গীতসংহিতা 50 - Chakma Bibleআসফর গান। 1 খেমতাবলা গোজেন, লগেপ্রভু গোজেন, কধা কোইয়্যে; পূগত্তুন্ পোজিমেন্দি সং পিত্থিমীর বেক্কুনোরে তে ডাক্যে। 2 সিয়োনত্তুন, দোল্ ভরপুনং জাগানত্তুন্, গোজেনর পহ্রান্ ছিদি পোজ্যে। 3 আমা গোজেনে এজের্, তে মুয়োন খুলিবো; আগুনানে তার্ আগে আগে বেক্কানি জ্বালেইনে পুড়িনে দি দিবো; আর তার্ চেরোকিত্তে অমকদ ঝড় বেবঅ। 4 তা নিজো মানুচ্চুনোর বিচেরত্ এবাত্তে উগুরে আগাজ্ছানরে তে ডাগের্, আর ডাগেত্তে পিত্থিমীগানরে; 5 তে কোইয়্যেদে,“মর্ সেই ভক্তগুনোরে মইদু এগত্তর্ গর্, যিগুনে য়েমান্-উৎসর্বর মাধ্যমে মর্ থিদেবর গোজ্যে সুদোমান মানি লোইয়োন।” 6 আগাজ্ছানে তার্ ন্যায়বিচেরর্ কধা ফগদাং গরের্, কিত্যে গোজেনে নিজেই বিচেরক্। 7 “ও মর্ মানুচ্চুন, শোন্, মুই কধা কঙর্; ও ইস্রায়েল, মুই তর্ বিপক্ষে সাক্ষি দুয়োঙর্; মুই গোজেন, তর্ গোজেন। 8 তর্ য়েমান্-উৎসর্বলোই মুই তরে দুষি ন-গরঙর্; তর্ পুজ্যে-উৎসর্বয়ানি আমিঝে দঅ মঅ মুজুঙোত্ আঘে। 9 তর্ গোরু লুরোর্ কনঅ বলদর্ মর্ দরকার নেই, তর্ ছাগল লুরোর্ ছাগল্অ নয়; 10 কিত্যে ঝাড়র্ বেক্ প্রাণিগুন্ মর্, গুণি ন-পুড়েইয়্যে মুড়ো-মুড়ি উগুরে ঘুরি বেড়েই্য়্যে য়েমানুনো মর্। 11 এমন্ কি, মুড়োগুনোর্ বেক্ পেখ্কুনো মর্ জানা আঘে, মাদর্ বেক্ প্রাণিগুন মর্। 12 মর্ পেত্ পুরিলেয়ো মুই তরে ন-কদুং, কিত্যে পিত্থিমীগান মর্ আর পিত্থিমীগান ভিদিরে যিয়েনি আঘে বেক্কানি মর্। 13 তুই কি মনে গরচ্ বলদ্ গোরু য়েরানি মর্ হানা? ছাগল লো কি মুই খাং? 14 গোজেন ইদু তর্ ভালেদিগানই তর্ উৎসর্ব ওক্; সেই দাঙর্বো ইদু তর্ বেক্ মান্যেগানি পূরোণ গুরি থেচ্। 15 তর্ দযার্ দিনুনোত্ তুই মরে ডাগিচ্; মুই তরে উদ্ধোর্ গুরিম আর তুই মরে সর্মান গুরিবে।” 16 মাত্তর্ গোজেনে পাজি মানুচ্চুনোরে এ কধাগান কোইয়্যেদে, মর্ রীদি-সুদোমর্ কধা কবার্ বা মর্ সুদোমর কধা মুয়োন্দি আনিবার তর্ কি অধিকার আঘে? 17 তুই দঅ মর্ শাজনান্ ঘিনেচ্ আর মঅ কধানির ধারান্ ন-ধারেচ্। 18 চুর্বোরে দেগিলে তুই তারে সায় দুয়োচ্, সিনেলীগুনো সমারে মিজেজ্। 19 ভান্ন্যেই কধালোই তর্ মুয়োন মেল্যে, তর্ জিলানে ছল গুরিনে কধা কয়। 20 তুই বোইদ্যে বোইদ্যে তর্ নিজো ভেইয়োর্ বিরুদ্ধে কধা কোই কোই থাচ্ আর তারে ইংসে গরচ্। 21 ইয়েনি তুই গোজ্যস্, মাত্তর্ মুই মুয়োন ন-খুলোং; তুই মনে গোজ্যস্চে মুই তঅ ধোক্ক্যেন এক্কো, মাত্তর্ মুই তর্ দুষ্ছান দেগেই দিম আর তর্ বেক্কানি তর্ চোগোর মুজুঙোত্ এক্কান এক্কান গুরি তুলি ধুরিম। 22 “তুমি যিগুনে গোজেনরে ভুলি যেইয়ো কধাগান একপল্লা ভাবি চেইয়ো; সিয়েন ন-অলে মুই তমারে কট্টা কট্টা গুরি ফেলেম, তমারে বাজেবার কনজন ন-থেবাক্। 23 যিবের জিংকানিত্ ভালেদিগানই অলঅ তার উৎসর্ব তেয়ই মরে সর্মান গরে; যে মঅ পধেন্দি আঢে তারে মুই উদ্ধোর গুরিম।” |
Copyright © 2021 Bangladesh Bible Society
Bangladesh Bible Society