গীতসংহিতা 41 - Chakma Bible

গান পরিচালগত্তে। দায়ূদোর গান।

¹ বর্‌পেইয়্যে সেই মানুচ্চো, যিবের মনানে নাঢা মানুচ্চুনোত্তে চিদে গরে; দুঘোর্ দিনোত্ লগেপ্রভু তারে উদ্ধোর্ গরে।

² লগেপ্রভু তারে রোক্ষ্যে গুরিবো আর বাঁজেই রাগেব; দেজত্ তে সুগি অবঅ। তা শত্রুগুনোর আঢত্ তে তারে তুলি ন-দিবো।

³ তে অসুখ্ ওইনে যেক্কে বিচ্চোনত্ পড়িবো সেক্কে লগেপ্রভু তারে সান্তনা দিবো; পিড়েল্যের বিচ্চোনত্তুন্ তে তারে তুলি আনিবো।

⁴ মুই কলুং, “ও লগেপ্রভু, মুই তঅ বিরুদ্ধে পাপ গোজ্যং; মরে দোয়্যে গর্, মরে গম্ গর্।”

⁵ মর্ শত্রুগুনে মর্ অমংগল চেইনে কন্, “তে কক্কে মুরিবো? কক্কে তা নাঙান্ বাদ যেবঅ?”

⁶ তারাত্তুন্ কনজনে মরে চেবাত্তে এলে মঅ লগে ফক্করর্ কধা কন; মর্ বিরুদ্ধে তারা ইংসে-নিন্দের কধা যোগার্ গরন আর বারেন্দি যেইনে সিয়েনি কোই কোই বেড়ান্।

⁷ যিগুনে মরে ঘিনেন্ তারা মঅ বিরুদ্ধে কানাকুদি গরন্ আর মরে ক্ষোতি গুরিবার চিন্তে গরন্।

⁸ তারা কন্দে, “তা উগুরে দর্‌গরেপারা ভান্ন্যেই কিজু ওই্য়্যে, যিয়েনত্ তে পড়ি আঘে সিয়েনত্তুন তে আর্ ন-উদিবো।”

⁹ এন্ কি, যে মর্ পরাণর দাংগু, যিবে উগুরে মর্ এদক্ বিশ্বেজ্, যে মর্ সমারে হানা-দানা গরে, তেয়ো মঅ বিরুদ্ধে টেঙ্ তুল্যে।

¹⁰ মাত্তর্ তুই, ও লগেপ্রভু, মঅ উগুরে দোয়্যে গর্; মরে তুল্, যেনে মুই তারার উগুরে হেনা শুজি পারং।

¹¹ মুই হবর্ পাং তুই মঅ উগুরে হুজি, কিয়া শত্রুগুনে মর্ বিরুদ্ধে জিদেনার রঅ ন-ছাড়দন্।

¹² মর্ গম্ কামানিত্তে তুই মরে ধুরি রাগেয়োচ্; তুই উমরত্তে মরে তর্ মুজুঙোত্ থিদেবর্ গোজ্যস।

¹³ পৌইল্যাত্তুন ধুরি থুম্ সং ইস্রায়েলর গোজেন লগেপ্রভুর বাঈনী ওক্। আমেন, আমেন।