গীতসংহিতা 5 - Chakma Bible

গান পরিচালগত্তে। বাশি সমারে গাহ্ পুরিবো। দায়ূদোর গান।

¹ ও লগেপ্রভু, মঅ কধা শুনিচ্, মঅ মনর্ কোজোলিগান চাহ্।

² ও মর্ রাজা, ও মর্ গোজেন, তঅ সাহায্যত্তে মঅ কানানিয়ান্ তুই শুন্, কিয়া মুই তইদু তবনা গরঙর্।

³ ও লগেপ্রভু, পত্তিদিন বেন্যেমাদান্ তুই মঅ কধানি শুনোচ্। বেন্যেমাদান্ মুই তঅ মুজুঙোত্ মঅ তবনাগান সাজেই রাগাং আর আজালোই চেই থাং।

⁴ ও গোজেন, তুই অন্যেয়ত্তে হুজি অইদে গোজেন নয়; বজং মানুচ্চুনে তঅ মুজুঙোত্ থেই ন-পারন্।

⁵ যিগুনে বার্‌বো গরন্ তারা তঅ মুজুঙোত্ থেই ন-পারন; যিগুনে বজং কাম্ গুরিনে বেড়ান্ তারারে তুই এলাফেলা গরচ্।

⁶ যিগুনে মিজে কধা কন্ তারারে তুই ভস্ত গরচ্; যিগুনোর মনত্ খুনোর্ আর ছলনা গুরিবার মনভাব আঘে লগেপ্রভু তারান্দিত্তুন্ মুয়োন্ ফিরেই নেযায়।

⁷ মাত্তর্ মুই তর্ অমকদ দোয়্যের্ কারনে তঅ ঘরত্ সোমেম্, তঅ সুদ্ধো-সাংগ থেবার্ ঘরানন্দি চেইনে ভোক্তিলোই মঅ মাধাবো নিগিরিম্।

⁸ ও লগেপ্রভু, মর্ ভালোক্কুন্ শত্রু আগন বিলিনে তর্ ন্যায়র্ পধেদি তুই মরে পরিচালনা গর্; তঅ পথ্‌তান্ মঅ মুজুঙোত্ উজু গুরি দে।

⁹ মঅ শত্রুগুনোর কনঅ কধা বিশ্বেজ্ গরা ন-যায়, তারা মনত্ আগেদে ভস্ত অইদে মনভাব, তারা মুয়োনি যেন মেল্যে গোর ধোক্ক্যেন্, জিল্লোই তারা থেঝেরামাজ্যে কধা কন্।

¹⁰ ও গোজেন, তুই তারারে দুষি বিলিনে ফগদাং গর্; তারার্ কুজুরোমিলোই তারার্ দযা ওক্। তারার্ গুণি ন-পুরেইয়্যে দুষোত্যে তুই তারারে ধাবেই দে, কিয়া তারা তঅ বিরুদ্ধে উল্লোমি গোজ্যন্।

¹¹ মাত্তর্ যিগুনে তইদু আশ্রয় নেযান্ তারা হুজি ওদোক্, তারা হুজিয়ে জিংকানিবর্ গান গাদোক্; তারারে তুই রোক্ষ্যে গর্, যেনে তরে যিগুনে কোচপান্ তারা তরে নিইনেই হুজি অন্।

¹² ও লগেপ্রভু, যিগুনে তর্ ভক্ত তারা উগুরে হামাক্কাই তর্ আশিদ্‌বাদ আঘে; তঅ দোয়্যেলোই তুই তারারে ঢাল ধোক্ক্যেন্ গুরি ঘিরি রাগেয়োচ্।