গীতসংহিতা 4 - Chakma Bible

গান পরিচালগত্তে। তারর্ বাজানাবো সমারে গাহ্ পুরিবো। দায়ূদোর্ গান।

¹ ও মর্ গোজেন, মুই যে তর্ আওজ্ মজিম চলঙর্ সিয়েন তুই দেগেই দুয়োর্; মুই যেক্কেনে তরে ডাগিম সেক্কে তুই মঅ ডাগনিলোই শুনিচ্। দযাগানে মরে ঝাবোদে ধোজ্যে, মাত্তর্ তুই মরে নিজেস্ ফেলেবার্ যু গুরি দুয়োচ্। মঅ উগুরে দোয়্যে গর্, মঅ তবনাগান শুন।

² ও মানুচ্চুন, আর কয়দিন তুমি মঅ সর্মানানরে অসর্মান গুরিবা? আর কয়দিন তুমি মিজেগানরে কোচ্‌পেবা আর অসত্যর্ পিজেদি ঘুরিবা?

³ তুমি হবর্ পেবা, লগেপ্রভু তা ভক্তগুনোরে তা নিজোত্তে ফারক্ গোজ্যে; মুই ডাগিলে তে শুনিবো।

⁴ তুমি রাগ্ গুরিনে পাপ ন-গোজ্জ্য। বিচ্ছোনত্ পুরিনে তমা মনানিরে চঅ আর জুরো গুরি থেয়ো।

⁵ যগাজ্যে মনভাব্‌পোই তুমি উৎসর্বর অনুষ্ঠানানি গরঅ, আর লগেপ্রভু উগুরে নির্ভর গরঅ।

⁶ ভালোক্জনে কন্, “কন্না আমারে ভালেদি গুরি পারে?” ও লগেপ্রভু, তর্ দোয়্যের্ চোগেদি রিনি চানাগান পহ্‌র ধোক্ক্যেন্ গুরি আমা উগুরে পোড়োক্।

⁷ বোউত্ গুলোগুলি আর নুয়ো আংগুর-রস পেলে মানুচ্চুনোর যেধোক্ক্যেন্ মনানি হুজি অয়, তাত্তুনো বেশ্ রঙ্গ-ফুত্তিলোই তুই মঅ মনান্ ভোরেই রাগেয়োচ্।

⁸ ও লগেপ্রভু, তুয়ই মরে দর্‌বুগ্ নেইয়্যে গুরি রাগেয়োচ্, সেনত্তে মুই বিচ্ছোনত্ পড়িনে গমেডালে ঘুম্ যেম্।