গীতসংহিতা 51 - Chakma Bibleগান পরিচালগত্তে। দায়ূদোর গান। বৎশেবার লগে দায়ূদোর সীনেলির পরেদি ভাববাদী নাথনে যেক্কেনে দায়ূদো ইদু এচ্চ্যে গান্নো সে সময়োর্। 1 ও গোজেন, তর্ অমকদ কোচ্পানাত্তে মঅ উগুরে দোয়্যে গর্; তর্ অমকদ দোয়্যে-মেয়্যেত্তে তঅ উগুরে মর্ বেক্ উল্লোমিগানি ক্ষেমা গর্; 2 মর্ বেক্ অন্যেয়ানি তুই ধোই ফেলা; মর্ পাপ্পানিত্তুন্ মরে সিজি গর্। 3 মর্ বেক্ উল্লোমির কধানি মর্ চেদনত্ আঘে; মর্ পাপ্পানি নিত্য মত্তুন্ মনত্ আঘে। 4 তর্ বিরুদ্ধে, বানা তর্ বিরুদ্ধে মুই পাপ গোজ্যং আর তর্ চোগেন্দি যিয়েনি ভান্ন্যেই সিয়েনি গোজ্যং। সেনত্তেই তর্ রায়ান্ ঠিগ্, তর্ বিচেরান গম্। 5 অয়, জন্মত্তুন্ ধুরি মুই অন্যেয় কামত্ আগং; পাপর্ অবস্থায় মুই মা পেদত্ এলুং। 6 তুই মনান ভিদিরে সত্যগান দেগিবাত্তে চাজ্; তুয়ই মর্ মনানর্ গভীনোত্ জ্ঞানান্ দে। 7 এসোব গাজর্ ডাল্লোই তুই মরে সিজি গর্, সিয়েন্দোই মুই সিজি ওম্; মরে ধোই ফেলা, সেক্কে মুই ধোক্ ধোক্যে ধুব্ ওম। 8 মরে হুজির্ রঅ আর রঙ্গ-ফুত্তির রঅ শুনিবাত্তে দে; তর্ গুড়ি গোজ্যে মর্ এই আড়ুনে ফুত্তি গোরোদোক্। 9 তুই মর্ পাপ্পানির ইন্দি ন-চেজ্; মর্ বেক্ অন্যেয়ানি তুই খেমা গর্। 10 ও গোজেন, তুই মইদু দোল্ মন-মানসিক্ গুরি দে; মর্ মনান্ আরঅ থির্ গুরি দে। 11 তঅ মুজুঙোত্তুন্ মরে দূর্ গুরি ন-দিচ্; মঅ ভিদিরেত্তুন্ তর্ সুদ্ধো-সাংগ আত্মাগানরে ন-নেযেচ্। 12 তর্ দিয়্যে উদ্ধোরর্ হুজিগান মরে আরঅ দে; তর্ বাধ্য অবার্ আওজর্ মনান্দোই তুই মরে পোত্পোত্যে গর্। 13 সালে মুই তর্ পথ্তান পৌইদ্যেনে উল্লোমিগুনোরে শিক্ষ্যে দি পারিম, আর পাপিগুনে ঘুরিনে তন্দি ফিরিবাক্। 14 ও গোজেন, মর্ উদ্ধোর গুরিয়্যে গোজেন, খুনোর দায়ত্তুন্ তুই মরে বাঁচা; সেক্কে মর্ মুয়ত্তুন্ তর্ ন্যায়র্ গানুন্ নিগিলি এবাক্। 15 ও প্রভু, মর্ মুয়োন খুলি দে, মুই তর্ নাঙ্ গিনেনা ফগদাং গুরিম। 16 য়েমান্-উৎসর্বত্তে দঅ তুই হুজি ন-অচ্, অলে মুই সিয়েন গুরিদুং; পুজ্যে-উৎসর্বত্তেয়ো তুই হুজি ন-অচ্। 17 ভাঙিপোজ্যে মনানই গোজেনর মানি লোইয়্যে উৎসর্ব; ও গোজেন, বুযিপোজ্যে (নত আহ্ নম্র) মনানিরে তুই তুচ্ছো ন-গুরিবে। 18 তর্ মংগলর্ আওজ্সোই তুই সিয়োনরে ভালেদি গর্; তুই যিরূশালেমর দেবালান তুলিবার কামান চালেই যাহ্। 19 সালে যগাজ্যে মনভাব্পোই গোজ্যে উৎসর্বর অনুষ্ঠানত্, পুজ্যে-উৎসর্ব আর শেজন্দি পুজ্যে-উৎসর্বত্ তুই হুজি অবে, আর তর্ পুজোবো উগুরে মান্জ্যে বলদ্ গোরু উৎসর্ব গুরিবাক্। |
Copyright © 2021 Bangladesh Bible Society
Bangladesh Bible Society