গীতসংহিতা 56 - Chakma Bible

গান পরিচালগত্তে। সুর-“গান নেইয়্যে পরবাস্যে কঅ ধোক্ক্যেন।” দায়ূদোর এক্কো মিক্‌তাম। পলেষ্টীয়গুনে যেক্কেনে তারে গাৎ শঅরত্ গান্নো গেয়োন্ সেই সময়োর।

¹ ও গোজেন, মঅ উগুরে দোয়্যে গর্, কিত্তেই মান্‌জ্যে মরে লড়াদন্; নিত্য যুদ্ধো গুরিনে তারা মরে দুঘ্ দেদন।

² মর্ শত্রুগুনে নিত্য মরে লড়াদন্; কয়েকজনে বার্‌বো গুরিনে মঅ সমারে যুদ্ধো গত্তন্।

³ মনত্ দর্‌বুক্ লাগিলে মুই তঅ উগুরে বিশ্বেজ্ গুরিম।

⁴ যিবের কধানির গুণগান মুই গাং, সেই গোজেন উগুরে, অয়, সেই গোজেন উগুরে মুই বিশ্বেজ্ গরং; মুই ন-দোরেম, মান্‌জ্যে মরে কি গুরি পারন্?

⁵ তারা নিত্য মঅ কধানি উগুরে বজং মনে গরন্ আর মরে ক্ষতি গুরিবার চিন্তলোই থান্।

⁶ তারা এক সমারে এগত্তর্ অন্, মত্তে উত্ পাদি থান্; মরে মারে ফেলেবার সুযোগত্তে তারা মর্ আঢা-উদো গরানাত্ খিয়েল গরন্।

⁷ অন্যেয়ত্তে কি তারা সাজা ন-পেবাক্? ও গোজেন, তুই রাগে জাদ্‌তুনোরে ভস্ত গর্।

⁸ মুই যে কয়বার পৌল্যেই পৌল্যেই বেড়েয়োং সে কধা দঅ তুই হবর্ পাজ্; মঅ চোগো পানিলোই তর্ পিলেবো তুই ভুরি নেযা। ইয়েনি বেক্কানি দঅ তঅ বোইবোত্ লেগা আঘে।

⁹ যেদিন্যে মুই তরে ডাগিম, সেদিন্যে মর্ শত্রুগুনে ধেই যেবাক্; মুই হবর্ পাং গোজেনে মঅ সমারে আঘে।

¹⁰ গোজেন, যিবের কধানির গুণগান মুই গাং, লগেপ্রভু, যিবের কধানির মুই গুণগান গরং,

¹¹ মুই তা উগুরে বিশ্বেজ্ গরং; মুই ন-দোরেম, মান্‌জ্যে মরে কি গুরি পারন্?

¹² ও গোজেন, তইদু যে মান্যং মুই সিয়েন ছিড়েবাত্তে বাধ্য; মুই তইদু ভালেদির-উৎসর্ব গুরিম;

¹³ কিত্তেই মরণত্তুন তুই মঅ পরাণান রোক্ক্যে গোজ্যস্ আর পড়ানাত্তুন্ মরে বাজেয়োচ্, যেনে জিংকানির পহ্‌রলোই মুই গোজেন মুজুঙোত্ আঢা-উদো গুরি পারং।