গীতসংহিতা 53 - Chakma Bible

গান পরিচালগত্তে। সুর-“মহলৎ।” দায়ূদোর দুঘোর সময়োত্ তবনার-গান।

¹ যিগুনোর বিবেক্ মরা তারা মনে গরন্দে গোজেন বিলিনে কনজন নেই। তারার্ খাচ্চ্যত্তানি বর্‌বাদ্ ওই যেইয়্যে, তারার্ কামানি জঘন্য; গম্ কাম গরন্ এধোক্ক্যেন কনজন নেই।

² গোজেনে স্বর্গত্তুন তলে মানুচ্চুনোর ইন্দি চেইনে দেগিলোদে; দেগিবাত্তে চেলদে কনজনে সত্য জ্ঞান্দোই চলন্ নাহি, কনজনে গোজেনর আওজ্ মজিম আঢন্ নাহি।

³ তে দেগিলোদে বেক্কুনে ঠিগ্ পদত্তুন্ সুরি যেইয়োন, বেক্কুনে একসমারে ভান্ন্যেই ওই যেইয়োন; গম্ কাম গরন্ এবাবোত্যে কনজন নেই, একজন্‌অ নেই।

⁴ যিগুনে ভান্ন্যেই কাম্ গুরিনে বেড়ান তারা কি এদক্ অবুঝুনোর্? মানুচ্চুনে যেধোক্ক্যেন্ গুরি হানা খান্ সেধোক্ক্যেন গুরিনে তারা মঅ মানুচ্চুনোরে হেই ফেলান; তারা গোজেনরে ন-ডাগন্।

⁵ তর্ আক্রমণগুরিয়্যে গুনোর আড়্‌‌গড়াগুন তে সোড়েই রাগেয়্যে; আগে তারার দর্-ভর্ ন-এলঅ, তো তারা ইক্কিনে অমকদ দোরেলাক্; গোজেনে তারারে বাদ দিয়্যে, সেনত্তেই তুই তারারে লাজত্ ফেলেয়োচ্।

⁶ ইস্রায়েলীয়গুনোর উদ্ধোর সিয়োনর ভিদিরেত্তুন্ এজোক্। গোজেনে যেক্কে তা মানুচ্চুনোর অবস্থা ফিরেব সেক্কেনে যাকোবর বংশগুনে ফুত্তি গুরিবাক্- ইস্রায়েলীয়গুনে হুজি অবাক্।