গীতসংহিতা 52 - Chakma Bible

গান পরিচালগত্তে। দায়ূদোর দুঘোর সময়োত্ তবনার-গান। ইদোমীয় দোয়েগে এইনে যেক্কে শৌলরে হবর্ দিলো, দায়ূদে অহীমেলকর ঘরত্ যেইয়্যে গান্নো সেই সময়োর্।

¹ ও বোলীবন্ধ যোদ্ধা, কিত্তেই তুই ভান্ন্যেই বেপারানিলোই বার্‌বো গরর্? গোজেনর অমকদ কোচ্‌পানার দঅ শেজ্ নেই।

² তর্ জিলানদি ভস্ত অবার্ সল্লার কধা নিগিলি এজের্; ও ছলনাগুরিয়্যে, তর্ জিলান্ যেন ধার্ দিয়্যে ক্ষুর ধোক্ক্যেন্।

³ তুই গমত্তুন্ ভান্ন্যেইয়ান কো্চ্‌পাজ্, আর কোচ্‌পাজ্ সত্যত্তুন্ মিজে কধা কনাগান।

⁴ ও ছলনাবলা জিলান্, যে কধাগানে ভস্ত অনাগান্ ডাগি আনে তুই সিয়েনই গম্ পাজ্।

⁵ মাত্তর্ গোজেনে তরে উমরত্তে ভস্ত গুরিবো; তে তরে টানি আনিবো, তর্ তাম্বুলোত্তুন্ কারি আনিবো, জেদাগুনোর দেজত্তুন্ তরে উগুরে ফেলেব।

⁶ ইয়েনি দেগিনে গোজেন ভক্তগুনোর্ পরাণত্ ভোক্তিবলা দর্ লাগিবো; তারা তরে ঠাট্টা গুরিনে কবাক্,

⁷ “উইয়োবো চাহ্, সেই মানুচ্চো গোজেনরে তার্ আশ্রয়-জাগা ন-গরে; তার বোউত্ ধন-সোম্বোত্তি উগুরে তে নির্ভর গোজ্যে আর ভান্ন্যেই কামনা-বাসনার বল্লোই নিজোরে বোলীবন্ধ গোজ্যে।”

⁸ মাত্তর্ মুই গোজেনর ঘরত্ দাঙর্ ওইয়্যে জলপাই গাজ ধোক্ক্যেন্; মুই নিত্য গোজেনর গভিন্ কোচ্‌পানা উগুরে নির্ভর গুরি থাং।

⁹ তুই যিয়েন গোজ্যস্ সিয়েনত্তে জিংকানিবর্ মুই তর্ বাঈনী গুরিম; তুই মংগলময় বিলিনে তর্ ভক্তগুনোর্ মুজুঙোত্ মুই তরে বাজ্জেই থেম্।