গীতসংহিতা 38 - Chakma Bible

দায়ূদোর গান। এক্কো পূরোনি দিনো কধা ইদোত্ উদেদে গান।

¹ ও লগেপ্রভু, রাগে তুই মরে গেইল্ ন-দিচ্, বা বেজার্ ওইনে মরে শাজন্ ন-গুরিচ্;

² কিত্যে তর্ সেলুন মইদু লাক্ক্যন্, তঅ আঢ্‌‌তানিয়ে মরে ছাবি রাগেয়্যে।

³ তঅ রাগর্ কারনে মর্ কিয়্যেগান শুগুনো, পাপত্তে মর্ আড়ুনো গম্ নয়।

⁴ মর্ অন্যেয়ানি ভিদিরে মুই চোম্মোংগোই; সিয়েনি এমন্ গুয়োর ওইয়্যে যিয়েনি মুই বুয়োই ন-পারং।

⁵ মর্ ভুলোত্তেই মঅ ঘাগানত্তুন্ পঁজাবাজ্ নিগিলের্, সিয়েনত্ পযাবাজে ধোজ্যে।

⁶ মুই গুজোং ওই যেইয়োং, এক্কুবারে ঢুলি পোজ্যং; পুরো দিন্নো মুই মনত্ দুখ্ গুরিনে বেড়াং।

⁷ মর্ কমরত্ জ্বালাপড়া ওইয়্যে, মর্ কিয়্যেগান শুগুনো।

⁸ মুই বল্‌‌পোজ্যে ওইয়োং, এক্কুবারে ভাঙি পোজ্যং, মন পিড়েলোই মুই সাজুরঙর্।

⁹ ও প্রভু, মর্ বেক্ চাওয়া-পাওয়াগানি তর্ জানা আঘে; মর্ লাম্বা ভঅ নিজেচ্চুন তত্তুন্ লুগেই তবার্ নেই।

¹⁰ মর্ বুক্কো ধুক্ ধুক্ গরের, মর্ বলান্ যেয়েগোই, এন্ কি, মর্ চোক্কুন্‌অ আন্ধার্ ওই যেইয়োন।

¹¹ মর্ এ অবস্থাগান দেগিনে সমাজ্যেগুনে মত্তুন্ দূরোত্ দূরোত্ থান্, এন্ কি, মর্ গেদি-গুট্টিগুনে দূরোত্ সুরি থান্।

¹² মরে যিগুনে মারে ফেলেবাত্তে চান্ তারা মত্তে ফাল্ পাত্যন্; যিগুনে মরে ক্ষেতি গুরিবাত্তে চান তারা মরে ভস্ত অবার্ দর্ দেগান; পুরো দিন্নো তারা বানা মরে ঠোগেবার ফন্দি গরন্।

¹³ মুই যেনে ভঅ্‌রা ওই যেইয়োং, কিচ্ছু ন-শুনোং; যেনে বুব্ ওই যেইয়োং, কিচ্ছু ন-কং।

¹⁴ যে ন-শুনে আর যিবের মুয়োত্ কনঅ আবিত্তি নেই, মুই তা ধোক্ক্যেন্ ওইয়োং।

¹⁵ ও লগেপ্রভু, মুই তইন্দি চেই আগং; ও প্রভু, মর্ গোজেন, মর্ জোব্‌‌পান তুয়ই দিবে;

¹⁶ কিত্যে মুই কোইয়োং, যেক্কেনে মঅ টেঙান্ বিজিদি যেবঅ সেক্কেনে সিয়েন্দোই তুই তারারে ফুত্তি গুরিবাত্তে ন-দিচ্, মঅ বিরুদ্ধে বড়াই গুরিবাত্তে ন-দিচ্।

¹⁷ মুই দঅ পেরাই পড়ি যাঙর্; মঅ দুগোর্ কধানি নিত্য মত্তুন্ মনত্ পড়ের্।

¹⁸ মঅ দুজ্‌‌ছান মুই হাম্ কাঙর্; মর্ পাপত্তে মঅ মনান্ দুশ্চিন্তেলোই ভরা।

¹⁹ মঅ শত্রুগুনে তাজা আর বোলিবন্দ; যিগুনে এনেবাদে মরে ঘিনান্ তারা ভালোক্কুন্।

²⁰ মুই তারারে যে মংগল গরং সিয়েনর বদলে তারা মরে অমংগল গরন্; মুই যেক্কেনে গমানরে তগাং সেক্কেনে তারা মঅ বিরুদ্ধে থিয়েন্।

²¹ ও লগেপ্রভু, মরে ছাড়ি ন-যেচ্; ও মর্ গোজেন, মত্তুন্ দূরোত্ ন-থেচ্।

²² ও প্রভু, মর্ উদ্ধোর গুরিয়েবো, মরে বল্ দিবাত্তে তুই যাদিমাদি আয়।