাঈনীগান পিত্থিমীগান উগুরে দেঘা দোক্। |
Copyright © 2021 Bangladesh Bible Society
Bangladesh Bible Society