গীতসংহিতা 45 - Chakma Bible

গান পরিচালগত্তে। সুর্-“শাপলা।” কোরহর বংশর দুঘোত্ তবনার গান। কোচ্‌‌পানার গান।

¹ মর্ মনান্ দোল্ চিন্তেধারালোই ভুরি উঠ্যে; রাজার নাঙে মর্ কবিতে সুর্ নিগিলি এজের্; মর্ জিলানে কাবিল লিগিয়্যের্ লেখক ধোক্ক্যেন্ ওই উঠ্যে।

² মানুচ্চুনো ভিদিরে তুই অমকদ দোল্; তর্ দ্বিবে ঠুদোর কধা মধুলোই ভিজেয়্যে; গোজেনর উমরর্ আশিদ্‌‌বাদ্‌‌তান তঅ উগুরে ঝুরি পড়ের্।

³ ও বীর, তঅ কমরত্ লাম্বা ছুড়িগান বানি নেযা; বাঈনী আর মহিমার সাজে তুই সাজি নেযা।

⁴ সত্য, নম্রতা আর ন্যায়র পক্ষে তুই নিজোর মহিমালোই বিজয়ি ধোক্ক্যেন্ যাত্রা গর্; তর্ ডেন্ আঢ্‌‌তানে দর্‌‌বুক্-লাগাইদে ধোক্ক্যেন দাঙর্ দাঙর্ কাম গোরোক্।

⁵ রাজার শত্রুগুনোর বুগোত্ তর্ ধারেয়্যে সেল্‌‌লো ফুদেগোই; তর্ শত্রু জাদ্‌‌তুনে তর্ টেঙর তলে পড়ন্।

⁶ ও গোজেন, তর্ সিংহাসনান্ জিংকানিবর থিদেবর্ গোজ্যে; তর্ শাজনান্ ন্যায়র শাজন্।

⁷ তুই ন্যায়ানরে কোচ্‌‌পাচ আর অন্যেয়রে ঘিনেচ্; সেনত্তে গোজেন, তর্ গোজেন, তর্ সমাজ্যেগুনোত্তুন্ বোউত্ হুজির্ তেল ধোক্ক্যেন্ গুরি তঅ উগুরে ঢালি দিয়্যে।

⁸ গন্ধরস, অগুরু আর দারচিনির তুম্বাজে তর্ রাজপোশাকে তুম্বাজ্ ওইয়্যে; এদোর্ দাত্ বোজেইনে রাজঘরত্ তার যন্ত্রলোই যে বাজনা বাজে সিয়েনে তরে হুজি গরে।

⁹ তর্ সর্মানিত মিলেগুনো ভিদিরে রাজার্ ঝিগুনে আগন, আর রাজার-বৌগুনে ওফীর দেজর সনালোই সাজিনে তর্ ডেনেন্দি আগন্।

¹⁰ ও মিলেবো, শুন, মনান্ দে, কান পাদ। তঅ মানুচ্চুনোরে তুই ভুলি যাহ্, ভুলি যাহ্ তঅ বাবর্ ঘর কধানি।

¹¹ সালে রাজা তর্ দোলানিলোই ধরা দিবো; তেয়ই তর্ গিরোজ, তারে মাঢা নিগিরিনে জু জু গর্।

¹² সোর শঅরর মানুচ্চুনে বক্‌‌শিষ্‌‌সোই এবাক্; তাগোয়্যে মানুচ্চুনে তর্ দোয়্যে চেবাক্।

¹³ রাজঘরত্ রাজার-বৌবোরে অমকদ দোল দেগিবো; তার্ পজাগত্ সনার সুদোলোই বুন্যে আঘে।

¹⁴ আড়ুক্ তুল্যে পজাক্কোই তারে রাজার ইদু নেযা অবঅ; তা পিজেন্দি থেইয়্যে গাবুজ্যে সমাজ্যেগুনোরেয়ো তইদু নেযা অবঅ।

¹⁵ হুজি আর পরব্ গত্তে গত্তে তারারে নেযা অবঅ; তারা রাজঘরত্ যেইনে সুমিবাক্।

¹⁶ তর্ পুরোণি মানুচ্চুনোর জাগায়ানি তর্ পুয়োগুনে নিবাক্; মানুচ্চুনো ভিদিরে তুই তারারে শাজন্‌গুরিয়্যে বানেবে।

¹⁷ বংশর পর বংশগুনোর ইদু মুই তর্ নাঙান্ বাঁজেই রাগেম; সেনত্তেই নানান্ জাদে যুগ যুগ ধুরিনে তর্ বাঈনী গুরিবাক্।