গীতসংহিতা 55 - Chakma Bibleগান পরিচালগত্তে। তারর্ বাজনার সমারে গাহ্ পুরিবো। দায়ূদোর দুঘোত্ তবনা গুরিবার-গান। 1 ও গোজেন, মুই তবনা গুরিলে কান পাদিচ্; মুই কোজোলি গুরিলে তুই নিজোরে লুগেই ন-রাগেচ্। 2-3 মন্দি চাহ্, মরে জোব্ দে; মর্ শত্রুগুনোর বিষো ধোক্ক্যেন কধালোই আর পাজিগুনো অত্যেচারে মুই দুঘোত্ থির্ নেইয়্যে ওইয়োং আর ফবাঙর্। তারার্ বজং কামানিত্তেই তারা মঅ উগুরে দযা ডাগি আন্যন্, আর রাগে মঅ উগুরে অত্যেচার গোজ্যন। 4 ইয়েন্দোই মঅ মনান্ সে একবাবোত্যে ওই্য়্যে; মরণর দর্ বুক মুই পেয়োং। 5 মরে দর্বুগে আর গির্গিরেনিয়ে ধোজ্যে; অমকদ দরে মুই জুরো গুরি আগং। 6 মুই কোইয়োং, “হায়, যুনি পেগো ধোক্ক্যেন মর্ ডুয়ো থেদঅ! সালে মুই উড়ি যেইনে জিরেদুং। 7 অয়, সালে মুই ভালোদ্ দুরোত্ যেদুং, আর এক্কান্ নিরিবিলি জাগাত্ যেইনে থেদুং। 8 মর্ আশ্রয়-জাগানত মুই যেদুং, ঝড় বোইয়্যেরত্তুন দুরোত্ যেদুং।” 9 ও প্রভু, তুই তারা উগুরে ভস্তগান্ আন্, তারার্ কধা বাত্তাত্ যাগুলুক্ বাজেই দে; মুই শঅরত্ মারামারি আর কোল্-কোজ্যে দেগঙর্। 10 তারা যেন কি তোগেবাত্তে দিনে-রেদে শঅর দেবাল উগুরে ঘুরোন্। পাজি অন্যেয় কামানি শঅর ভিদিরে চলের্। 11 সে ভিদিরে চলের্ ভস্ত অনার্ কাম; অত্যেচার আর ছলনার কামানি শঅর ভিদিরে আমিযে আঘে। 12 যে মরে অগমান গোজ্যে তে যে মর্ শত্রু সিয়েন নয়, সালে মুই সোজ্য গুরি পারিদুং; যে মত্তুন বেশ্ নিজোরে দাঙর্ গোজ্যে তে যে মর্ বিপক্ক মানুচ্ সিয়েন নয়, সালে মুই তাত্তুন্ পৌইল্যেদুং। 13 মাত্তর্ সিয়েন তুই গোজ্যচ্, মঅ ধোক্ক্যেন এক্কো মান্জ্যে, মর্ মনানর্ সমাজ্যে, মর্ পরাণর দাংগু। 14 আমা ভিদিরে গভিন উদোলোলি এলঅ; গোজেনর ঘরত্ তবনাগুরিয়্যে দলর্ ভিদিরে আমি এক সমারে আঢা-উদো গুরিদোং। 15 মঅ শত্রুগুনো উগুরে আদিক্ক্যেন্গুরি মরন এজোক্; তারা জেদাবাদে পাদালত্ যাদোক্, কিত্তেই তারা ঘরত্ আর তারা মনানিত্ কুজুরোমি আঘে। 16 মাত্তর্ মুই গোজেনরে ডাগিম, আরে লগেপ্রভু মরে উদ্ধোর্ গুরিবো। 17 সাজোন্যে, বেন্যে আর দিবুজ্যে মুই কোজোলি গুরি মর্ আবিত্তিগান জানেম, আর তে মঅ রবো শুনিবো। 18 যে যুদ্ধোগান্ মঅ বিরুদ্ধে চোল্যে সেক্কে মর্ বিপক্ক দল্লো দাঙর্ এলঅ, সেনত্তে তে মরে ছাড়ি আনিনে গমেডালে রাগেয়্যে। 19 গোজেন, যিবে পৌইল্যাত্তুন ধুরি সিংহাসনত্ আঘে তে শুনিবো আর তারারে সাজা দিবো। তারার মনানি কনঅ পরিবত্তন্ নেই, গোজেন উগুরে দর্অ নেই। 20 মর্ সেই সমাজ্যেবো সমারে যিগুনে সুগে-শান্দিয়্যে এলাক্ তারার উগুরেয়ো সেই সমাজ্যেবো আত্ তুল্যে আর তার চুক্তিবো ভাঙ্যে। 21 তার মুয়ো কধানি মাখনত্তুন বেশ্ নরম, মাত্তর্ তা মনানত্ রোইয়্যেদে যুদ্ধো; তা কধানি কিয়্যেত্ গুল্যে তেলত্তুন বেশ্ আরামর, মাত্তর্ সিয়েনি যেন থৈল্যেত্তুন টানি নিগিল্যেয়ে তলোয়ার। 22 তর্ বেক্ কামানি তুই লগেপ্রভুর উগুরে ফেলেই দে, তেয়ই তর্ বেবস্থা গুরিবো; তা ভক্তগুনোরে তে কনদিন্অ তলে পরিবাত্তে ন দিবো। 23 মাত্তর্ ও গোজেন, তুই খুনি আর ছলনাগুরিয়্যেগুনোরে মরণর জাগাত ফেলেই দিবে, আর সিয়েন গুরিবাদে তারার আয়ুর অদ্দেক্ শেজ্ অবার আগেন্দি; মাত্তর্ মুই তঅ উগুরে বিশ্বেজ্ গুরিম। |
Copyright © 2021 Bangladesh Bible Society
Bangladesh Bible Society