গীতসংহিতা 48 - Chakma Bible

এক্কো গান। কোরহর বংশর গান।

¹ আমা গোজেনর শঅরত্, তার সুদ্ধো-সাংগ মুড়োবোত্, লগেপ্রভু দাঙর্ আর বেগত্তুন বেশ্ নাঙ্ গিনিবার।

² গোজেনর থেবার জাগায়ান সেই সিয়োন মুড়োবো, অজলত্ বানেয়্যে দাঙর্ রাজার সে শঅরান চাদে দোল্; গোদা দুনিয়াগানরে সিয়েনে হুজিয়ে রাগায়।

³ সে শঅরর্ রাজঘরর বিল্ডিঙানত্ গোজেনে নিজোরে ঘর ইজেবে ফগদাঙ্ গোজ্যে।

⁴ রাজাগুনে তারার্ সৈন্যদলুনোরে এগত্তর্ গুরিনে একসমারে উজেই গেলাক্;

⁵ তারা সেই শঅরানরে দেগিনে উগুরি উদিলাক্ আর অমকদ দরে ধেই গেলাক্।

⁶ দরে সিয়েনত্ তারার গির্‌গিরেনি ধুরি যেইয়্যে আর পুয়ো ফুদোইদে মিলে ধোক্ক্যেন্ জালাপোড়া ওইয়্যে।

⁷ যেধোক্ক্যেন্ গুরিনে জোরে পূগো বোই্য়্যেরলোই তে দাঙর্ দাঙর্ তর্শীশ-জাহাজছানি ভাঙি ফেলেয়্যে, সেধোক্ক্যেন্ গুরিনে তে তারারে ভস্ত গুরিলো।

⁸ বেগত্তুন খেমতাবলা গিরোজ্ লগেপ্রভু শঅরর্ ভিদিরে থেইনে, আমা গোজেনর শঅরর্ ভিদিরে থেইনে আমি যিয়েনি শুন্যেই চোগেন্দিয়ো সিয়েনি দেগিলোং; দেগিলোং তে শঅরান্ উমরত্তে থিদেবর্ গুরিবো।

⁹ ও গোজেন, তর্ ঘর ভিদিরে তর্ অমকদ কোচ্‌পানার কধাগান আমি ধ্যান গোজ্যেই।

¹⁰ ও গোজেন, তঅ পৌইদ্যেনে যেধোক্ক্যেন বেক্ মানুচ্চুনে হবর্ পান সেধোক্ক্যেন তর্ নাঙ্ গিনেনা পিত্‌থিমীর শেজ্ দুযি সং আঘে; তর্ ডেন্ আঢ্‌তান ন্যায়র কাম গুরিবার বল্লোই পরিপূরোণ।

¹¹ তর্ ন্যায়বিচের্ দেগিনে সিয়োন মুড়োবো হুজি ওক্ আর যিহূদার আদামানিয়ে ফুত্তি গোরোক্।

¹² ও যিহূদার মানুচ্চুন, তুমি সিয়োনর চেরোকিত্তেন্দি ঘুরি এজ, তার তাম্বুলানি গুণি চঅ;

¹³ তার চেরোকিত্তে দেবালানি খিয়েল্ রাগেয়ো, তার রাজঘরর বিল্ডিঙান ঘুরি চঅ, যেনে সে বেক্ কধাগানি তমা ঝি-পুয়োগুনো ইদু কোই যেই পার।

¹⁴ এ গোজেনেয়ই আমা উমরর্ গোজেন; তে আমারে মরণ সং পথ দেগেইনে যেবঅ।